Founga Naʻá Ku Fakaloloto Ange Ai Hoku Vā Fetuʻutaki mo e ʻOtuá
Fai ʻe ʻEletā Massimo De Feo
ʻO e Kau Fitungofulú
ʻI he hoko hoku taʻu 12, naʻe kamata ke u fakakaukau lahi ki he founga ke u faivelenga ange ai ʻi he ongoongoleleí.
Naʻá ku nofo ʻi hoku kolo tupuʻangá ʻi Talanitō, ʻĪtali. Ko ha ngaahi taʻu siʻi pē ʻeni mei heʻema fetaulaki mo hoku tokouá mo e ongo faifekaú pea hoko ko ha ongo mēmipa ʻo e Siasí, ka naʻe kamata ke u ongoʻi vēkeveke ke u faivelenga ange. Naʻe kamata ke u ongoʻi ha holi ke tufa e sākalamēnití. ʻOku ou manatuʻi ʻeku lue ki he lotú he Sāpate kotoa mo lotu loto pē ke ui au ke u tufa e sākalamēnití.
ʻI ha pongipongi Sāpate ʻe taha, naʻe ui au ʻe heʻeku palesiteni fakakoló ki hono ʻōfisí. Naʻá ne pehē mai, “Masimo, ʻoku finangalo e ʻEikí ke ke maʻu ʻa e lakanga fakataulaʻeikí pea fakanofo koe ko ha tīkoni.”
ʻI heʻeku fanongo ki he ngaahi lea—“ʻoku fie maʻu koe ʻe he ʻEikí”—naʻe mahuʻingamālie ha meʻa kiate au. Naʻá ku ongoʻi ʻoku ʻikai ko ha tangata ʻoku kole mai kiate aú, ka ko e ʻEikí tonu ʻokú Ne ʻomai ha fatongia. ʻI he sio mai ʻa e palesiteni fakakoló, naʻá ku ongoʻi naʻe mafao mai e toʻukupu ʻo e ʻEikí kiate au.
ʻI he kamata ke u tufa e sākalamēnití he Sāpate kotoa pē, naʻá ku ongoʻi e mālohi faka-ʻOtua ʻi heʻeku moʻuí. Naʻá ku ongoʻi fatongia ʻaki, naʻá ku ongoʻi faivelenga, pea naʻá ku ʻilo naʻá ku fakahoko e ngāue ʻa e ʻEikí. Naʻá ku ongoʻi ofi ange kiate Ia ʻi heʻeku ngāue Maʻaná.
Naʻe tokonia au ʻe he aʻusia ʻo ʻeku ongoʻi e toʻukupu ʻo e ʻEikí ʻo fakafou ʻi heʻeku kau takí mo e ngaahi fatongiá, ke fakaloloto ange hoku vā fetuʻutaki fakatāutaha mo Iá. Naʻá ku loto ke u faivelenga ange ʻi he ongoongoleleí; ʻi heʻeku peheé, naʻá ku ongoʻi e ʻafio ʻa e ʻOtuá ʻi heʻeku moʻuí. ʻOku kau hono fakatupulaki e faʻahinga vā fetuʻutaki peheni mo Iá ko ha taha ʻo e ngaahi meʻa mahuʻinga taha te ke lava ʻo fai ʻi hoʻo kei talavoú.
Ko e Vakai ki he ʻEikí ʻi Hoʻo Kau Takí
ʻI heʻeku fetaulaki mo ʻeku palesiteni fakakoló, naʻá ku ongoʻi ha ueʻi fakalaumālie mahulu hake ʻi he taimi naʻá ku ongoʻi ai ko e ʻEikí, kae ʻikai ko ʻeku palesiteni fakakoló, naʻá Ne ʻomi ʻa e fatongiá. ʻI heʻeku vakai ki he ʻEikí ʻi heʻeku takí, naʻá ku ongoʻi ofi ange ai kiate Ia, pea naʻe fakamālohia hoku vā fetuʻutaki mo Iá.
