ʻOtu Lea ki he ʻOtu Lea
1 Nīfai 3:7
Naʻe fekauʻi ʻe he ʻEikí ʻa Nīfai ke ʻalu pea fakahoko.
7 Pea naʻe hoko ʻo pehē ko au, Nīfai, naʻá ku pehē ange ki heʻeku tamaí: Te u ʻalu ʻo fai ʻa e ngaahi meʻa kuo fekau ʻe he ʻEikí, he ʻoku ou ʻilo ʻoku ʻikai tuku mai ʻe he ʻEikí ha fekau ki he fānau ʻa e tangatá kae ʻikai te ne teuteu ha hala maʻanautolu ke nau lava ai ʻo fai ʻa e meʻa kuó ne fekau kiate kinautolú.
Te u ʻalu
“ʻOku fakahā hoʻo falala [ki he ʻOtuá] ʻi hoʻo fakafanongo mo e loto [ʻoku fakataumuʻa] ke ako pea fakatomala, pea ʻalu ʻo fai ha meʻa pē ʻokú Ne kole atú. Ka ʻokú ke falala ki he ʻOtuá ke fakafanongo ki Heʻene pōpoakí ʻi he malanga, hiva, mo e lotu kotoa ʻi he konifelenisi [takitaha], te ke maʻu ia. Pea ka ke toki ʻalu ʻo fai Hono finangaló, ʻe tupulaki ho mālohi ke falala kiate Iá, pea ʻe hokosia e taimi te ke fonu he fakafetaʻi ʻi hoʻo ʻilo kuó Ne falala kiate koe.”
Palesiteni Henry B. Eyring, Tokoni ʻUluaki ʻi he Kau Palesitenisī ʻUluakí, “Falala ki he ʻOtuá, Pea ʻAlu Leva ʻo Fakahoko,” Liahona, Nōvema 2010, 73.
Fai
“Naʻá ku fokotuʻu ai ʻeni ko haʻaku lao: Ko e taimi ʻoku fekau mai e ʻEikí, fai ia.”
Ngaahi Akonaki ʻa e Kau Palesiteni ʻo e Siasí: Siosefa Sāmita (2007), 184.
Kuo fekau ʻe he ʻEikí
“ʻOku foaki mai e ngaahi fekau kotoa pē ʻa e ʻEikí ke tau lelei ange ai, fakalakalaka mo tupulaki.”
ʻEletā Robert D. Hales (1932–2017) ʻo e Kōlomu ʻo e Kau ʻAposetolo ʻe Toko Hongofulu Mā Uá, “If Thou Wilt Enter into Life, Keep the Commandments,” Ensign, May 1996, 36.
Te Ne teuteu ha hala
Naʻe ʻuhinga ʻa e teuteu ha halá ʻi he Fuakava Motuʻá, ki hono foʻu ha hala lelei, fakaʻilongaʻi lelei (vakai, Teutalōnome 19:3) pe ko hano fakaʻataʻatā ha hala ʻaki hono toʻo e ngaahi fakafelefelé (vakai, ʻĪsaia 40:3).
ʻI he taimi ʻoku ʻomi ai ʻe he ʻEikí ha fekau, te Ne teuteu maʻu pē ha hala maʻatautolu kapau ʻoku tau loto fiemālie ke tau falala mo talangofua kiate Ia. Kae hangē ko Nīfaí, kuo pau ke tau ngāue ʻi he tui; pea te tau maʻu ʻa e foungá, he ko e ʻEikí ʻoku “ngāue ʻi he mālohi, ʻo fakatatau ki he tui ʻa e fānau ʻa e tangatá” (Molonai 10:7).
Lavaʻi
“Kapau ʻe ʻi ai hoʻomou tuí … ʻe ʻikai ha meʻa ʻe taha ʻe taʻe-faʻa-fai ʻe kimoutolu.”