Mak L. Pace
Sandei Skul Jeneral Presiden
Wetem wan intaviu we i stret blong wan koling blong wok olsem niufala Sandei Skul Jeneral Presiden blong Jos, Brata Mak L. Pace i bin givim wan komitmen wetem prea.
“Papa long Heven, wanem we Yu wantem mi blong mekem, mi mi glad blong mekem,” Hem i bin prea. “Yu mas save se mi pat long wok ia fulwan.”
Brata Pace i stap talem se, tingting blong hem, long niu koling blong hem, i blong blesem, sapotem, mo leftemap tingting blong ol memba blong Jos. “Yumi wantem givim evri samting we yumi gat,” Hem i bin talem long niu Sandei Skul Jeneral Presidensi.
Mak Leonard Pace i bin bon long 1 Jenuware, 1957, long Buenos Aeres, Ajentina, i go long Lorin Nelson mo Marylynn Haymore Pace. Long taem ia, papa blong Brata Pace i bin stap prisaed ova long Ajentina Misin.
Brata Pace i bin mitim fiuja waef blong hem, Anne Marie Langeland, taem we tufala i skul tugeta long klas tu long Sol Lek Siti, Yuta, YSA. Afta, taem we tufala i stap go long ol defren hae skul long siti, tufala i joen bakegen long wan kombaen seminari aktiviti. Tufala i bin stap raet long tufala blong ol nekis yia we i kam taem Anne Marie i folem famli blong hem i go long Norwe, long ples we papa blong hem i prisaed ova long Norwe Oslo Misin, taem Brata Pace i wok long Spain Madrid Misin. Tufala i mared long Sol Lek Tempol long 21 Novemba, 1978, mo tufala i papa mo mama blong seven pikinini.
Brata Pace i graduet wetem wan bajela digri long ekonomi long Yunivesiti blong Yuta long 1980 wetem wan masta long bisnis administresen digri long Harvard Bisnes Skul long 1982. Afta long wan sot wok wetem Praes Wotahaos long Niu Yok Siti, Hem i joenem Boyer Kampani long Sol Lek Siti, mo stap wok long bisnis blong salem ol haos stat long 1984 go kasem 2012. Folem wan tri-yia asaenmen olsem presiden blong Spen Barselon Misin, Hem i joenem Gardner Kampani long 2015, blong mekem ol ril estet divelopmen.
Long taem blong niufala koling blong hem, Brata Pace i stap wok olsem wan Eria Seventi. Ol koling blong Jos blong hem blong bifo, hem i bin wok long wan stek presidensi, hae Kaonsela, bisop, kaonsela long wan bisoprik, presiden blong kworom blong ol elda, wod Yang Man presiden, mo Skaotmasta.