Ko e Falekoloa Sū ʻa e Kui Tangatá
ʻOku nofo e tokotaha naʻá ne fai e talanoá ʻi ʻIutā, USA.
Naʻe pehē ʻe heʻeku Kui Tangatá, “ʻOkú ke ʻilo, ʻoku fie maʻu ke tau hoko ʻo hangē ko e sū ko ʻení.”
“‘[ʻOku ʻikai faingofua maʻu pē ke pehē ‘fakamolemoleʻi au’]” (Children’s Songbook, 98).
Naʻe fakaava hake ʻe Mikaeli e matapā ki he falekoloa sū ʻo ʻene kui tangatá. Naʻá ne nāmuʻi e leta naʻe ngāue ʻaki ʻe he Kui tangatá. Ko e taha ia e ngaahi nanamu naʻá ne manako taha aí.
“Mālō e lelei, Kui tangata!”
Naʻe kei tūʻulutui ʻa e kui tangatá ki lalo ʻo tā ha vaʻe ʻo ha tokotaha fakatau ʻi ha laʻipepa. Naʻe ʻikai ke ne sio hake. Naʻe ʻikai ke fuʻu lelei e fanongo ʻa e kui tangatá.
Naʻe tangutu hifo ʻa Mikaeli ʻi ha sea lōloa. Naʻá ne sio ki he fokotuʻuna ʻa e leta kuo kosí. Naʻá ne sioloto atu ki he meʻa ʻe ngaohi ʻe he Kui tangatá ʻo ngāue ʻaki kinautolu takitahá, ʻo fakaʻaongaʻi ʻene hāmalá mo e ʻū palaeá.
Naʻe fakamanatu mai ʻe he ʻū meʻangāué kia Mikaeli ha meʻa ʻe taha naʻá ne manako ai. Naʻe ʻoange maʻu pē ʻe he kui tangatá ha lole ʻi he taimi naʻe tokoni ai ʻa Mikaeli ki he fakamāú.
Ka naʻe fiekaia ʻa Mikaeli ia he taimí ni! Naʻá ne ʻiloʻi naʻe ʻikai totonu ke ne toʻo ha foʻi lole taʻe te ne kole, ka naʻe ngali moʻua ʻa e Kui tangatá ʻo kiʻi fuofuoloa. “Mahalo pē ʻoku ʻikai fie maʻu ia ke u tatali,” ko e fakakaukau ia ʻa Mikaelí.
Naʻe ala atu ʻa Mikaeli ʻi he lalo kānitá ki he hina lolé. Naʻe fonu ia ʻi he lole naʻá ne manako taha aí—melie pea fakafisifisi ʻaki ha efuefu fifisi! ʻI heʻene fakaava iá, naʻe kiʻi ongoʻi taʻefiemālie ʻa Mikaeli. Ka naʻe ʻasi ifo mai ʻa e lolé. Naʻá ne fakavavevave ke fakahū ia ki hono ngutú.
Taimi siʻi pē kuo ʻalu e tokotaha fakataú. Naʻe toʻo hake ʻe he kui tangatá ha konga leta peá ne unu ia ʻi ha vai. Naʻe tokoni ia ke molū ʻa e letá pea faingofua ki he ngāué.
Naʻe kai ʻe Mikaeli e toenga ʻo e foʻi lolé ʻi he vave tahá. Peá ne lue atu leva ki he Kui tangatá.
“Mālō e Lelei!” Ko e lea atu ia ʻa e kui tangatá mo ʻene malimalí. “ʻOku ou fiefia ʻi hoʻo haʻu ʻo sio mai kiate aú.”
Naʻe fāʻofua ʻa Mikaeli ki he Kui tangatá. Naʻá ne ʻamanaki pē naʻe ʻikai lava ʻe he Kui tangatá ʻo tala naʻá ne kai ha foʻi lole. Naʻe tukunoaʻi ʻe Mikaeli ʻene loto hohaʻá.
“ʻOku hangē ʻokú ke moʻumoʻua he ʻaho ní,” ko e lea ia ʻa Mikaeli mo tuhu ki he fokotuʻunga letá. “ʻOkú ke fie maʻu tokoni?”
“ʻIo! Te ke lava ʻo toʻo mai e filo ko eé?”
