“ʻOku ou tui ʻoku fakakaukau ʻa e kāingalotu tokolahi ko e ngāue tokoní ko ha konga mahuʻinga ia ʻo ʻenau ngaahi fuakavá mo e tuʻunga fakaākongá. Ka ʻoku ou toe fakakaukau foki ʻoku faingofua ʻi he taimi ʻe niʻihi ke mole meiate kitautolu ha ngaahi faingamālie maʻongoʻonga ke tokoni ai ki he niʻihi kehé, he ʻoku tau femoʻuekina ʻi hono kumi ha ngaahi founga lalahi ange ke liliu ai ʻa e māmaní pea ʻikai ai ke tau ʻiloʻi ko e niʻihi ʻo e ngaahi fie maʻu mahuʻinga te tau lava ʻo fehangahangai mo iá ʻoku ʻi hotau ngaahi fāmilí, kaungāmeʻá, uōtí mo hotau koló tonu pē. ʻOku ongo ki hotau lotó ʻa e taimi ʻoku tau mamata ai ki he mamahi mo e faingataʻaʻia ʻa ha niʻihi ʻoku nofo mamaʻo meiate kitautolu, kae hili ange ko iá ʻoku ʻikai ke tau lava ʻo sio ʻoku ʻi ai ha taha ʻokú te tangutu fakataha mo ia ʻi he kalasí ʻokú ne fie maʻu ʻetau feohi fakakaumeʻá. …
“… Mahalo ne ʻomi ʻe he Tamai Hēvaní e kakai ʻoku nau fie maʻu taha kitautolú, ke nau ofi taha mai, he ʻokú Ne afioʻi ko e lelei taha kitautolu ki hono feau ʻenau ngaahi fie maʻú.”
“Ko e fē leva e taimi mo e founga ʻoku maʻu ai e ueʻi fakalaumālie ki he lea ʻo e konifelenisi lahí?
“ʻOku ʻikai vahe e ngaahi tefitó ia, ka ʻoku tau mātā hono fakafekauʻaki ʻe langi e ngaahi taumuʻá mo e kaveinga ʻo e moʻoni taʻengata takitaha ʻi he konifelenisi kotoa pē.”
ʻEletā Neil L. Andersen ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko e Leʻo ʻo e ʻEikí Liahona, Nōvema 2017, 123.
“ʻOku ou tui ki [he] haohaoa [ʻa e ʻOtuá], pea ʻoku ou ʻilo ko ʻEne fānau fakalaumālie kitautolu mo ha ivi fakalangi ke hoko ʻo tatau mo Ia. ʻOku ou ʻiloʻi foki ʻi heʻetau hoko ko e fānau ʻa e ʻOtuá, ʻoku ʻikai totonu ke tau fakasiʻia pe tukuhifo pē kitautolu, ʻo taku koā ʻe hanga ʻe heʻetau fai peheé ʻo ʻave kitautolu ki he tuʻunga ʻoku finangalo e ʻOtuá ke tau aʻusiá. ʻIkai! ʻOku ou ʻamanaki pē te tau loto fakatomala mo holi ke fakatupulaki maʻu pē ʻetau anga-māʻoniʻoní ʻi hotau lotó, ke tau lava ʻo tulifua ki ha taumuʻa ke fakalakalaka, ʻi ha founga he ʻikai kau ai haʻatau fai ha meʻa ʻe ola kovi ki hotau sinó, pe te tau ongoʻi mafasia mo holoki ai ʻetau ongoʻi lototoʻá.
Naʻe kole mai ʻa Molonai, “ʻIo, haʻu kia Kalaisi, pea hoko ʻo haohaoa ʻiate ia … .’ ʻOfa ki he ʻOtuá ʻaki homou iví, ʻatamaí, mo e mālohí kotoa pē, pea ʻe … tupu ʻi heʻene ʻaloʻofá ʻa hoʻomou haohaoa ʻia Kalaisí. ’ [Molonai 10:32 ; tānaki atu hono fakamamafaʻí]. Ko hotau ʻamanaki leleiʻanga pē ki ha haohaoa moʻoní, ko ʻetau maʻu ia ko ha meʻafoaki mei he langí. ʻOku ʻikai ke tau lava ʻo ʻngāueʻi’ ia. Ko ia, ʻoku ʻikai ngata pē ʻi hono foaki mai ʻe he ʻaloʻofa ʻa Kalaisí ʻa e fakamoʻui mei he mamahí mo e angahalá pea mo e maté, ka ʻoku fakahaofi ai foki kitautolu mei heʻetau toutou fakaangaʻi pē kitautolú.”
ʻEletā Jeffrey R. Holland ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko Ia Ke Haohaoa ʻA Kimoutolu Liahona, Nōvema 2017, 40, 41.
“Talu mei he fakaafe ne fai ʻe Palesiteni Monisoni he māhina ʻe ono kuo hilí [ke ako mo fakalaulauloto ki he Tohi ʻa Molomoná], mo ʻeku feinga ke muimui ki heʻene faleʻí. Ne u lisi e ngaahi meʻa kau ki he Tohi ʻa Molomoná, meʻa ʻokú ne fakapapauʻí, meʻa ʻokú ne fakataʻeʻaongaʻí, meʻa ʻokú ne fakakakató, meʻa ʻokú ne fakamaʻalaʻalá, mo e meʻa ʻokú ne fakahaaʻí . Ko ha meʻa fakamāfana mo fakafiefia hono vakaiʻi e Tohi ʻa Molomoná he founga ko ʻení! ʻOku ou fokotuʻu atu ke ke fai ia. [Vakai ki he fakaʻosinga ʻo e lea ʻa Palesiteni Nalesoní ki he lisi naʻá ne fakatahatahaʻí.] …
“[Fakakaukau ki he ngaahi fehuʻi ko ʻení:] ʻUluakí, naʻe mei fēfē nai hoʻo moʻuí, kapau naʻe ʻikai e Tohi ʻa Molomoná? Uá, ko e hā naʻe ʻikai ke ke mei ʻiló? Pea tolú, ko e hā naʻe ʻikai ke ke mei maʻú? …
ʻOku ou ʻilo ko Palesiteni Tōmasi S. Monisoní, ko e palōfita ia ʻa e ʻOtuá he māmaní he ʻahó ni. ʻOku ou ʻofa mo poupouʻi ia ʻaki hoku lotó kotoa.”