Fuofua Pule Fefine he Senitā Tokoni ʻa e Siasí ʻi Haʻamoá
Naʻe toki fili ʻa Aiolupotea Sauimalae Malolo-Chu Ling kimuí ni ko e pule ʻo e senitā tokoni ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻi Haʻamoa mo ʻAmelika Haʻamoá. ʻOku ʻikai ngata pē he hoko ʻa Ms. Chu Ling ko e fuofua fefine ke Pule he Senitā Tokoní ʻi Haʻamoá, ka ko e fuofua fefine ia ke Pule ʻi ha Senitā Tokoni ʻi he ʻĒlia ʻo e Pasifikí.
ʻI he taʻu ʻe fitu kuohilí, naʻe hoko ai ʻa Malae ko e Pule he Tafaʻaki ki he Meʻa Fakapaʻangá ʻi he senitā tokoní, ka naʻe toe vahevahe foʻou e ngaahi fatongiá ʻi he Siasí he ʻĒlia Pasifikí, pea naʻe kole ange ai ke kei hoko atu pē ʻene Pule he Meʻa Fakapaʻangá, mo fili ia ke ne fuesia mo e fatongia ko e Pule ʻo e Senitā Tokoní. Ko ʻene fetongi ʻeni ʻa Denny Afualo, ko e tokotaha fakaʻosi he toko nima hokohoko kuo ʻoatu mei ha fonua muli ke hoko ko e Pule ʻo e Senitā Tokoní ʻi Haʻamoa.
Ko e haʻu ʻa Malae mei he ongo kolo ko Vaisala mo Falelima Savaii, pea naʻá ne ako pē he Kolisi Haʻamoá, maʻu hono Mataʻitohi Bachelor of Commerce mei he ʻUnivēsiti Fakafonua ʻo Haʻamoá, pea maʻu kimui ange hono Mataʻitohi MBA mei he ʻUnivēsiti ʻo e Pasifiki Tongá. Kuó ne hoko foki ko ha Tokotaha Tauhitohi kuo Fakamoʻoniʻi (Certified Public Accountant). ʻOku kau heʻene tokoni ki he koló, ʻa ʻene hoko ko ha mēmipa ʻo e Poate ʻo e Kau Talēkita ki he Pangikē Fakalakalaka ʻo Haʻamoá.
ʻOku ʻi ai ha fānau ʻe toko ono ʻa Sauimalae mo hono husepānití ko Pulotu Lyndon Chu Ling, ko e palesiteni ʻo e siteiki Upolu Malie Stake pea mo e CEO ʻo e Potungāue Commerce, Industry mo e Labour ʻi Haʻamoá. Naʻá ne fakahaaʻi ʻene houngaʻia he ngaahi tokoni ʻoku fai ʻe hono foha lalahi ʻe toko tolú ki hono ngaahi foha iiki ange ʻe toko tolú, ka ne lava mo Lyndon ʻo fuesia e ngaahi fie maʻu ki heʻena ngāue maʻuʻanga moʻui femoʻuekiná mo e ngaahi uiuiʻi fakasiasí.
ʻOkú ne fiefia he ngāue ʻi he Siasí pea ʻokú ne pehē ko ha ʻātakai fakaʻofoʻofa mo fakatuʻamelie ʻaupito ia.
Ko e senitā tokoni ʻo Haʻamoá, ko e taha ia ʻo e ngaahi senitā ʻe fitu (7) ʻi he Pasifiki Tongá. ʻOku ʻi ai ha kau ngāue totongi ʻe toko 90 ʻi he Senitā Tokoni ʻo Haʻamoá, ʻoku nau ngāue ke tokoni ki he kau taki lakanga fakataulaʻeiki ʻo e Siasí ʻi Haʻamoa mo Haʻamoa ʻAmeliká.