Ol Sister oli Stap Tij, Mit mo Presentem Ol Samting
Sista Jean B. Bingham, Rilif Sosaeti Jeneral Presiden, mo Bonnie H. Cordon, Yang Woman Jeneral Presiden, oli givim aotlaen blong plante long ol yumaniterian program, olsem klin wota, neonatal kea, mo stik meresin, mo tu, Jos edukesen mo ol litresi program, taem we oli bin stap mit wetem ol gavman lida mo taem oli bin stap tijim ol memba blong Jos long Gana, Naejeria, mo Aevori Kost.
“Stamba tingting blong visit blong mifala, i blong mitim Ol Sent, givim sam trening long ol sista, harem ol jalenj blong olgeta, filim hat blong olgeta, mo letem olgeta oli save se mifala i lavem olgeta,” Sista Bingham i talem.
Sista Bingham mo Sista Cordon, tufala i holem wan divosen wetem ol misinari blong Gana Akra Wes Misin. Tufala i bin mit tu wetem samfala memba insaed long hom blong olgeta. Sista Bingham i bin tekpat long wan paelot litresi program, we i stap tijim ol pipol olsem wanem blong rid, mo semtaem, stap tijim olgeta abaot gospel blong Jisas Kraes. Mo tufala sista i bin tekpat long wan lidasip trening brodkas we i stap long Akra, mo oli soem long moa long 100 kongregesen long Wes Afrika; tufala i mit wetem Fas Ledi blong Gana, mo wetem Pemanen Sekretari blong Ministri blong Ol Woman Afea mo Help long Poveti, hemia blong Gavman blong Lagos Stet long Naejeria.
Afta we oli mit wetem ol sista long Aevori Kost, Sista Cordon i talem: “Tras blong olgeta, mo hao oli andastanem God mo huia Hem, mo wanem Hem i save mekem wetem laef blong olgeta, i mekem mi sapraes tumas.” Hem i talem se, taem hem i tokbaot sapos bae oli gat wan tempol long Abijan, wan sista i krae wetem glad. “Mifala i stap gobak wetem ol ae blong Man Afrika” Sista Cordon i talem. “Mifala i stap gobak wetem ol niu hat.”
Sista Joy D. Jones, Paemeri Jeneral Presiden i givim mane we oli bin resemap tru long Saenem Wol kampen, i go long ol ofis blong ol defren jariti oganaesesen long Manatan, Niu Yok, YSA. Sista Jones i talem: “Mifala i ona long Sevya Jisas Kraes, tru long seves,” mo hem i talem se i gud tumas blong luk wanem i bin hapen blong “ol pipol oli luksave gudfala janis ia blong givim samting.”
Long Sol Lek Siti, Yuta, YSA, Sista Sharon Eubank, Fas Kaonsela long Rilif Sosaeti Jeneral Presidensi, i bin givim ol mane we oli bin resemap tru long Saenem Wol Kampen, hemia we oli bin mekem tru long “ol masin blong givhan’ i go long wan bank blong kaekae, wan jariti we i kea long ae blong ol pikinini, mo wan senta blong ol rifuji. Hemia i jes sam long $2.3 milian we oli bin resemap tru long ol masin ia long Arisona, Niu Yok, mo Yuta, YSA, mo long London, Inglan, mo Manila, Filipin, mo oli pasem i go long ol jariti raon long wol.