Ko ʻEku Ngāue Fakafaifekau ki Hoku Fāmilí
ʻOku nofo ʻa e tokotaha naʻá ne faʻú ʻi Siuauá ʻi Mekisikou.
Naʻe ongo kiate au e fehuʻi ʻa ʻeku palesiteni fakamisioná—ko e hā kuo fakangofua ai koe ʻe he ʻEikí ke fakaʻosi hoʻo ngāue fakafaifekaú?
ʻI he taimi naʻá ku fakaava ai hoku uiuiʻi fakafaifekaú, naʻá ku ʻohovale he sio kuo vahe au ki he Misiona Mexico Veracruz. Naʻe nofo hoku fāmilí ʻi Velakulusi ʻi he taimi naʻe fānauʻi ai aú, pea ʻoku nofo ai ha konga lahi ʻo hoku kāingá. Ko kimautolu pē ʻi homau fāmilí ʻoku kau ki he Siasí, ko ia naʻá ku fiefia ʻi heʻeku fakakaukau atu ki he faingamālie ke vahevahe e ongoongoleleí mo hoku kāingá.
Ka neongo iá, naʻe teʻeki tuʻo taha haʻaku ngāue ki ha ʻēlia ʻe ofi ki hoku kāingá. Naʻá ku ʻoange honau tuʻasilá ki hoku ngaahi hoá koeʻuhí ke nau ʻaʻahi kiate kinautolu.
Hili ha māhina ʻe 15 ʻeku ngāue fakafaifekaú, naʻe kamata ke palopalema hoku foʻi tuí. Naʻe fuʻu mamahi ʻaupito hoku tuí pea naʻe kātakiʻi ngataʻa ʻi ha ngaahi taimi ʻe niʻihi. ʻI heʻeku ʻalu ki he toketaá, ko ʻene aofangatukú pē ko hono tafa. Naʻe ʻuhinga ia te u foki ki ʻapi kimuʻa ʻi hoku taimi ʻosí. Naʻe ʻikai ke u tui ʻoku hoko ʻeni; ʻoku toe pē hoku māhina ʻe tolu ʻi he ngāue fakafaifekaú.
Naʻá ku tafoki ki he ʻEikí ʻo kolea ha fakafiemālie mo ha mana, kapau ʻe faʻa lava. ʻI he tali ki heʻeku lotú, naʻá ku ongoʻi ha nonga ʻi hoku lotó. Naʻe poupouʻi au ʻe he hoa ʻo ʻeku palesiteni fakamisioná ʻi ha ongo ʻofa fakafaʻē moʻoni ke u foki ki ʻapi ʻo fakaakeake, pea naʻá ku tohi ki hoku fāmilí ke talaange kiate kinautolu te u foki atu ki ʻapi ʻi ha uike ʻe ua.
Hili iá, naʻá ku ʻinitaviu mo ʻeku palesiteni fakamisioná. Naʻá ne talamai naʻe fetuʻutaki ange ʻeku faʻeé ʻo fokotuʻu ange ha fakakaukau: ʻE lava ke haʻu ki Velakulusi ʻo tokangaʻi au lolotonga ʻeku fakaakeaké ʻi he ʻapi ʻo hoku mehikitangá mo haʻaku faʻētangata, koeʻuhí he kuo pau ke kiʻi taʻofi fakataimi ʻeku ngāue fakafaifekaú. Naʻe talamai ʻe heʻeku palesitení ʻe lava ke hoko e fakakaukau ko iá ka kuo pau ke kole ke fakangofua mai.
ʻI he taimi naʻá ku ʻilo ai kimui kuo tali e kole ko iá, naʻe hākahaka hoku lotó ʻi he fiefiá—te u lava ʻo fakaʻosi ʻeku ngāue fakafaifekaú! Naʻá ku fai ha lotu fakafetaʻi.
Naʻe talamai ʻe heʻeku palesiteni fakamisioná ʻi he ʻaho naʻe tafa ai aú, “Sisitā Kōmesi, ʻoku fie maʻu ke ke ʻilo e ʻuhinga naʻe fakaʻatā ai koe ʻe he ʻEikí ke ke nofo ʻi Velakulusí.” Mei he momeniti ko iá, naʻá ku fakapapau ke kumi ʻa e ʻuhingá.
ʻI he ʻaho tatau, naʻe talamai ʻe heʻeku faʻeé ʻa ia kuo tūʻuta mai ki Velakulusí, “ʻOku haʻu hoʻo kui fefine ko Litá (faʻē ʻeku tamaí) ki he falemahakí ke vakai koe. Ko ha faingamālie fakaʻofoʻofa ʻeni ke ke fakaʻekeʻeke ia fekauʻaki mo hoʻo ngaahi kuí.”
