Naʻe Mole pea Kuo Maʻu
ʻOku ou ʻilo ʻoku tali maʻu pē ʻe he Tamai Hēvaní ʻa e ngaahi lotú. ʻI he nofo hoku fāmilí ʻi Siamané, naʻa mau kau atu ki ha Volksmarch ʻi homau koló. Ko e Volksmarch ko ha taimi fakafiefia ki he ngaahi kaungāmeʻá mo e kaungāʻapí ke nau feohi ʻaki ʻenau laka fakataha ʻi natula. Naʻe talamai ʻe heʻeku ongomātuʻá te u lava ʻo lue ʻi muʻa ʻi he kulupú mo e taha ʻo hoku ngaahi kaungāmeʻá, pea naʻá ma kamata ke lue atu ʻi he hala lōloá.
Hili ha ngaahi miniti siʻi, naʻe ʻikai ke u toe lava ʻo sio ki ha taha ʻi hoku fāmilí. Naʻá ku talaange ki hoku kaungāmeʻá te u nofo ʻi he halá ʻo tali kiate kinautolu. Ne vave pē ʻa e ʻikai ke u toe sio ki hoku kaungāmeʻá pe ko hono fāmilí, pea naʻe teʻeki pē ke haʻu hoku fāmilí. Naʻá ku toko taha pē ʻi he vaotaá, pea naʻá ku ongoʻi ilifia. Naʻá ku fakakaukau ke u lotu ke ʻilo au ʻe ha taha.
ʻI ha tafaʻaki ʻe taha ʻo e vaotaá, naʻe ongoʻi ʻe heʻeku tangataʻeikí ʻoku talaange ʻe he Laumālie Māʻoniʻoni kiate ia, “ʻAlu ʻo kumi ho fohá.” Naʻá ne ongoʻi ʻa ʻeku fuʻu fie maʻu iá, ko ia ai naʻá ne tafoki ʻo talaange ki heʻeku fineʻeikí te ne haʻu ʻo kumi au. Hili ha ngaahi miniti siʻi mei ai, naʻe lele mai ʻeku tangataʻeikí ʻi he hala naʻá ku talitali aí peá ne ʻilo au. Naʻá ku fiefia ke sio ki heʻeku tangataʻeikí! ʻI heʻene talanoa fekauʻaki mo ʻene maʻu ha ongo mālohi naʻá ku fie maʻu tokoní, naʻá ku ʻiloʻi naʻe tali ʻe he Tamai Hēvaní ʻeku lotú.
ʻOku ou fiefia ke ʻilo ko e fē pē ha feituʻu ʻoku ou ʻi ai, ʻoku ou lava ʻo talanoa ki he Tamai Hēvaní. Te Ne tokoni‘i au ke u ʻilo hoku halá.