Elda Ricardo P. Giménez
Jeneral Atoriti Seventi
Ol memba blong Jos long Antofagasta, Jile, bae oli tingbaot blong longtaem Epril 2019 jeneral konfrens long anaonsmen blong wan fiuja tempol long we mo koling blong wan boe manples, Elda Ricardo P. Giménez, olsem wan Jeneral Atoriti Seventi.
Taem Hem i stap lukluk gud ol responsabiliti blong niufala koling blong hem, Elda Giménez i faenem fet mo strong paoa long tingting “Huia Lod i singaotem, Lod i mekem hem i kwalifae” (Thomas S. Monson, “Duty Calls,” Ensign, Mei 1996, 44).
“Mi bin tijim toktok ia fulap taem bifo, mo naoia mi stap traem blong putum long praktis long mi wan,” hem i talem. “Papa long Heven i singaotem yu. Hem i save yu. Yu go nomo mo mekem wanem Hem i wantem, mo evri samting bae i oraet.”
Ricardo Patricio Giménez Salazar i bin bon long 28 Novemba, 1971, hem i fes bon long tu pikinini we oli bon i go long Ricardo Benjamín Giménez Gimeno mo Myrto Lucisca Amalia Salazar Signorini. Hem i bin joenem Jos long 11 yia mo i bin muv wetem mama mo sista blong hem i go long Santiago, Jile, afta we papa mo mama blong hem i divos.
Long 1995, hem i mitim Catherine Ivonne Carrazana Zúñiga long Santiago taem we Catherine i stat blong kam long wod blong hem taem Catherine i stap stap long we wetem wan angkel. Tufala i sil long Santiago Jile Tempol long 12 Septemba, 1997, mo tufala i papa mo mama blong tu pikinini.
Elda Giménez i kasem digri blong hem long akaonting mo oditing long Yunivesiti blong Santiago long 1997 wetem wan masta long bisnis administresen digri long Yunivesiti blong Jile long 2003. Hem i statem wok blong hem long indastri blong maen, mo sloslo i muv i go long infomesen teknoloji olsem wan faenens daerekta blong Komputa Saens Corporation long Latin Amerika. Hem i bin gobak long wok blong maen long 2012, fastaem wetem Sierra Gorda Mining afta wetem Robinson Nevada Mining Kampani.
Long taem blong koling blong hem, Elda Giménez i stap wok olsem wan kaonsela insaed long wan stek presidensi. Hem i bin givim seves olsem wan Eria Seventi long Saot Amerika Saot Eria, stek presiden, hae kaonsela, bisop, kaonsela insaed long wan bisoprik mo wan wod Yang Man presidensi, mo wan fultaem misinari long Jile Konsepsion Misin.