Manatu Maʻu Ai Pē Kiate Ia

Fai ʻe Palesiteni Henry B. Eyring

Tokoni ʻUluaki ʻi he Kau Palesitenisī ʻUluakí

Te ke lava ʻo sioloto mo au ki hono tohi ʻe he palōfita ko Molonaí e ngaahi lea fakaʻosi ʻo e Tohi ʻa Molomoná ʻi he ʻū lauʻi peleti koulá? Naʻá ne toko taha pē. Kuó ne ʻosi kikite ki he ʻauha hono fonuá, hono kakaí, mo hono fāmilí. Naʻe “hokohoko atu ai pē” ʻa e taú ʻi he funga ʻo e fonuá (Molomona 8:8). Ka naʻá ne kei maʻu pē ha ʻamanaki lelei, he naʻá ne ʻosi kikiteʻi hotau kuongá! Pea ʻi he kotoa ʻo e ngaahi meʻa naʻá ne mei tohí, naʻá ne fakaafeʻi kitautolu ke tau manatu (vakai, Molonai 10:3).

Naʻe manako ʻa Palesiteni Sipenisā W. Kimipolo (1895–1985) ʻi hono akoʻi ko e foʻi lea mahuʻinga taha ʻi he tikisinalé ko e manatuʻí. Koeʻuhí kuo tau fakahoko ha ngaahi fuakava mo e ʻOtuá, naʻá ne pehē, “ko hotau tufakanga mahuʻinga tahá ke manatuʻi” kinautolu.¹

ʻE lava ke ke maʻu ʻi he folofolá ʻa e foʻi lea manatuʻí. Naʻe faʻa fakaafeʻi ʻe Nīfai hono ngaahi tokouá ʻi he taimi naʻe naʻinaʻi ai kiate kinautolú, ke nau manatuʻi e ngaahi folofola ʻa e ʻEikí pea mo manatuʻi hono fakahaofi ʻe he ʻOtuá ʻenau ngaahi kuí (vakai, 1 Nīfai 15:11, 25; 17:40).

Naʻe fakaʻaongaʻi tuʻo fitu ʻe he Tuʻi ko Penisimaní ʻa e foʻi lea manatuʻí ʻi heʻene lea fakamāvaé. Naʻá ne ʻamanaki lelei ʻe manatuʻi ʻe hono kakaí e “māfimafi ʻo e ʻOtuá … mo ʻene angaleleí mo e kātaki fuoloa” kiate kinautolú (Mosaia 4:11; vakai foki, 2:41; 4:28, 30; 5:11–12).

Naʻe fakaafeʻi ʻe he Fakamoʻuí ʻEne kau ākongá ʻi Heʻene fokotuʻu ʻa e sākalamēnití, ke nau maʻu e fakaʻilongá “[ko ha] fakamanatu” ʻo ʻEne feilaulaú (Luke 22:19). ʻI he lotu sākalamēniti kotoa pē ʻoku tau fanongo ki aí, ʻoku muʻomuʻa maʻu pē e foʻi lea manatú ʻi he foʻi lea maʻu ai peé (vakai, T&F 20:77, 79).

Ko ʻeku pōpoakí ko ha fakaafe, naʻa mo ha kole, ke manatuʻi. Ko ha ngaahi fokotuʻu eni ʻe tolu fekauʻaki mo e ngaahi meʻa te ke lava ʻo manatuʻi ʻi he uike takitaha, ʻi hoʻo maʻu e ongo fakaʻilonga toputapu ʻo e sākalamēnití. Fakatauange ʻokú na ʻaonga kiate koe ʻo hangē ko ʻena ʻaonga kiate aú.

Manatu kia Sīsū Kalaisi

ʻUluakí, manatuʻi e Fakamoʻuí. Manatuʻi pe ko hai Ia ʻi Heʻene ʻi he māmaní, anga ʻEne folofola ki he niʻihi kehé, mo e founga naʻá Ne fakahaaʻi ai ʻi Heʻene ngaahi ngāué ʻa e manavaʻofá. Manatuʻi ko hai naʻá Ne feohi mo iá pea mo e meʻa naʻá Ne akoʻí. Naʻe “faʻa feʻaluʻaki [ʻa e Fakamoʻuí] ʻo fai lelei” (Ngāue 10:38). Naʻá Ne ʻaʻahi ki he mahakí. Naʻá Ne tukupā ke fakahoko e finangalo ʻo ʻEne Tamaí.

Kae mahulu atu aí, ʻoku lava ke tau manatuʻi e feilaulau lahi naʻá Ne fakahoko ʻi Heʻene ʻofa ʻiate kitautolú, ke toʻo e ʻuli ʻo ʻetau ngaahi angahalá. ʻE tupulaki ʻetau holi ke muimui ʻiate Iá ʻi heʻetau manatuʻi Iá. Te tau fie angaʻofa ange, kātaki lahi ange, mo loto fiemālie ange ke fekumi ki he finangalo ʻo e ʻOtuá pea fai ia.

