Ko Hono ʻOhake ʻo e Toʻu Tangata kei Tupu Haké
Ne u toki kau atu ki he nofo kemi ʻa e Kau Tāutaha Kei Talavoú ʻi Tonga. ʻI he pongipongi fakaʻofoʻofa ʻo e Falaite ko iá, ne lōnuku ai ha toko nimangeau tupu nai ʻo e kakai fisifisimuʻa taha ʻa e ʻEikí. Kuo nau hulohula, hiva mo fiefia fakataha ʻi ha ngaahi ʻekitivitī fakatupulaki pea nau fakafanongo ki ha fakahinohino langaki moʻui mei he niʻihi kehé pea mo honau kau takí. Ko ha meʻa fakafiefia ke feohi mo kinautolu, ke ongoʻi ʻenau angaleleí pea mo ʻiloʻi naʻe tangutu ʻi muʻa ʻiate au ha kau taki he kahaʻú ʻo e Siasí, koló mo e pisinisí.
ʻOku lahi fau e meʻa ke tau fakamanatua ʻaki e lelei kuo fai ʻe he Toʻu Tangata kei Tupu Hake, ʻo e kau talavou mo e kau finemui ʻi he Pasifikí. ʻOku ʻi ai hanau tokolahi ʻoku ngāue fakafaifekau, mali ʻi he temipalé mo ngāue ʻi he ngaahi uōtí mo e koló ʻi he ngaahi fonua kehekehe ʻo e Pasifikí. Neongo e ngaahi lavameʻa lelei ko ʻení, ka ʻoku fuʻu vāmamaʻo e tokolahi ʻo e niʻihi ʻoku mālohi mo tauhi totonu ʻenau ngaahi fuakavá, mei he niʻihi ko ia ʻoku ʻikaí, pea ko ha meʻa ia ʻoku mau hohaʻa ki ai.
ʻOku kole ai ʻe he Kau Palesitenisī ʻo e ʻĒlia Pasifikí ki he Toʻu Tangata kei Tupu Haké, ke nau tokanga ki he lelei taʻengata ʻo honau laumālié. He ʻikai lava ʻe ha taha ʻi he toʻu tangata ko ʻení ʻo tekaki e fatongia ko iá ki ha taha kehe. Kuo pau ke takitaha fakapapauʻi hono fakamoʻui taʻengatá, ʻaki hono fafangaʻi fakalaumālie ia, he ʻoku mahuʻinga ia ki hono fakahoko mo tauhi ʻo e ngaahi fuakavá kae pehē ki he kau atu ki ha ngaahi ʻekitivitī ʻoku fakatupulakí. ʻOku hoko e Fakamoʻuí ko e uho e moʻui ʻa e ākonga moʻui taau ʻo Kalaisí, pea te ne fakamuʻomuʻa ai e meʻa ʻoku mahuʻinga tahá. ʻOku kau he ngaahi meʻa ʻoku mahuʻinga tahá ʻa e lotu fakamātoató, lau folofolá, ʻalu ki he Seminelí mo e ʻInisititiutí, maʻulotú, maʻu ʻo ha lekomeni temipalé, fakafoʻou ʻo e ngaahi fuakavá pea mo e tokoni ki he niʻihi kehé. ʻIo, kuo pau ke haʻisia e mēmipa kotoa pē ʻo e Toʻu Tangata kei Tupu Haké, ki heʻene moʻui lelei fakalaumālié, ʻaki ʻene fai e meʻa ʻoku mahuʻinga tahá.
ʻI he hoko ko ia ʻa Kalaisi ko e uho ʻetau moʻuí, ʻoku ʻi ai ha ngaahi tafaʻaki kehe ʻe fā ʻe tokoni ke tau kei mālohi mo tōnunga ai ʻi he Ongoongolelei kuo toe fakafoki maí. ʻOku kau ai ʻa e loto houngaʻia ʻi hoʻo hoko ko ha mēmipa ʻo e Siasí. Ko e taimi ko ia te tau ʻaiʻainoaʻia ai e meʻa ko iá, ko e momeniti ia ʻe meʻanoa pē ai ʻetau ngaahi fuakavá. Uá, kuo pau ke tau manatuʻi ʻoku ʻi ai ha palani maʻá e fānau ʻa e ʻOtuá ʻi he māmaní pea ʻoku totonu ke tau toe foki ʻo nofo fakataha mo Ia. Ko e lahi ange ko ia ʻene mahino kiate kitautolu e Palani Lahi ʻo e Fiefiá, ko e lahi ange ia e faingamālie ke tau lavaʻi kakato ai e palaní. Tolú, kuo pau ke tau manatuʻi ʻoku hanga ʻe he ngāue fakafaifekaú ʻo fakaloloto ʻetau ului kia Kalaisí mo fakatupulaki ʻetau tui kiate Iá. ʻOku fie maʻu ke tau ului kakato ka tau lava ʻo matuʻuaki e ngaahi ngahau vela ʻa e filí. Ko e konga mahuʻinga hono faá ko e tukupā ke malí. Ko e mali ʻi he vahaʻa ʻo ha tangata mo ha fefine naʻe tuʻutuʻuni ia ʻe he ʻOtuá pea ʻoku ʻikai totonu ke fakatoloi noaʻia ia.
