Elda Jon A. McCune
Jeneral Atoriti Seventi
Long stat blong bisnis blong hem, Elda Jon A. McCune i bin storian wetem bos blong hem long wan taem we yu luk save se man ia i no save fulap samting abaot Jos blong Jisas Kraes blong Ol Lata-dei Sent. Bos blong hem i askem Elda McCune ?from wanem Ol Lata-dei Sent oli no stap danis mo kakae ol kuki?
“Be yes, mi kakae ol kuki,” Elda McCune i bin talem long bos blong hem wetem wan smael, mo stap raprapem bel blong hem. “Mi ting se yu mas miksimap mifala wetem wan narafala man.”
Taem oli stap toktok, Elda McCune i stretem ol rong tingting abaot Jos. Storian ia i bin lid i go long ol narafala storian abaot gospel blong Jisas Kraes mo i talem bakegen long Elda McCune from wanem i impoten blong stap rere oltaem blong serem gospel.
“Yumi evriwan i ol disaepol blong Sevya Jisas Kraes, long wea ples yumi stap long hem, long eni janis we yumi gat.” Elda McCune i talem. “Yumi gat ol wok, be oli stap blong sapotem ol famli blong yumi mo putum yumi long ol situesen blong serem gospel. Stamba responsabiliti blong yumi ia nao olsem ol disaepol blong Jisas Kraes.”
Jon Allen McCune i bin bon long Santa Krus, Kalifonia, YSA, long 20 Jun 1963; papa mo mama blong hem i Clifford mo Joan Schulthies McCune. Hem i bin groap long Nyssa, Oregon, YSA.
Afta we hem i bin wok long wan fultaem misin long Fukuoka, Japan, Elda McCune i maredem Debbra Ellen Kingsbury long Sol Lek Tempol long 1984. Oli papa mo mama blong fo pikinini mo oli stap long Midwei, Yuta, YSA.
Elda McCune i bin kasem wan bajela digri long saens mo faenens long Brigham Yang Yunivesiti mo afta wan masta long bisnis administresen digri long faenens long Yunivesiti blong Kalifonia, Los Anjeles (YCLA). Hem i bin wok had olsem senia vaes presiden mo manejing daerekta blong Capital Investment Advisors stat long 1997 go kasem 2012. Afta hem i bin wok olsem presiden blong Yuta Provo Misin bifo hem i kam dona ofisa we i lukluk long ol bigfala donesen wetem LDS Filantropi.
Elda McCune i bin stap wok olsem wan Eria Seventi long taem blong niufala koling blong hem. Hem i bin wok tu olsem wan stek presiden, bisop, kaonsela insaed long bisoprik mo long wan branj presidensi, mo presiden blong kworom blong ol elda.