Ngaahi Talanoa Mei he Folofolá
ʻOku Fakatau ʻa Siosefa ki ʻIsipite
Mei he Sēnesi 37–41.
Naʻe ʻi ai ha ngaahi tokoua ʻe toko 11 ʻo Siosefa. Naʻe ʻoange ʻe heʻene tangataʻeikí hano pulupulu fakaʻofoʻofa mo lanu kehekehe. Naʻe folofola ʻa e ʻOtuá kia Siosefa te ne hoko ko ha taki ki hono ngaahi tokouá.
Naʻe ʻita e ngaahi taʻokete ʻo Siosefá. Naʻe ʻikai ke nau fie maʻu ʻa Siosefa ke ne hoko ko honau taki! Naʻa nau fakatau ia ki he kakai naʻa nau ʻalu ki ʻIsipité, pea naʻá ne hoko ko ha pōpula.
Naʻe ngāue mālohi ʻa Siosefa. Naʻá ne fakahoko ha ngaahi fili lelei, ʻo aʻu pē ki he taimi naʻe loi ai e kakaí fekauʻaki mo ia pea tuku pilīsone ai iá.
Naʻa mo e ngaahi taimi faingataʻá, naʻe falala pē ʻa Siosefa ki he ʻOtuá. Pea naʻe tāpuekina ia ʻe he ʻOtuá. Naʻe hoko ʻa Siosefa ko ha taki ʻi ʻIsipite! ʻI heʻene matuʻotuʻa angé, naʻá ne tokoni ke tataki hono fāmilí, ʻo hangē pē ko ia naʻe folofola ange ʻa e ʻOtuá te ne faí.
ʻOku ou lava ʻo falala ki he ʻOtuá ʻo hangē ko ia naʻe fai ʻe Siosefá. ʻOku ou lava ʻo fili ʻa e totonú. ʻE kau ʻa e ʻOtuá mo au ʻo tatau ai pē pe ko e hā e meʻa ʻe hokó.