Kapau ʻe mahino kiate koe ʻi hoʻo kei talavoú ʻi he taimi ʻoku ʻoatu ai ha uiuiʻi kiate koe pe ʻi he taimi ʻokú ke tangutu ai ʻi hoʻo kalasí ʻi he lotú, ʻokú ke fanongo ki he ngaahi folofola ʻa e Tamai Hēvaní mo Sīsū Kalaisí, te ke lava leva ʻo vakai ki he siasí ʻi ha founga kehe—ʻi ha founga fakalaumālie. Te ke loto ke ke faivelenga ʻi he ngāue ʻa e ʻEikí. Te ke lava ke fakalahi hoʻo ngaahi aʻusia fakalaumālié mo ongoʻi ofi ange ai kiate Ia ʻi he Sāpate kotoa.
Ko e Vakai ki he ʻEikí ʻi he Ngaahi Ouaú
Te tau lava foki ʻo fakatupulaki ha vā fetuʻutaki fakatāutaha mo e ʻEikí ʻaki ʻetau fakalāngilangiʻi Ia ʻi heʻetau kau ʻi he ngaahi ouau ʻo e ongoongoleleí. ʻI he taimi ʻoku tau kau ai ʻi he ngaahi ouaú—hangē ko e sākalamēnití—ʻoku tau ʻilo “ʻoku fakahā [ai] … e mālohi ʻo e anga faka-ʻOtuá” (T&F 84:20). ʻI heʻeku tufa e sākalamēnití, neongo ne u kei taʻu 12 pe 13, naʻá ku ongoʻi mālohi ko ha meʻangāue au ʻi Hono toʻukupú. Naʻá ku ongoʻi e ʻafio mo e mālohi ʻo e ʻOtuá ʻi he ngaahi ouau ko iá pea mo e mālohi faka-ʻOtua ʻi heʻeku moʻuí. Naʻe tokonia au ʻe he aʻusia toputapu ʻo e uike takitaha ʻi heʻeku vakai ki he ʻEikí ʻi he ouau ko ʻení ke fakamālohia ange hoku vā fetuʻutaki fakatāutaha mo e ʻEikí.
ʻOku ʻikai fakangatangata pē ʻeni ki hono tufa e sākalamēnití. Te tau lava foki ʻo ongoʻi e mālohi faka-ʻOtuá ʻi heʻetau maʻu e sākalamēnití ʻi he Sāpate kotoa pē. ʻI heʻetau maʻu e sākalamēnití, ʻoku ʻikai totonu ke tau toʻo maʻamaʻa pe tātaaitaha pe fakaai pē. ʻOku totonu ke tau fie maʻu ia mo mateuteu ke maʻu e sākalamēnití, ʻa ia te ne fakangofua kitautolu ke tau ongoʻi e mālohi faka-ʻOtuá ʻi heʻetau ngaahi moʻuí. ʻOku totonu ke tau fakaʻaongaʻi e sākalamēnití ko ha meʻangāue fakalaumālie mālohi ʻi hotau vā fetuʻutaki mo e ʻOtuá pea mo teuteuʻi kitautolu ki he ngaahi faingataʻa fakaʻaho ʻo e moʻuí.
Ko Ha Vā Fetuʻutaki Fakatāutaha Mālohi
Fili he taimí ni ke fakatupulaki ha vā fetuʻutaki fakatāutaha ʻoku mālohí mo e ʻEikí. Ko hoʻo ongoʻi ofi ange kiate Iá, ko e faingofua ange ia hoʻo ngāue Maʻaná.
ʻOku aʻu mai e toʻukupu ʻo e ʻEikí kiate kitautolu fakatāutaha. ʻOku tau fanongo ki Heʻene folofolá ʻi heʻetau ʻalu ki he lotú. ʻOku tau fakakakato ʻEne ngaahi ouau toputapú ʻi heʻetau maʻu e sākalamēnití. ʻOku fie maʻu ke tau ʻiloʻi e ʻafio mo e mālohi ʻo e ʻOtuá ʻi hotau kau takí pea mo e ngaahi ouaú kae lava ke tau fakamālohia hotau vā fetuʻutaki fakatāutaha mo Iá.