Elda Peter M. Johnson
Jeneral Atoriti Seventi
Afta we Peter M. Johnson, boe blong wan bilding supavaesa mo wan taksi draeva, i akseptem wan basketbol skolasip long Brigham Yang Yunivesiti—Hawae, nao hem i stanap long fored blong wan institiut tija.
Tija ia i talem long hem: “Bae yu joenem Jos kwiktaem, o bae i tekem yu sam taem.”
Tija i talem stret. Moa long wan yia afta, Peter i “bin livim kakae mo prea, mo i bin kasem wan ansa.” Hem i bin baptaes long 16 Ogis 1986.
Peter Matthew Johnson, nambafo blong faef pikinini, i bon long McKinley Johnson mo Geneva Paris Long, long 29 Novemba 1966, long Kwins, Niu Yok YSA.
Papa mo mama blong hem i divos taem hem i gat 11 yia, mo mama blong hem i muv i go long Hawae. Wan yia afta, Peter i joenem Nesen blong Islam, mo i kam wan Muslim. Asosiesen ia i soem rod long hem mo i givim hem sapot, mo i mekem hem i rere blong akseptem gospel blong Jisas Kraes.
Taem hem i gat 15 yia, Peter i muv i go long Hawae blong stap wetem mama blong hem. Long ples ia, hem i faenem spot—speseli basketbol—mo i statem rod blong kasem wan yunivesiti edukesen, membasip insaed long Jos blong Jisas Kraes blong Ol Lata-dei Sent, misinari seves long Alabama Birmingham Misin, mo tempol mared long Stephanie Lyn Chadwick long 1990. Kapol ia, we tufala i mit taem tufala i stap plei basketbol long Saot Yuta Yunivesiti, i gat fo pikinini.
“Mi stap ia blong givim seves long Lod,” Elda Johnson i talem abaot koling blong hem long Olgeta Seventi. “I nomata sitisensip blong yu o kalja blong yu, o se mi blong wea, wok blong mi i blong givim seves long Lod wetem evri hat, maen mo paoa, mo blong ripresentem Lod long ol pipol blong Hem. Sevya i lavem yumi evriwan. Yumi ol pikinini boe mo pikinini gel blong God.”
Elda Johnson i kasem digri mo masta digri blong hem long saed blong akaonting long Saot Yuta Yunivesiti, mo wan PHD long akaonting long Arisona Stet Yunivesiti. Hem i wok olsem wan asosiet profesa long BYU Hawae, asisten profesa long Brigham Yang Yunivesiti, mo wan asosiet profesa long Yunivesiti blong Alabama. Hem i bin stap olsem wan Eria Seventi, wan stek presiden, wan stek faenens klak, mo wan wod misin lida.