ʻOku ʻi ai ha meʻa ʻokú ke makehe ai

Fai ʻe Shenade Mataupu

ʻI heʻeku tupu hake ʻi he siasí, ne u hangē pē ko e fānau palaimeli tokolahi, ʻo ʻeke mai maʻu pē pe te u ʻalu ʻo ngāue fakafaifekau. Ne u faʻa tali vave ange maʻu pē (ʻo ʻikai toe momou) ʻio, pe hiki hoku nimá he kalasí ke fakahaʻi ʻeku loto fiemālie ke ngāué. Neongo naʻe ʻikai mahino kiate au e mahuʻinga moʻoni ʻo e ngāue fakafaifekaú, ka ko e talu mei heʻeku kei siʻi mo ʻeku ongoʻi ko e ui ke ngāué ko ha ui toputapu ia mei heʻetau Tamai Hēvaní. Naʻe hanga ʻe he ngaahi akonaki ʻo e ongoongoleleí ne fai mai ʻe heʻeku mātuʻa ʻofá mo e faʻifaʻitakiʻanga hoku ngaahi tokouá pea mo e fakalotolahi hoku kaungāmeʻa mamaé, ʻo fakalotoa au ʻo toe ʻāsili ai pē ʻeku fie ʻalu ʻo ngāue fakafaifekaú.

ʻI he fakalau atu e ngaahi taʻú, peá u hiki mei he kei siʻí ki he fatutangatá, naʻe kamata ke hōloa māmālie ʻeku loto fie ʻalu ʻo ngāue fakafaifekaú. Ko e meʻa ko ia ne u fuʻu tokanga taha ki ai ke u hoko ko ha faifekau taimi kakató, kuo hanga ʻe he ngaahi meʻa maumautaimi ia ʻo e māmaní ʻo tohoakiʻi atu ʻeku tokangá mei ai. Mahalo ko e naʻinaʻi ko ia ʻa ʻAlamā ko e siʻí ki hono foha ko Hilamaní, ko e akonaki ia te u fokotuʻu fakatāutaha atu maʻanautolu ʻoku fefaʻuhi mo e faʻahinga puputuʻu pe ongoʻi veiveiua peheé, “Fealeaʻaki mo e ʻEikí ʻi he meʻa kotoa pē te ke fai, pea te ne fakahinohinoʻi koe ʻi he meʻa ʻoku leleí” (ʻAlamā 37:37).

Hili e lotu lahi, ʻaukai mo e fakalaulauloto ki he finangalo ʻo e ʻEikí maʻakú, ne u pehē leva ke tukutaha hoku iví ke u toe fakatukupaaʻi au ke u ngāue fakafaifekau. Ko e siʻi taha au ʻi he fānau ʻe toko nima, mo ha ongomātuʻa lelei. Ko ʻeku tamaí ko Siaosi Mataupu naʻe ngāue fakafaifekau ia ʻi he Misiona Apia Samoa mei he 1977 ki he 1979, kae ngāue ʻeku faʻeé ko Ruth Mataupu ʻi Haʻamoa mei he 1985 ki he 1987. Naʻe ngāue hoku ongo tuongaʻané ko George mo Rober ʻi he Misiona Wellington New Zealand mei he 2008 ki he 2011, pea ngāue hoku tuofefina ko Gladys ʻi he Misiona Australia Brisbane Mission, pea ko Suliasi leva ʻa e siʻi taha he tamaiki tangatá, naʻe ngāue ia ʻi he Misiona Philippines Cebu East. ʻI heʻeku fakakaukau ki he ngaahi sīpinga ko ia ʻa e kau faifekau ʻosi mai ʻo hoku fāmilí, pea mo hoku kaungāmeʻá, naʻe kamata leva ke u ngāue ki heʻeku tohi kole ke u hoko ko ha faifekau taimi kakató. ʻI he ʻosi hono fakafonu ʻeku tohi kolé, ne u maʻu ʻi ha māhina ʻe taha mei ai ha uiuiʻi mei hotau Palōfita ʻofeina ko Thomas S. Monson, ke u ngāue ʻi he māhina ʻe 18 ʻi he Misiona Leeds.

ʻOku ou manatuʻi ʻeku hū ki he malaʻe ʻo e ngāue fakafaifekaú pea mahino māmālie kiate au ʻa e foʻi moʻoni, ko ʻIngilaní ko ha fonua muli ʻoku ʻikai ke u maheni ai mo ha taha pea ko hoku ʻapí ia ʻi he māhina ʻe 18 ka hokó. Neongo ʻa e ʻikai ke u maheni mo e ʻeá, tōʻonga moʻuí pea mo e feituʻú, ka ne u ʻiloʻi kuó u mateuteu ke fakahaofi moʻui. ʻI he ʻuluaki ʻaho ʻemau ngāué, ne u ʻā hake mo e loto vēkeveke ʻo fakatalanoa ki he taha kotoa. Ka ʻi he fakaʻau atu e ʻahó, pea lahi mo hono taʻe tali kimauá, ne kamata leva ke u ongoʻi lotofoʻi. Ne kamata leva ke mafuli e ongoʻi loto fakapapauʻí ia, ʻo hoko ko e veiveiua mo e ilifia. ʻOku ou manatuʻi ʻeku fakafehuʻia ʻeku ngaahi taumuʻá pe ʻoku ou feʻunga nai mo e faʻahinga ngāue ko iá. Ne u ongoʻi taʻelata ʻaupito.

