Ol Aposol Oli Tij Raon long Wol
Blong fas taem long histri blong Jos ia we i kambak long wol, evriwan long ol memba blong Fas Presidensi mo Kworom blong Olgeta Twelef Aposol oli bin stap tugeta long wan ples aotsaed long Yunaeted Stet, taem we, evriwan long olgeta, oli bin travel i go long Itali from dedikesen blong Rom Itali Tempol, long Maj 2019. (Luk long stori ia long pej xx).
Long sam nara wok blong ol las sikis manis ia:
Afta we tufala i bin visitim Not mo Saot Karolina, YSA, Presiden Dallin H. Oaks mo Elda David A. Bednar, tufala i bin toktok long olgeta ia we strong hariken i bin kasem olgeta; hemia i hapen long wan naet divosen long Talahasi, Florida, YSA. Presiden Oaks i talem bakegen long olgeta we oli bin stap lisin se ol samting we oli kam agens, mo ol hadtaem, oli pat blong laef long wol ia, be “sapos yumi stap fetful mo stap prea, Lod bae i helpem yumi blong gotru long olgeta.”
Long Jikago, Ilinoa, YSA, Elda Oaks i bin givim kaonsel long ol yang mared memba blong Jos se, “fasin blong jenisim laef i go long Lod, oltaem i kam bifo wan jenisim laef i go long Jos. Mo fasin blong jenisim laef i go long Lod i kam tru long prea mo tru long stadi mo fasin blong givim seves. Mo long Arisona, wetem Presiden Russel M. Nelson, Presiden Oaks i talem bakegen long ol yut mo yang adalt se: “Bes kwaliti blong tokbaot yumi long hem, i we, yumi wan boe o wan gel blong God.”
Ol memba blong Kworom blong Olgeta Twelef Aposol oli mekem sam moa wok raon long wol.
Long Inglan, Elda Jeffrey R. Holland i wan man ia nomo we i toktok long wan Krismes program long Pembrok Kolej Japel long Oksfod Yunivesiti; long tetaem ia hem i bin tijim se glad mining blong Krismes i no lukluk nomo long taem ia we Kraes i bon i kam long wol, be tu, long laef blong Hem, ded blong Hem, mo “Viktri sakrifaes ia we i pem praes from sin.”
Long Sao Paolo mo Salvado, Brasil, Elda Dieter F. Uchtdorf i tijim ol bigfala grup blong ol pipol long ol miting, be tu, ol smol grup, mo wanwan man mo woman; hem i bin toktok tu long wan famli blong wan fultaem misinari we i jes ded; hem i go long sakramen miting blong tu wod mo ol Sandei Skul miting blong olgeta, mo hem i bin go wetem sam misinari taem oli bin visitim ol pat memba famli; taem hem i bin stap ron long Sao Paolo lektrik tren, wan niu konvet i luksave hem. Hem i talem se Brasil i wan ples we “tingting ia, se yumi evriwan i ol pikinini blong Papa long Heven, i wan samting we yumi rili save luk mo stap praktisim.”
Long Yunaeted Arab Emiret, Elda David A. Bednar i bin holem wan spesel miting wetem ol yut mo ol yang adalt blong Abu Dabi Stek. Hem i mekem tua blong senta blong lan blong ol rifuji blong Afrika we oli stap long Ijip mo wan senta blong ol famli we oli seraot long Iraki Kerdistan. “Yumi evriwan i ol boe mo gel blong God,” Elda Bednar i talem afta we hem i toktok wetem ol refuji. Long Isrel, hem i bin prisaed long wan konfrens blong Jerusalem Distrik, mo long wan divosen long Brigham Yang Yunivesiti long Jerusalem Senta. Long taem blong Roots Tech famle histri konfrens long Sol Lek Siti, Yuta, YSA, Elda Bednar i bin presentem wan donesen blong 2 milian dola i go long Intanasonol Afrika Amerika Miusiom Senta, long bihaf blong Jos; hemia i blong Famli Histri.
Long Yukren, Armenia, Franis, Hangari, Switselan, Romenia, mo Tsekia, Elda Quentin L. Cook i bin tokbaot fasin blong stap laef folem gospel ia we i kambak blong Jisas Kraes; blong laef folem evri dei mo blong serem tru long eksampol mo tru long fasin blong go aot mo toktok long ol narawan. Long Niu Yok Siti, YSA, Elda Cook i bin tokbaot wanem i semmak i stap bitwin Jos blong Jisas Kraes blong Ol Lata-dei Sent mo ol Jiu komuniti. “Wetem ol Jiu fren blong yumi, yumi serem wari ia blong ol pipol we oli stap mekem nogud long olgeta, mo olgeta we oli fesem ol spesel jalenj,” hem i talem.
Long Meksiko Siti, Merida, mo Kankun, Meksiko, Elda Cook i bin tijim ol lida blong Jos, ol memba, ol misinari, mo ol gavman mo ol bisnis lida. Wan yut divosen we 800 yut i atendem, i bin tekples; ol yut oli kam long eit stek long Meksiko Siti, mo oli brodkas i go long 38,000 yut raon long Meksiko. Mo Elda Cook i bin toktok long wan forom long oditoriom blong Senet blong Meksiko, mo hem i askem ol pipol we oli gat fet blong stanap strong mo stap wan blong difendem fridom blong relijin.
