Ko e hā ʻoku tuku ai ʻe he ʻOtuá ke hoko ʻa e taú?

Kuo hoko ʻa e taú ko ha konga ia ʻo e talanoa ʻo e faʻahinga ʻo e tangatá ʻi he māmani ko ʻení ʻo talu mei ha taimi siʻi pē mei he kamataʻangá. Ka ko e ʻEikí, ʻa e Pilinisi ʻo e Melinó, ʻoku ʻikai ke Ne fie maʻu ke tau fetauʻaki. ʻOkú Ne tutulu ʻi he taimi ʻoku fili ai e kakaí ke ʻoua te nau feʻofaʻaki pea “ʻikai haʻanau ʻofa, pea … fehiʻa ki honau toto ʻonautolú pē” (Mōsese 7:33), ʻo fakakoviʻi ʻa e māmaní ʻi he fetāʻaki (vakai, Sēnesi 6:11–13). Ko kinautolu ko ia naʻe ʻomi ʻe heʻenau faiangahalá ʻa e taú ki he māmaní, ʻe fakamāuʻi kinautolu ʻi heʻenau ngaahi ngāué.

Kuo ʻosi fekau ʻe he ʻEikí ʻa Hono kakaí ke “taʻofi ʻa e taú pea fakahā ʻa e melinó” (T&F 98:16). Ka neongo ia, ʻo ka fetauʻaki ha ongo puleʻanga, kuo ʻosi folofola mai foki ʻa e ʻEikí ʻoku fakatonuhiaʻi kitautolu he taimi ʻe niʻihi ʻi hono maluʻi hotau ngaahi fāmilí, puleʻangá, mo e tauʻatāiná mei he fakaʻauhá, pule fītaʻá, mo e fakamālohí (vakai, ʻAlamā 43:47; ʻAlamā 46:12–13; T&F 134:11). Pea ko e Kāingalotu ʻoku nau ʻi he ngāue fakakautau ʻa e puleʻangá, ʻoku nau talangofua ki he tefitoʻi moʻoni ʻo e “fakaongoongo ki he ngaahi tuʻi, kau palesiteni, kau pule, mo e kau fakamaau fakapuleʻanga” (Tefito ʻo e Tuí 1:12).