Ngaahi Tefitoʻi Moʻoni ʻo e Faiako ʻAʻahí

Feinga ke Maheni mo Ia mo Hono Fāmilí

ʻOku fekauʻaki moʻoni ʻa e faiako ʻaʻahí mo e feinga ke maheni mo ʻofa ʻi he fineʻofa takitaha kae lava ke tau tokoni ke fakamālohia ʻene tuí mo fai ha ngāue tokoni.

Kuo hoko ʻa Lita Sepesoni mo ʻene faiako ʻaʻahí ko ha ongo kaungāmeʻa lelei ʻi heʻena fetaulaki mo vahevahe e ngaahi talanoa ʻo e ongoongoleleí. Ka ʻoku kau foki ʻi heʻena faʻa ʻaʻahí haʻana vaʻinga fakataha ʻi ha ngaahi keimi lea, ʻa ia ʻoku tokoni ke masila ai e ʻatamai ʻo Litá. Koeʻuhí he kuo ako ʻe heʻene ongo faiako ʻaʻahí ʻa e meʻa ʻoku fiemaʻu mo fiefia ai ʻa Litá, ʻokú na hanga fiefia atu ki he ʻaʻahi takitaha. ʻOku lahi ha ngaahi meʻa ʻe lava ke fai ʻe he kau fineʻofá lolotonga ha ʻaʻahi, hangē ko e luelue fakataha pe tokoniʻi ha fineʻofa ʻi heʻene ngaahi ngāue.

Naʻe fakahaaʻi ʻe Lusi Meki Sāmita, faʻe ʻa e Palōfita ko Siosefa Samitá, ʻene ongó ʻi he 1842, fekauʻaki mo e ongo fakatokoua ʻa e kau fefine ʻo e Ngaahi ʻAho Kimui Ni ʻi he kautaha foʻou kuo fokotuʻu ʻa e Fineʻofá. Naʻa ne pehē, “Kuo pau ke tau fefakahoungaʻaki, fefakafiemālieʻaki pea maʻu mo e ngaahi fakahinohino ko ē te tau lava ʻo nofo fakataha ai ʻi he langí.”¹ ‘Oku kei mo’oni ia ‘o a’u mai ki he ‘ahó ni.

Naʻe pehē ʻe ʻEletā Jeffrey R. Holland ʻo e Kōlomu ʻo e Kau ʻAposetolo ʻe Toko Hongofulu Mā Uá: “… Mou hoko ai ko ha kau fakafofonga ʻo e ʻEikí ki Heʻene fānaú. Ka ʻoku mau ʻamanakí, te mou fokotuʻu ha tokanga fakamatoato ʻoku fakatefito he ongoongoleleí, ki he kāingalotú, ʻo tokangaʻi pea mou fetauhiʻaki mo feau e ngaahi fie maʻu fakalaumālie mo fakatuʻasinó ʻi he lelei taha te mou lavá.”²

Naʻe folofola ʻa e ʻEikí ki he fānau ʻa ʻIsilelí ʻo fakafou ʻia Mōsese, “ko e muli ʻoku nofo mo koé ʻe tatau ia mo e tokotaha kuo tupu ʻiate kimoutolu, pea te ke ʻofa kiate ia ʻo hangē ko hoʻo ʻofa kiate koé” (Levitiko 19:34). Mahalo ko ha kau “muli” e kau fineʻofa ʻoku tau faiako ʻaʻahi ki aí ʻi heʻetau fuofua ʻaʻahi kiate kinautolú, ka ʻi heʻetau maheni mo ia mo hono fāmilí, ʻe tupulaki ʻetau holi ke “fefuaʻaki ʻa [ʻetau] ngaahi kavengá, koeʻuhí ke nau maʻamaʻa” pea ke “taha [hotau] lotó ʻi he uouongataha mo e feʻofoʻofani” (Mosaia 18:8, 21).

Tuí, Fāmilí, Fakafiemālié

Maʻuʻanga Fakamatalá

1. Lusi Meki Sāmita, ʻi he Ngaahi ʻOfefine ʻi Hoku Puleʻanga: Ko e Hisitōlia mo e Ngāue ʻo e Fineʻofá (2015), 25.

2. Jeffrey R. Holland, “Kau Fakafofonga ʻo e Siasí,” Liahona, Nōvema 2016, 62.

Fakakaukau ki he Meʻá ni

ʻI he ngaahi fāmili ʻo e kau fineʻofa ʻokú ke faiako ʻaʻahi ki aí, ko e hā ha ngaahi meʻa he kahaʻú ʻoku totonu ke ke ʻilo ki ai mo manatuʻi?

Ngāue Fakatauhí

ʻE hoko ʻa e peesi ko ʻeni ke ne ʻomai ha tefitoʻi moʻoni kehe ʻi he mahina takitaha laka ange ia hano ʻomai ha popoaki pau, ke tokoniʻi kitautolu ke tau malanga ʻo toe lelei ange ki he tokotaha takitaha. ʻI hoʻo lotua mo fekumi ki he ueʻi fakalaumālié, te ke ʻiloʻi ai ʻa e pōpoaki fakalaumālie mo e ngāue tokoni ʻoku fiemaʻu ʻe he fefine takitaha.