Elda Alan R. Walker
Jeneral Atoriti Seventi
Blong lanem mo draonem hemwan insaed long ol niu kalja, i kam wan laeftaem samting we Elda Alan R. Walker i laekem blong mekem, mo i kam helpem gud hem long koling blong hem olsem wan Jeneral Atoriti Seventi.
Hem i bon long Buenos Aeres, Ajentina, mo papa mo mama blong hem oli Adrian Walker mo Cristina Ofelia Sparrow Walker, long namba 2 Jenuware 1971; Alan Walker i groap long ol defren pat blong Not mo Saot Amerika.
Hem i spenem ol fas yia blong hem long Ajentina bifo famli blong hem i muv i go long Boston, Masajusets, YSA, mo afta, long Meksiko Siti, Meksiko, from wok blong papa blong hem.
“Blong stap lanem Inglis, i bin wan bigfala blesing,” hem i talem. Mo taem hem i groap long gospel, i bin letem hem blong developem testemoni blong hem mo rere eli blong go long wan misin. Afta we hem i go long Brigham Yang Yunivesiti blong wan yia, Elda Walker i go long wan fultaem misin long Tenesi Nasvil Misin.
Blong helpem papa blong hem blong i kam oraet afta we hem i aksiden, Elda Walker i bin stopem smol ol plan blong hem blong gobak long skul afta long misin blong hem, mo i gobak long Ajentina. Long tetaem ia nao hem i bin mitim Marcela Sulé long wan danis blong institiut. Eit manis afta, long 12 Ogis 1993, tufala i bin mared long Buenos Aeres, Ajentina Tempol. Long nekis dei, yang kapol i muv i go long Provo, Yuta, YSA, mo Elda Walker i bin komplitim digri blong hem long saed blong ekonomi long 1996.
Elda Walker i bin wok tri yia olsem wan man long bank wetem Citibank, mo sikis yia olsem wan kontrola blong Jos long Saot Amerika Saot Eria, mo 11 yia insaed long Meksiko Eria, mo laswan, olsem wan daerekta blong afea blong laef blong wol ia, long Saot Amerika Saot Eria. Long 2010, oli singaotem hem blong i prisaed ova long Meksiko Monterei Is Misin.
Famli Walker, wetem gel blong tufala, oli laekem blong givim seves long ol narawan, blong stap travel, mo kam blong save ol niu ples mo pipol.
Bifo oli singaotem hem olsem wan Jeneral Atoriti Seventi, Elda Walker i bin givim seves long ol defren ples insaed long Jos, olsem wan Eria Seventi, kaonsela long wan stek presidensi, hae kaonsela, bisop, bisoprik kaonsela, mo wan wod misin lida.