Ko ha Lēsoni Fakaofo
Fai ʻe ʻEletā Valeri V. Cordón
ʻO e Kau Fitungofulú
“Te u fakaava ʻa e ngaahi matapā ʻo e langí … peá u lilingi hifo kiate kimoutolu ha tāpuaki” (Malakai 3:10).
ʻI heʻeku tupu hake ʻi Kuatemalá, naʻe ʻi ai ha fale ngāue hoku fāmilí ne ngaohi ai e teunga maʻá e ngaahi timi sipotí.
Naʻe fie maʻu ʻe heʻeku tangataʻeikí ke ako ʻe he fānau ʻi homau fāmilí ke ngāue mālohi. Naʻa mau tokoni kiate ia ʻi he fale ngāué. Naʻá ku matengataʻa ʻi heʻeku kei siʻí. Ne hangē naʻá ku maumauʻi maʻu pē ha meʻá! Ka ʻi heʻeku lahi haké, naʻe tuku mai ʻe heʻeku tangataʻeikí ke u tokangaʻi e ʻū mīsini nití.
Naʻe totongi ʻe heʻeku tangataʻeikí kimautolu ki he ngāue naʻa mau faí. Hili iá peá ne ʻeke mai, “Ko e hā hoʻo meʻa ʻe fai ʻaki hoʻo paʻangá?” Naʻá ku ʻilo ʻa e tali tonú: “Totongi ʻeku vahehongofulú mo fakahū ki heʻeku ngāue fakafaifekaú.”
ʻI hoku taʻu 13 nai, naʻe mole ha paʻanga lahi mei heʻemau pisinisí. Naʻe pau ke mau tuku atu ha ʻū mīsini tuitui lahi. Naʻe tokosiʻi ange ʻemau kau ngāué ʻi he toko nimá, ka naʻe faʻa toko uangeau. Naʻa nau ngāue pē ʻi he tauʻanga meʻalele ʻi homau ʻapí.
Naʻe totongi maʻu pē ʻeku vahehongofulú, ka naʻe ʻikai ke fuʻu mahino kiate au hono mahuʻingá. Pea naʻá ku ako ai ha lēsoni fakaofo. ʻI ha pongipongi Tokonaki ʻe taha naʻá ku ongoʻi ha talanoa leʻosiʻi ʻeku ongomātuʻá. Naʻe talaange ʻe heʻeku tangataʻeikí ki heʻeku fineʻeikí naʻe ʻi ai ha paʻanga feʻunga ke totongi e vahehongofulú pe fakatau ʻaki ha meʻatokoni. Naʻe ʻikai feʻunga ia ke maʻu lōua. Naʻá ku hohaʻa. Ko e hā nai ʻe fai ʻe heʻeku tangataʻeikí?
ʻI he ʻaho Sāpaté naʻá ku sio ki heʻeku tangataʻeikí ʻokú ne ʻoange ha sila ki he palesiteni fakakoló. Naʻá ne fili ke totongi vahehongofulu! Naʻá ku fiefia ʻi heʻene fai iá, ka naʻá ku toe hohaʻa foki. Ko e hā te mau kaí?
ʻI he pongipongi hono hokó, naʻe tukituki ha kakai ʻi homau matapaá. Naʻa nau talaange ki heʻeku tangataʻeikí naʻa nau fie maʻu ha ʻū teunga sipoti he vave tahá. Naʻe angamaheni ʻaki hono faʻa totongi kimautolu hili hono maʻu e meʻa naʻe kolé. Ka naʻe totongi ʻe he kakai ko ʻení ʻeku tangataʻeikí ʻi he ʻaho pē ko iá, kimuʻa pea toki ngaohi e ʻū teungá!
Naʻá ku ako ha lēsoni fakaʻofoʻofa ʻi ha fakaʻosinga uike pē ʻe taha, ne u manatua he toenga ʻo ʻeku moʻuí. ʻOku tokoniʻi kitautolu ʻe he fono ʻo e vahehongofulú ke langaki ʻetau tuí mo fakahā ʻetau houngaʻia ki he Tamai Hēvaní. Ko ha tāpuaki ʻa e totongi vahehongofulú.