“Ko ha fakakaukau fakaʻofoʻofa ia!” Ko ʻeku fakakaukaú ia. Naʻe ʻikai ke u faʻa tatali ke fakaʻekeʻeke hoku kāingá fekauʻaki mo ʻeku ngaahi kuí. Naʻe ʻeke mai ʻe heʻeku kui ko Litá e ʻuhinga ʻo e hoko ko ha faifekaú. Naʻá ku akoʻi ia fekauʻaki mo e Fakafoki Mai ʻo e Ongoongoleleí peá u talanoa ange leva fekauʻaki mo e palani ʻo e fakamoʻuí, koeʻuhí kuo mate ʻeku kui tangatá—hono husepānití—ʻi ha ngaahi taʻu siʻi kimuʻa. Naʻá ne fai mai leva ha fehuʻi naʻá ku fakaʻamu te ne ʻeke mai: “Te u lava nai ʻo toe sio ki hoku ʻofaʻangá?”
Naʻá ku fiefia ʻi heʻene fehuʻí, peá u tali ange, “ʻIo, te ke lava!” Naʻá ne fofonga fiefia. Naʻe fakafiefia ʻaupito ʻeku vahevahe mo ia e moʻoni taʻengata ko iá. Naʻe toe lahi ange e ngaahi fehuʻí, ne nau nofotaha kotoa pē ʻi he palani ʻo e fakamoʻuí. Naʻá ku ʻeke ange leva ʻeku ngaahi fehuʻi fekauʻaki mo hoku fāmilí ke u lava ʻo fakafonu ʻeku tohi hohokó. Naʻá ku ongoʻi hono fakaʻatā ia ʻe he Laumālié ke ne maʻu ha mahino ki he palani ʻo e fakamoʻuí.
Kimui ange ʻi he ʻaʻahi mai e toenga ʻo hoku kāingá, naʻá ku talanoa mo e fineʻeiki ʻa ʻeku faʻeé, ʻa ia naʻá ne tokoni mai ke u maʻu mo ha ngaahi hingoa fakafāmili lahi ange. Naʻá ku lava foki ʻo vahevahe e ongoongoleleí mo kinautolu kotoa naʻe ʻaʻahi maí.
Naʻá ku toki ʻiloʻi e ʻuhinga naʻe fakaʻatā ai au ʻe he ʻOtuá ke u fuofua ʻalu ki Velakulusi ʻi heʻeku ngāue fakafaifekaú pea ke u nofo ai hili hoku tafá. Naʻá ku foki ki he ngāue fakafaifekaú kuó u manako ʻaupito ʻi he hisitōlia fakafāmilí. Fakamālō ki he loto-ʻofa ʻa ʻeku faʻeé naʻá ku lava ai ʻo fakakakato ʻeku ngāue fakafaifekaú.
Naʻe mālōlō e faʻé ʻeku tamaí hili ha taʻu ʻe taha, ʻa ia naʻá ku fuʻu loto mamahi ʻaupito ai. ʻI he tafaʻaki ʻe tahá, naʻá ku ongoʻi houngaʻia mo fiefia te u lava ʻo fakahoko ha ngāue fakatemipale kiate ia hili ha taʻu ʻe taha mei ai. ʻI heʻeku papitaiso maʻaná, naʻe ʻikai ke u lava ʻo pukepuke hoku loʻimatá ʻi heʻeku fiefiá. Kuo faifai peá ne lava ʻo fakataha mo hono ʻofaʻangá, ʻa ia kuo laka hake he taʻu ʻe 60 ʻene mali ki aí.
ʻOku ʻikai ke u toe veiveiua ʻoku ʻafioʻi ʻe he ʻEikí hotau ngaahi lotó. Naʻá ne fakangofua au ke u nofo ʻi Velakulusi ke akoʻi hoku fāmilí mo fakahā ange e ngaahi ongoongolelei kuo ʻomi ʻe hotau Huhuʻi, ko Sīsū Kalaisí. ʻOku ou ʻilo te u toe lava ʻo sio ki heʻeku ngaahi kuí ʻi ha ʻaho. Ko hotau fatongiá ia ke tau fakahoko e ngaahi ngāue maʻa ʻetau ngaahi kuí koeʻuhí ʻe folofola mai e ʻOtuá ʻi ha ʻaho, “Haʻu kiate au, ʻa koe ʻoku monūʻia, ʻoku ʻi ai ha potu kuo teuteu moʻou ʻi he ngaahi nofoʻanga ʻo ʻeku Tamaí” (ʻĪnosi 1:27).