Ko ha Tāpuaki ʻo e Fakafiemālié
Sarah Bieber
Calgary, Alberta, Canada
Tā fakatātāʻi ʻe Allen Garns
ʻI he taimi naʻe mahino ai ʻoku kanisā ʻeku tangataʻeikí, naʻe pehē mai ʻe heʻeku fineʻeikí ʻi he loto-foʻi, “Mahalo he ʻikai ke tau maʻu ʻetau maná.” ʻI he momeniti ko iá, naʻá ku ongoʻi ʻe maʻu ʻe homau fāmilí ha mana, neongo kapau naʻe ʻikai kau ai e moʻui fuoloa ʻeku tangataʻeikí.
Naʻe hoko ha mana ʻi ha pongipongi ʻe taha ʻi he ʻeke mai ʻe hoku kaungāmeʻa ko Petí ʻeku ngaahi palani ki he ʻaho ko iá. Ne u talaange kiate ia naʻá ku palani ke u ʻalu ʻo nofo mo ʻeku tangataʻeikí ʻi falemahaki, ka ʻoku ʻikai lava mai e tokotaha naʻá ku fokotuʻutuʻu ke ne tokangaʻi ʻeku fānaú. Naʻe angaʻofa ʻa Peti ke ne tokangaʻi ʻeku fānaú kae lava ke u ʻalu ʻo nofo mo ʻeku tangataʻeikí. Naʻá ne toe loto foki ke ʻave ha meʻatokoni efiafi ki hoku fāmilí. Naʻá ku houngaʻia ʻaupito.
ʻI heʻeku aʻu atu ki he falemahakí, naʻe ʻikai maʻu ʻe heʻeku tangataʻeikí ha ivi ke ʻāʻā pe maʻu ha meʻatokoni. Kae hili pē ha kiʻi taimi siʻi naʻá ne ongoʻi ha fuʻu tupulaki lahi ʻi hono iví. Naʻe laka hake ʻi he houa ʻe faá ʻene ʻāʻā leleí, pea naʻá ma talanoa pea aʻu ʻo ma toutou lue takai ʻi hono uooti ʻi he falemahakí. Naʻe ʻikai ha toe tokotaha ʻe ʻaʻahi mai he taimi ko ʻení. Naʻe tāpuekina au ke u maʻu e faingamālie ko ʻení.
Naʻá ma kakata mo tangi fakataha ʻi he ʻaho ko iá. Naʻe vahevahe mai ʻe heʻeku tangataʻeikí ʻene ongo fekauʻaki mo e mavahe mei he moʻui ko ʻení pea mo e meʻa naʻe mahuʻinga taha kiate iá—ko ʻene fakamoʻoni ki he ongoongolelei ʻo Sīsū Kalaisí. ʻOku kau e efiafi ko iá ʻi he ngaahi manatu melie mahuʻinga taha ʻo ʻeku moʻuí. Naʻá ne mālōlō hili ha ʻaho ʻe tolu mei ai.
Naʻá ku toki fakatokangaʻi hili ha uike ʻe taha mei he meʻafakaʻeikí ko e taimi fakaʻosi naʻá ku talanoa ai mo ʻeku tangataʻeikí ʻa e efiafi naʻe tokangaʻi ai ʻe Peti ʻeku fānaú. Naʻá ku ʻīmeili kia Peti mo e loʻimataʻiá, ʻo fakamālō kiate ia ʻi heʻene tokoní mo fakamatalaʻi ange hono mahuʻinga fau kiate aú.
Naʻe tali mai ʻe Peti, “ʻOku ou maʻu ha fakamoʻoni ʻoku finangalo ʻa e ʻOtuá ke foaki mai kiate kitautolu e ngaahi tāpuaki ʻo e fakafiemālié mo e ʻaloʻofá—tautautefito ki he taimi ʻoku tau foua ai ha faʻahinga meʻa faingataʻa. Kuó u lotua ha fakafiemālie maʻau mo ho fāmilí lolotonga e taimi ko ʻení.”
Naʻá ku ongoʻi naʻe ueʻi ʻe he ʻOtuá ʻa Peti ke hoko ko e tāpuaki naʻá ne lotua ke u maʻú. ʻOku ou ʻilo ʻoku foaki mai ʻe he ʻOtuá maʻatautolu ha ngaahi tāpuaki fakafiemālie lolotonga e ngaahi taimi faingataʻa ʻo ʻetau moʻuí.