ʻI he fakaofiofi ki he fakaʻosinga ʻo e ʻahó, ne mau foki ai mo hoku hoá mo ha ongo sisitā kehe ki homau ʻapi nofoʻangá. Ne mau fetaulaki he halá mo ha fefine talavou ko Maxine, naʻá ne pehē ʻokú ne ʻilo kimautolu mei haʻane fetaulaki mo ha kau faifekau kimuʻa. ʻI heʻemau talanoá, naʻe mahino kiate kimautolu kuó ne foua ha ngaahi faingataʻa lahi heʻene moʻuí, pea ko e konga lahi naʻá ne tukuakiʻi ai e ʻOtuá. Neongo naʻe ʻikai tala ʻe Maxine ia ko ha fefine lotu ia, ka naʻá ne fakamālō mai he ngāue ʻoku fai ʻe kimautolu kau faifekaú.

Ne u ongoʻi manavasiʻi, mā mo lotosiʻi pea ne u fakatoupīkoi pē ʻo siofi e talanoa e ongo faifekau hoa takí mo Maxine. Hili ha haafe houa mei heʻeku fakafanongo ki he talanoa hoku ongo hoá mo Maxine, ne u fakatokangaʻi ʻene tafoki ʻo sio mai kiate au lolotonga ʻenau talanoá. Neongo ne fakautuutu ʻeku ongoʻi lotosiʻí he lolotonga e ʻaho ko iá, ka naʻe tafoki ʻa Maxine ʻo lue mai mei heʻenau talanoá, ʻo haʻu pē ʻo tuʻu ʻi muʻa ʻiate au. ʻOku ou manatuʻi ʻeku pehē ange, “ʻOku ʻofa mo tokanga atu e ʻOtuá kiate koe”. Naʻá ne kiʻi tuʻu hifo peá ne lea mai ʻaki e meʻa naʻe fie maʻu ke u fanongo ki aí, pea he ʻikai toe ngalo ia ʻiate au. Naʻá ne pehē mai, “ʻoku ʻi ai ha meʻa ʻokú ke makehe ai, ʻoku ʻi ai ha meʻa makehe ʻokú ne tohoakiʻi mai au kiate koe”. Hili ha ʻaho fonu he loto veiveiuá, lotofoʻí mo e ilifiá, ne u ʻiloʻi naʻe fakafiemālieʻi au ʻe he Tamai Hēvaní ʻo fakafou ʻia Maxine. Ne u fakatokangaʻi he pō ko iá e ola ʻeku leá heʻeku pehē ange, “ʻOku ʻofa mo tokanga atu e ʻOtuá kiate koe”. Mahalo naʻá Ne fie maʻu ke mahino kiate au e meʻa tatau pē, he ʻokú Ne ʻofa mo tokanga mai kiate au. Mahalo ʻoku fie maʻu ke fakamanatu mai ʻoku ʻi ai ha meʻa ʻoku tau takitaha makehe ai, pea kuo pau ke tau moʻui ke hāsino mei heʻetau moʻuí hotau Fakamoʻui ko Sīsū Kalaisí.

“Ko e maama ʻo māmani ʻa kimoutolu. Ko e kolo ʻoku tuʻu ʻi ha moʻunga ʻoku ʻikai faʻa fakapuliki ia. … Pea ʻoku ʻikai tutu ha maama mo tuku ia ʻi he lalo puha fuá, ka ki he tuʻunga māmá; pea ʻoku ulo ia kiate kinautolu kotoa pē ʻoku ʻi he falé. Tuku ke ulo pehē hoʻomou māmá ʻi he ʻao ʻo e kakaí, koeʻuhí ke nau mamata ki hoʻomou ngaahi ngāue leleí, pea fakamālōʻia ʻa hoʻomou Tamai ʻa ia ʻoku ʻi he langí” (Mātiu 5:14–16)

Kuo hanga ʻe he meʻá ni mo ha ngaahi meʻa kehe, ʻo fakamahino kiate au ʻoku ʻikai ngata pē heʻetau malava ʻo ulo atú, ka ko hotau fatongiá foki ia. Ko hotau fatongiá ke ulo atu ke tau lava ʻo tokoni ki he kakai ʻoku tau feohí ʻo fakafou heʻetau tā sīpingá, kae lava ke tau fakamoʻoni ʻoku moʻui ʻa e ʻOtuá, ko e Kalaisí ʻa Sīsū, pea te tau lava ʻo hoko ko ha fuka ʻo e ʻamanaki leleí ʻi ha faʻahinga taimi pē ʻe ngali taumuʻa valea mo fakatuʻutāmaki.

Ko e Shenade Mataupu mei Haʻamoa, naʻe ngāue fakafaifekau ʻi he Misiona England Leeds mei Māʻasi 2016 ki ʻOkatopa 2017. ʻOku lolotonga nofo ʻi Mangere pea ʻoku ʻi he uooti Thomas Road, ʻi Manukau, Nuʻu Sila.

ʻOku ʻi ai haʻo talanoa ngāue fakafaifekau ʻokú ke fie vahevahe mai? ʻĪmeili kia Shilo ʻi he [e-mail]