Long Puerto Riko mo long Dominik Ripablik, Elda D. Todd Christofferson i bin faenem se, nomata wanem we ol hariken oli bin spolem, ol memba oli stap stanap bakegen. Hem i talem se eria ia i “gat fulap paoa,” from oli save se bae i no longtaem, bae i gat tri tempol long Karabia (Haiti, Puerto Riko, mo Dominik Ripablik). Hem i toktok tu long wan bisnis etik konfrens, mo long wan konfrens abaot fridom blong relijin. Long wan nius miting long Wasington D.K., YSA, Elda Christofferson i bin tokbaot hamas i impoten blong gat trutok mo gat fasin blong stap tru mo strong. Mo taem hem i bin go mekem sam wok long Gwatemala mo long El Salvado, antap long sam moa miting, Elda Christofferson i bin tekpat long sam brodkas we oli bin wajem raon long Sentrol Amerika, we i tokbaot bigwan hamas gospel stadi insaed long hom i impoten.
Long Saot Afrika, mo long Simbabwe, Elda Neil L. Andersen i bin givim advaes long ol memba blong Jos blong tingbaot Sevya mo blong oli akseptem tingting ia blong lanem samting long hom olsem senta, we Jos i sapotem. Long Inglan, Wels, Franis mo Ostria, hem i talem se, paoa, i kam taem ol famli insaed long Jos oli kam folfolem ol jeneresen, mo hem i talem se ol memba long Yurop oli gohed blong plei wan stamba rol blong Jos i gro mo i stap gud. Hem i talem: Oli stap olsem ol man we oli stap difendem fet.
Jos i lukluk fulap long fasin blong ol yangfala we oli stap karemaot laef blong olgetawan bakegen; Elda Ronald A. Rasband i toktok bigwan taem hem i toktok i go long ol tija blong seminari mo institiut long Sol Lek Siti, Yuta. Ol seminari mo ol institiut tija, oli save helpem olgeta we oli save foldaon olsem taem oli yusum ol risos blong stopem fasin ia, mo taem oli stap rimaenem ol studen se help blong heven mo givhan i stap tru long Sevya.
Long Rwanda, Elda Gary E. Stevenson i bin visitim wan memorial blong ol man we oli bin kilimded olgeta, mo i talem se nomata ol trabol blong bifo, tedei, ol pipol blong Rwanda oli fulap wetem “fasin we i kaen, we i kwaet, we oli mekem pis, mo oli gat fogivnes” we i eksampol blong bes kwaliti blong ol man long wol. Hem i presentem wan donesen long bihaf blong Jos. Elda Stevenson i bin visitim tu, Yuganda, Etiopia, Tansania, mo Madagaska; hem i holem sam prishud lidasip konfrens, i toktok long ol memba mo ol misinari, i tekpat long wan yut mo yang singgel adalt divosen, i visitim ol gavman ofisol, mo i ansarem ol kwestin blong media.
Elda Dale G. Renlund i bin visitim sam ples we oli longwe taem hem i bin mekem sam wok long Ajentina mo Jile, olsem Antofagasta long draeples blong Not Jile: wan konfrens blong Ajentina Komodoro Rivadavia Misin; El Calafate Branj long Ajentina; wan smol japel i bin fulap wetem ol pipol we i bitim 30 o 40 pipol ia we oli talem se bae oli kam; mo i go long wan miting long Usuaea, Ajentina, mo i bin gat 600 pipol oli kam we i ripresentem ol aktiv memba raon long ful ples ia blong Tierra del Fuego. Long ol ples olsem, Rio Galegos, Ajentina, Elda Renlund i tokbaot ol blesing blong kurikulom blong hom olsem senta we Jos i sapotem, mo wei we ol famli oli gat blesing taem oli kipim Sabat dei.
Long Paragwe, Yurugwe, Jile, mo Ajentina, Elda Gerrit W. Gong i bin serem ol prinsipol aot long ol skripja mo aot long ol tijing blong Presiden Nelson—hemia i tekem tu ol stamba toktok olsem wok blong givhan, stap long rod blong kavenan, revelesen we i blong yuwan, stret yus blong nem blong Jos, mo stap yusum gospel blong faenem ol ansa mo winim ol jalenj mo ol samting we i blokem rod.
Long Misinari Trening senta long Gwatemala, Elda Ulisses Soares i bin serem ol lesen we hem i lanem long jenis blong laef blong papa mo mama blong hem. Hem i yusum ol lesen ia blong leftemap tingting blong ol misinari blong gohed blong stap fetful mo stap strong. Hem i bin visitim tu, Kosta Rika, mo Panama mo hem i talem se ol memba long Sentrol Amerika oli wantem blong givim seves long Lod. Oli wantem blong mekem wanem we Hem i bin askem olgeta blong mekem.” Long wan visit afta we hem i go long Dominik Ripablik, mo Trinidad mo Tobako, hem i talem se long Karabia, ol pipol oli stap laekem blong gat gospel blong Jisas Kraes insaed long laef blong olgeta. Mo tu,hem i bin dediketem nesen blong Kurakao blong oli prijim gospel long hem. “Jos i gat wan bigfala fiuja long Kurakao,” hem i talem bakegen. “Ol pipol oli fetful mo oli glad blong kasem gospel.”