Naʻe ala atu ʻa Mikaeli ki ha foʻi filo lōloa. Naʻá ne toʻo mai ia ʻaki hono ongo nimá. Naʻe fefeka ange ia ʻi he meʻa naʻá ne sio atu ki aí.
“Tamani, fuʻu fefeka tama.”
Naʻe kata ʻa e Kui tangatá. “Kuo pau pē ke pehē, ke ne lava ʻo matuʻuaki e ngaahi faingataʻa ʻo e moʻuí.” Naʻe tui ʻe he Kui tangatá e filó ʻi he letá. Peá ne hā mei hono fofongá ʻa e faʻahinga sio ʻoku faʻa ui ʻe Mama he taimi ʻe niʻihi ko e “Sio Poto ʻa e Kui tangatá.”
Naʻe pehē ʻe he Kui tangatá mo ʻene kamó, “ʻOkú ke ʻilo, ʻoku fie maʻu ke tau hoko ʻo hangē ko e sū ko ʻení.”
Naʻe toe siofi fakaʻauliliki ʻe Mikaeli e letá. “ʻOi. ʻOku pehē?”
“ʻIo, ʻoku moʻoni ia. ʻOku fie maʻu ke tau mālohi. ʻI heʻene peheé ʻe ʻikai hanga ʻe he ngaahi ʻahiʻahi ʻa Sētané ʻo ʻai ke tau ngāvaivai.”
Naʻe manatuʻi hake ʻe Mikaeli e lole kulokulá. Naʻá ne ʻilo naʻe totonu ke ne talaange ia ki he Kui tangatá.
Naʻe toʻo ʻe he Kui tangatá ha sū motuʻa mei he tukuʻanga suú. “Sio ki he foʻi ava fōlahi ko ʻení?”
Mahalo ʻe hao e nima kotoa ʻo Mikaelí ʻi he foʻi avá “ʻIo.”
“Naʻe hoko pē ʻeni ko ha kiʻi foʻi ava fōsiʻi ne mei faingofua hono fakaleleiʻí. Ka naʻa nau tatali, pea ko ʻeni ʻe toe faingataʻa ange hono feingaʻi ke fakaleleiʻí. ʻOku hangē ʻa e ngaahi ʻulungaanga koví mo e ngaahi fili halá ko e foʻi ava ko iá. Ko e lelei tahá ke fakaleleiʻi ʻi he vave tahá.”
Naʻe toe kamo ʻa e Kui tangatá, pea naʻe liliu ʻa e Sio Poto ʻa e Kui tangatá ki ha malimali. Naʻe hoko atu pē ʻena talanoá lolotonga e ngāue ʻa e Kui tangatá. Naʻe fakakaukau pē ʻa Mikaeli ʻi he taimi kotoa ko ʻení ki he foʻi lolekau lanu kulokulá.
ʻI he taimi ne ʻosi ai e ngāue ʻa e Kui tangatá, ne tokoni ʻa Mikaeli ki hono fakamāú. Naʻe ala atu leva ʻa e Kui tangatá ki he hina lolé.
Ne faifai kuo ʻikai toe lavaʻi ʻe Mikaeli. Ne fakafokifā ʻene pehē atu, “Naʻá ku toʻo ʻe au hoʻo foʻi lole ʻe taha!”
Naʻe tuku hifo ʻe he Kui tangatá e hiná. “Ko e hā hoʻo leá?”
Naʻe fakamatala ange ʻe Mikaeli ʻene toʻo e lolé kae ʻikai kole angé. “Kātaki fakamolemole Kui tangata! ʻOku ou palōmesi atu, he ʻikai ke u toe fai ia!”
Naʻe fāʻofua ʻa e Kui tangatá kia Mikaeli. Naʻe ongoʻi fiemālie lahi ange ʻa Mikaeli.
“Mālō ʻaupito hoʻo faitotonú. ʻOku mahuʻinga ange ia kiate au ʻi ha toe meʻa.”
ʻI heʻene lue ki ʻapí, naʻe ongoʻi ʻe Mikaeli naʻá ne hangē ko ha sū foʻou ʻi he ʻū sū ʻa e Kui tangatá. Naʻe mālohi ʻaupito, pea mateuteu ki he moʻuí!