Feinga Pē!

Fai ʻe ʻEletā Peter F. Meurs

ʻO e Kau Fitungofulú

“Kapau te nau fakavaivaiʻi ʻa kinautolu ʻi hoku ʻaó, pea tui kiate au, te u liliu ʻa e ngaahi meʻa vaivaí ko e mālohi kiate kinautolu” (ʻEta 12:27).

Naʻe kau ʻeku ongomātuʻá ki he Siasí ʻi heʻeku kei siʻí. Ne mau lotu ʻi ha kiʻi kolo siʻisiʻi ʻi ʻAositelēlia. Naʻe tā ʻe heʻeku faʻeé ʻa e pianó ʻi he lotú. Ka ko ha ngaahi himi pē ʻe niʻihi naʻá ne lava ʻo taá. Naʻá ku ako tā piano mo au. ʻI heʻeku kei taʻu fitú, naʻe kole mai ʻe he palesiteni fakakoló ke u tā piano ʻi he lotú.

Naʻe faʻa fehālaaki ʻeku tā pianó. Naʻá ku faʻa tangi ʻi he taimi naʻá ku fai ai ha fehalaakí. Naʻá ku mā mo ilifia. Ka naʻá ku kei ako pē. Naʻá ku loto ke u tā lelei e ngaahi himí. Kuó u manako ʻeni ʻi he tā pianó. ʻOku ou lava ʻo tā e ngaahi himí kotoa. Naʻá ku ngāue ki ha kiʻi kolo siʻisiʻi ʻe taha ʻi heʻeku kei ngāue fakafaifekau ʻi Nuʻu Silá. Naʻe ʻikai ha taha ke ne tā ʻa e pianó. Ko ia naʻá ku tā ai ʻa e ʻōkaní mo e pianó ʻi ha taʻu ʻe taha. Ko ha tāpuaki kiate au ʻeku lava ʻo ikunaʻi ʻeku ilifiá. Ne u lava ai ʻo tāpuekina e niʻihi kehé.

Naʻe faingataʻa foki kiate au ke u lava ʻo lea ʻi heʻeku kei siʻí. Naʻe nenu ʻeku leá. Naʻe faingataʻa ke vahevahe ʻeku fakamoʻoní ʻi muʻa ʻi he tokotaha kotoa pē. Naʻe iku ʻou tangi he taimi ʻe niʻihi ʻi heʻeku feinga ke leá. Naʻe foaki mai ha ngaahi tāpuaki lakanga fakataulaʻeiki ke tokoni kiate au. Naʻe fakalotolahi ʻaupito ʻeku ongomātuʻá. Ka naʻe tāpuekina au ke u lava ʻo lea mahino ange mo loto-toʻa ange.

ʻOku ou kei ilifia pē. Naʻe fakamanavahē ʻeku lue ki he tuʻunga malangá ke lea ʻi he konifelenisi lahí! Ka naʻe toka ai ha laumālie mālohi ʻaupito. Naʻá ku ongoʻi naʻe langaki hake au peá u nonga. Naʻe fakaofo ia.

Kapau ʻokú ke mā pe faingataʻa hoʻo feinga ke leá, feinga pē. Neongo kapau ʻe hokohoko atu hoʻo faingataʻaʻiá, ʻoku mau loto ke fanongo ki he meʻa ʻokú ke fie lea ki aí. ʻE lava ke ke tāpuekina ai ha kakai tokolahi ʻi he ngaahi meʻa ko koe pē te ke lava ʻo lea ʻakí!