Seves blong Presiden Nelson I Gohed
Oli welkamem Presiden Russel M. Nelson mo Elda Enrique R. Falabella blong Olgeta Seventi long divosen long Lima, Peru.
I no long taem afta Oktoba 2018 jeneral konfrens, Presiden Russel M. Nelson i travel i go long Peru, Bolivia, Paragwe, Yurugwe, mo Jile, mo oli bin visitim ol memba mo ol misinari mo oli bin mekem ol divosen, mo tu wan divosen blong ol yut long Jile we 1,500 i kam mo oli brodkastem truaot long kantri. Hem i toktok long ol memba long Spanis, dediketem Konsepsion, Jile Tempol, mo mit wetem ol lokol gavman lida.
Taosen blong ol woman oli ansa long sosol media long invitesen blong Presiden Nelson blong ripotem ol eksperiens blong olgeta wetem fo had jalenj we hem i givim long Oktoba 2018 jeneral konfrens: (1) lego kakae from sosol media mo … blong 10 dei, (2) ridim Buk blong Momon bifo en blong 2018, (3) go long tempol fulap taem, mo (4) tekpat fulwan long Rilif Sosaeti. “Mi wantem blong talem tangkyu long yufala evriwan we i bin ansa long invitesen blong mi,” Presiden Nelson i talem, mo “mi hop se wanwan long ol invitesen ia i mekem se yu yu kam kolosap moa long Sevya.”
Presiden Nelson i bin prisaed long fenerol seves blong gel blong hem, Wendy Nelson Maxfield, we i bin ded afta wan longfala strong faet wetem kansa. “Ol krae blong harem nogud bae i kam ol krae blong hop taem bae mifala i kasem wan lukluk i go long taem we i no save finis,” hem i talem. Hem i tokbaot gel blong hem long wan spesel konfrens blong ol memba blong Jiko Kalifonia Stek, we insaed long hem, i gat tu yunit blong Paradaes we faea i jes bonemdaon. “Bae yu lanem se evriwan i gat ol jalenj,” hem i talem. “Sapos yu wantem fil gud moa, yu fogetem yuwan mo go givim seves long wan narawan.”
Long Arisona, YSA, Presiden Nelson i invaetem wan bigfala grup blong 65,000 memba we oli bin kam tugeta insaed long wan spot stadiom blong “help blong mekem Isrel i kam tugeta long tugeta saed blong vel.” Presiden Nelson i raetem wan atikol tu we oli pablisim long niuspepa ia, Arizona Republic, we i leftemap tingting blong ol pipol blong “luk long Lod mo mekem Hem i stamba blong laef [blong olgeta].” Hem i bin tekpat long wan intaviu brodkas long televisen blong ol stet; i gat sam miting wetem ol lida blong gavman, edukesen mo ol nara fet; mo hem i holem wan taem blong kwestin mo ansa wetem ol yang singgel adalt.
Taem oli odenem hem long 14 Jenuware 2018, Presiden Nelson i bin visitim 5 bigfala graon, 16 nesen mo teritri, mo 24 siti, mo hem i travel samples long 88,515 kilometa.