Manatuʻi e Meʻa ʻOku Fie Maʻu Ke Ke Fakaleleiʻí

ʻOku faingataʻa ke tau fakakaukau ki he Fakamoʻuí—ki Heʻene haohaoá—taʻe-te tau fakakaukau ki heʻetau ngaahi fehalaakí mo e taʻe-haohaoá. Kuo tau fakahoko ha ngaahi fuakava ke talangofua ki Heʻene ngaahi fekaú, ka ʻoku tau faʻa tōnounou mei he tuʻunga moʻui māʻolunga ko ʻení. Ka naʻe ʻafioʻi ʻeni ʻe he Fakamoʻuí, ko e ʻuhinga ia naʻá Ne fokotuʻu ai e ouau ʻo e sākalamēnití.

Kuo tupu e sākalamēnití mei he ngaahi founga fai feilaulau ʻi he Fuakava Motuʻá, ʻa ia naʻe kau ai e vete angahalá (vakai, Levitiko 5:5). ʻOku ʻikai ke tau toe fai feilaulauʻaki e fanga manú, ka te tau kei lava ʻo siʻaki ʻetau ngaahi angahalá. ʻOku ʻasi ʻi he folofolá ko ha feilaulau ʻeni ʻo e “loto-mafesifesi mo e laumālie fakatomalá” (3 Nīfai 9:20). Haʻu ki he sākalamēnití mo ha loto fakatomala (vakai, T&F 59:12; Molonai 6:2). ʻI hoʻo fai iá, te ke maʻu ha fakatomala ʻo hoʻo ngaahi angahalá pea he ʻikai te ke hē mei he hala foki ki he ʻOtuá.

Manatuʻi e Fakalakalaka ʻOkú ke Fakahokó

ʻI hoʻo sivisiviʻi hoʻo moʻuí lolotonga e ouau ʻo e sākalamēnití, fakatauange ʻoku nofo taha hoʻo fakakaukaú he ngaahi fehalaaki kuó ke fakahokó kae pehē foki ki he ngaahi meʻa kuó ke fakahoko totonú—ʻa e ngaahi taimi kuó ke ongoʻi ai naʻe hōifua ʻa e Tamai Hēvaní mo e Fakamoʻuí kiate koe. Te ke lava foki ʻo fakaʻaongaʻi ha kiʻi taimi lolotonga e sākalamēnití ke kole ai ki he ʻOtuá ke tokoniʻi koe ke ke ʻiloʻi e ngaahi meʻa ko ʻení. Kapau te ke fai ia, ʻoku ou palōmesi atu te ke ongoʻi ha meʻa. Te ke ongoʻi ha ʻamanaki lelei.

ʻI he taimi naʻá ku fakahoko ai ʻení, naʻe toe fakapapauʻi mai ʻe he Laumālié kiate au neongo ʻeku kei taukakapa ke haohaoá, ʻoku ou lelei ange he ʻahó ni ʻi he ʻaneafí. Pea ʻoku ou maʻu ai ha loto-falala ʻe lava ke u lelei ange ʻapongipongi, koeʻuhí ko e Fakamoʻuí.

Ko ha taimi fuoloa ʻa e maʻu peé, pea ʻokú ne fokotuʻu mai ʻa e feinga mateakí. Kuó ke ʻilo mei hoʻo aʻusiá hono faingataʻa ke te kei fakakaukau lelei ki he meʻa tatau ʻi he taimi kotoa pē. Ka neongo pe ko e hā hono lelei hoʻo tauhi hoʻo ngaahi palōmesi ke manatuʻi maʻu pē Iá, ʻokú Ne manatuʻi maʻu pē koe.

ʻOku ʻafioʻi ʻe he Fakamoʻuí ho ngaahi faingataʻaʻiá. ʻOkú Ne ʻafioʻi e tuʻunga faingataʻa ko hono lōmekina ʻaki koe e ngaahi fie maʻu ʻo e māmaní. ʻOkú Ne ʻafioʻi hoʻo fie maʻu vivili ʻa e tāpuaki ʻoku maʻu mei hono manatuʻi maʻu pē Iá mo e talangofua kiate Iá—“ke ʻiate [koe] maʻu ai pē ʻa hono Laumālié” (T&F 20:77; tānaki atu hono fakamamafaʻí).

Ko ia, ʻokú Ne talitali maʻu pē koe ki he tēpile sākalamēnití ʻi he uike takitaha, ʻo toe foaki atu ai e faingamālie ke ke fakamoʻoni ʻi Hono ʻaó te ke manatuʻi maʻu ai pē Ia.