Naʻe ʻikai fakataumuʻa ke nofo toko taha ha taha he moʻui fakamatelié ko ia naʻe fakapapauʻi ai ʻe he ʻOtuá ʻe ʻi ai ha tokoni he taimi ʻe hoko mai ai e fakafepakí. ʻE maʻu ʻe he Toʻu Tangata kei Tupu Haké e tokoni ko iá ʻi he ongomātuʻa leleí, kau taki ʻo e Lakanga fakataulaʻeikí mo e ngaahi houalotú pea mo e ngaahi kaungāmeʻa fietokoni ʻoku vahevahe mai honau ngaahi ʻulungaanga mahuʻingá. Hangē ko ia ʻoku tōfuhia ai e mēmipa kotoa pē, te nau ʻilo ko e tokoni lelei tahá ʻoku maʻu ia ʻi he tūʻulutui ʻo tautapa ke maʻu ha tokoni ʻi he ngaahi faingataʻa mo e ʻahiʻahi ʻoku nau fepaki mo iá. Hangē ko aú, te nau ongoʻi hono tataki mo fakalotolahiʻi kinautolu ʻe he ngaahi ueʻi ʻa e Laumālie Māʻoniʻoní lolotonga e ngaahi taimi faingataʻá.
ʻI he tokanga ʻa ʻEletā Kulisitofasoni ke tokoniʻi e Toʻu Tangata kei Tupu Haké, naʻá ne fai ai ha kole makehe ki he “Kakai tangata lalahí—ʻa e ngaahi tamaí, kau tāutaha lalahí, kau takí mo e kau faiako fakaʻapí—ke nau hoko ko ha faʻifaʻitakiʻanga taau pea ke nau tokoni ki he tamaiki tangata ʻo e Toʻu Tangata kei Tupu Haké ke nau hoko ʻo tangata. Akoʻi kiate kinautolu e ngaahi pōtoʻi fakasōsialé mo e kau taukei kehé: ʻa e founga ke kau atu ai ki ha fetalanoaʻaki, founga ke fakamaheni pea feohi ai mo e niʻihi kehé, founga ke fengāueʻaki ai mo e kakai fefiné mo e tamaiki fefiné, founga ke tokoní, founga ke mālohi mo fiefia ai he ngaahi meʻa ʻoku fakatupulakí, founga ke fai ai ha meʻa ʻoku fakamānakó kae ʻikai maʻunimā kinautolu, mo e founga ke fakatonutonu ai e ngaahi fehalākí mo fai ha ngaahi fili ʻoku lelei angé.” ʻOku mau kole atu ki he kakai tangata lalahi ʻo e Pasifikí, ke mou tuʻu hake ʻo fataki e ui ko ʻeni kuo fai ʻe ha palōfita ʻa e ʻOtuá.
Naʻá ne toe fakamatala ʻo pehē, “ʻoku ʻikai ha feituʻu ʻe toe mālohi ange ai hono ongoʻi pe fakaʻaongaʻi lelei ai e ivi tākiekina ʻo e kakai fefiné ka ko ʻapi. ʻOku ʻikai ha feituʻu lelei ange ke ʻohake ai e Toʻu Tangata kei Tupu Haké, ka ko e fāmili tukufakaholó, ʻoku ngāue faaitaha ai e tamaí mo e faʻeé ke tokonaki, akoʻi mo tauhi ʻena fānaú.” ʻOku mahino ko e ʻapi ʻoku mālohi he Siasí, ko ha konga mahuʻinga ia ʻi hono ʻohake ʻa e Toʻu Tangata kei Tupu Haké.
ʻOku mau fakaafeʻi e ngaahi mātuʻa mo e kau taki kotoa pē ke fakapapauʻi ʻoku ʻikai mole pe hē ha taha ʻo e Toʻu Tangata kei Tupu Haké ʻi he faingataʻa mo e ʻahiʻahi ʻoku nau fehangahangai mo iá, ka mou kau fakataha ʻi heʻenau feinga ke tauhi totonu ʻenau ngaahi fuakavá pea fakahaofi honau toʻu kuo hē atú.