Misinari Nius

Kontaktem Hom. Ol misinari oli gat raet blong toktok wetem ol famli blong olgeta evri wik, long priperesen dei, tru long teks mesej, tru long onlaen mesej, telefon kol, mo vidio jat, hemia antap long ol leta mo ol imel.

Tul blong mekem plan blong ol fiuja misinari. I gat wan niufala tul blong mekem plan blong go long misin, we i kamaot long Misinari Dipatmen, we i stap blong helpem ol fiuja misinari blong oli mekem samting wetem moa tingting blong olgetawan, mo moa strong tingting taem we oli stap disaed wetaem nao i stret taem we oli rere gud blong givim seves long Lod olsem wan misinari.

Ol Seves misin. Stat long Jenuware 2019, bambae oli singaotem ol yang Jos seves misinari, ol “seves misinari.” Evri yang adalt we i stap aplae blong mekem wan misinari seves, oli mekem i semmak nomo, tru long wan ples onlaen, mo evri misin koling—blong go long wan gospel misin o wan seves misin—oli kam long profet. Ol yang adalt we oli klin inaf, be from sam risen, oli no save go long wan gospel misin, bae oli save singaotem olgeta long wan seves misin.

Naoia, ol sista misinari oli save werem ol traoses. Ol sista, naoia, oli save werem ol traoses long nomol dei aktiviti blong olgeta, be oli mas gohed blong werem ol dres o ol sket taem oli go long tempol o long Sandei wosip seves, lidasip mo ol eria konfrens, ol seves blong baptaes, mo ol divosen blong misinari trening senta. Blong werem ol traoses dres, i save helpem ol sista blong protektem olgeta long ol sik we moskito i stap pasem raon; i save kipim ol sista oli wom i stap long taem blong kolkol, mo i mekem se i isi tu blong ol sista oli ron long baeskel wetem.

Oli krietem ol misin, oli stretem ol baondri. Oli krietem fofala niu misin, mo i gat twelef misin we oli joenem wetem sam misin we oli stap finis. Ol jenis ia oli hapen wanwan taem, blong save go stret wetem namba blong ol misinari we oli stap long misin. Ol niufala misin, i gat: Dimokratik Ripablik blong Kongo Kinsasa Is, Gwatemala Antigwa, Peru Limatamba, mo Filipin Antipolo. Ol papa mo mama blong ol misinari we oli stap long ol misin ia—we oli krietem o klosem olgeta—bae oli kasem sam moa infomesen we bae i kam long misin presiden blong olgeta.

Oli stretem namba blong ol misinari trening senta. Blong mekem se oli yusum gud ol misinari trening senta raon long wol, bae oli klosem ol senta long Ajentina, Spen, Jile, mo Dominik Ripablik. Wetem olgeta senta ia we oli klos, Jos bae i yusum 11 misinari trening senta we oli stap long Brasil, Kolombia, Inglan, Gana, Gwatemala, Meksiko, Niu Silan, Peri, Filipin, Provo, Yuta,YSA mo Saot Afrika.

Ol Sefti Vidio Niufala seri blong 12 vidio, we oli singaotem: The Safety Zone oli putum i stap blong mekem se i gat sefti long ol 65,000 fultaem misinari we oli stap long fil, mo tu, olgeta we bae oli kam yet. Fasfala vidio, oli putum i stap blong ol fiuja misinari oli wajem wetem papa mo mama blong olgeta afta we oli kasem misin koling, mo bifo oli go insaed long wan misinari trening senta. Long MTS, misinari bae i wajem bakegen fas vidio ia, wetem ol nara 11 we i stap. Wanwan taem, bae i gat ol vidio blong rimaenem ol misinari truaot long misin blong olgeta.