Elda Rubén V. Alliaud
Jeneral Atoriti Seventi
Rubén Alliaud i bin gat 14 yia taem hem i aot long hom blong hem long Ajentina blong spenem wan yia wetem anggel blong hem long Yunaeted Stet. Papa blong hem, Rubén Reynaldo Alliaud, i bin ded finis, mo Rubén i stap gat “fasin blong no stap lisin.”
Mama blong hem, Maria, we i wari i sendem hem long Yuston, Teksas blong stap wetem brata blong hem, Manuel Bustos, mo famli blong hem. Hem i putum wan kondisen nomo long famli blong brata blong hem: “No serem ol Lata-dei Sent bilif wetem boe blong mi.”
Be, spirit blong gospel i bin toktok long yangfala ia we i gat hadtaem. Hem i luk olsem wanem Jos i mekem Bustos famli i yunaet tru long prea mo seves, mo hem i no save stap mo no luk plante kopi blong Buk blong Momon antap long self blong rum blong hem.
From se hem i wantem save, hem i tekem wan kopi, mo i faenem promes blong Moronae, se hem, bae hem i save kam blong save sapos Buk blong Momon i tru, tru long prea.
“Promes ia i bin tajem mi,” niu Jeneral Atoriti Seventi i talem. “Mi wantem blong ridim buk.”
Hem i putum promes blong Moronae long hat blong hem, i kasem wan gud ansa, mo hem i talem long anggel blong hem, we i bin sapraes, se hem i wantem kasem baptaes. Kwiktaem nomo Anggel Manuel i sendem Rubén i gobak long Ajentina blong askem raet long mama blong hem. I no longtaem afta, hem i kasem baptaes. Stat long tetaem ia i kam, gospel ia we i kambak, i stap olsem angka blong laef blong Elda Alliaud.
Rubén Vicente Alliaud i bon i kam long wol ia long 8 Jenuware 1966, long Buenos Aeres. Hem i maredem Fabiana Bennett Lamas long Buenos Aeres, Ajentina Tempol, long 17 Disemba 1992. Tufala i gat sikis pikinini.
Elda Alliaud i winim wan loa digri long Yunivesiti blong Belgrano, long Buenos Aeres, mo i bin winim gud laef blong hem long wok blong loa, mo hem i wok speseli long saed blong kriminol loa. Stat long 1998, hem i bin stap wok olsem manejing patna blong Alliaud & Asociados.
Hem i bin givim seves olsem wan Eria Seventi, presiden blong Ajentina Kordoba Misin, wan stek presiden, wan hae kaonsela, wan bisop, presiden blong kworom blong ol elda, mo wan misinari long Yurugwe Montevideo Misin. Long taem blong koling blong hem, hem i bin stap givim seves olsem wan institiut tija, fas kaonsela long presidensi blong Ajentina Misinari Trening Senta, mo wan pablik afea daerekta.