Yumaniterian Wok I Helpem Ol Taosen Pipol
Wan nes long Indonesia i stanap long saed blong wan niu mama. Ol nes long senta ia we ol mama oli karem bebi long hem, i komplitim wan kos we oli singaotem, Helpem Ol Bebi blong Pulum Win, we olgeta long LDS Charities nao oli ranem.
Wan yang man long Gana i smael afta we oli putum hem insaed long wan wiljea we i stret long hem, hemia wetem help blong wan teknisen we i kam long LDS Charities.
Wan han blong yumaniterian seves blong Jos, LDS Charities, i bin tekpat long 2885 projek long 141 kantri las yia, mo oli wok wetem 1900 yumaniterian patna oganaesesen. Stat long 1985, LDS Charities i bin givim moa long 2.2 bilian dola olsem help—hemia i tekem kas mane, ol samting mo ol donesen long 197 kantri mo tritri, hemia folem LDS Charities 2018 yia ripot, we oli rilisim long 19 Febwari 2019.
Ol wok blong yumaniterian blong Jos, lav mo sore long evri pikinini blong God i stap biaen long hem, mo wok ia i poenemaot trifala gaed prinsipol—kea long olgeta we oli stap long bigfala nid, fasin blong dipen long yuwan, mo promotem fasin blong stap volontia mo givim seves. Olgeta prinsipol ia, we oli stanap long fet long Jisas Kraes, i givim paoa long wanwan man, woman, mo famli, i nomata long kala blong skin, relijin mo sitisensip.
Jos i help wetem ol imejensi wok (wetem hemia blong givim ol volontia), ol seves blong olgeta we oli no save luk gud, kea long mama mo niubon bebi, klin wota mo klin ples, stik meresin, givim ol wiljea mo ol help blong wokbaot, helpem ol pipol blong kasem kaekae blong olgetawan mo yusum ol lokol wei mo risos, mo ol kwik mo longtaem help i go long olgeta rifuji. Jos i stap tekpat tu long ol lokol komuniti projek long 43 stet mo long ol provins insaed long Yunaeted Stet mo Kanada, blong helpem olgeta we oli nomo gat hom, ol ples blong ol rifuji, mo ol nara nid.
“Mifala i filim blong talem tangkyu long wanwan man o woman we i bin help long sakses blong yumaniterian wok long 2018,” Sista Sharon Eubank, presiden blong LDS Charities mo Fas Kaonsela long Rilif Sosaeti Jeneral Presidensi, i bin talem. Hem i talem se ripot ia i ripresentem kaen fasin blong ol ten blong ol taosen blong ol pipol.