Japta 1
Putum Tugeta Wan Kampani
Plante taosen blong ol Lata-dei Sent oli stap kwaet wantaem, taem we voes blong Lusi Mak Smit i bin saon tru long bigfala asembli rum long fasfala floa blong Nauvu tempol, we kolosap i finis.
Hem i long moning blong 8 Oktoba 1845, nambatri mo las dei blong las yia konfrens blong Jos blong Jisas Kraes blong Ol Lata-dei Sent. Hem i save se bae hem i nomo gat wan moa janis blong toktok long olgeta Sent—speseli we, naoia oli plan blong aot long Nauvu i go from wan niu hom longwe long Wes—Lusi i toktok wetem paoa we i bitim bodi blong hem we i gat seventi yia.
“Hem i eitin yia i pas, long twantetu Septemba, we Josef i bin tekemaot ol buk ia aot long graon,” hem i testifae, “mo i bin eitin yia, long las Mandei, we Josef Smit, profet blong Lod—”1
Hem i stop smol, i tingbaot Josef, boe blong hem we oli kilimded hem from bilif blong hem. Olgeta Sent long rum, oli bin save finis olsem wanem wan enjel blong Lod i bin lidim hem i go long wan buk we oli wokem long gol, we oli bin berem long wan hil we oli singaotem Kumora. Oli bin save se Josef i bin transletem ol buk ia tru long presen mo paoa blong God, mo i bin pablisim histri ia olsem Buk blong Momon. Be yet, plante Sent long asembli ia, ?i tru se oli bin save gud hem?
Lusi i save tingbaot yet taem we, Josef, we i gat twantewan yia nomo, i talem long hem, blong fas taem, se God i bin givim ol buk ia long hem wetem tras. Hem i bin wari ful moning ia, hem i fraet se bae hem i go long hil ia, i kambak emti han, olsem we hem i bin mekem long ol las fofala yia. Be taem hem i kasem haos, hem i mekem tingting blong mama blong hem i kwaet. “Yu no tingting tumas,” hem i talem. “!Evri samting i gud!” Afta, hem i givim long mama blong hem ol intepreta we Lod i bin givim blong transletem ol buk ia, we oli kavremap long wan hankijif, olsem wan pruf se hem i bin gotru blong karem histri ia i kam.
I gat wan smol namba blong ol pipol we oli bin biliv long tetaem ia, mo plante long olgeta oli kamaot long Smit famli. Naoia, moa long leven taosen Sent long Not Amerika mo Yurop oli bin laef long Nauvu, Ilinoa, ples we Jos i bin kam tugeta blong ol las sikis yia. Sam long olgeta oli bin niu long Jos, mo oli no bin gat janis blong mitim Josef, o brata blong hem, Haeram, bifo wan grup blong ol nogud man oli bin sutum mo kilimded tufala man ia long Jun 1844.2 From hemia nao Lusi i bin wantem blong tokbaot ol dedman. Hem i bin wantem blong testifae abaot koling blong Josef olsem wan profet, mo rol blong famli blong hem blong putumbak gospel ia, bifo ol Sent oli muvaot.
Blong moa long wan manis, ol strong grup blong ol nogud man oli bin bonem daon ol hom mo ol bisnis blong Ol Sent long ol ples we oli bin stap long hem. From se oli fraet se bae oli lusum laef blong olgeta, plante famli oli bin ronwe i go long sef ples ia, Nauvu. Be ol grup blong ol nogud man ia, oli kam bigwan moa mo oli moa oganaes taem we ol wik oli stap pas i go, mo i no longtaem ol faet wetem ol tul blong faet oli stat blong brokaot bitwin olgeta mo olgeta Sent. Stet mo ol nasonal gavman oli no bin mekem wan samting blong protektem ol raet blong olgeta Sent.3
From se oli biliv se bae i no longtaem ol grup blong ol pipol bae oli atakem Nauvu, ol lida blong Jos oli bin go mekem smol pis, blong agri se bae ol Sent oli aot long kaonti ia bifo springtaem i finis.4
Wetem revelesen we i kam long heven blong lidim olgeta, Brigham Yang mo ol nara memba blong Kworom blong Olgeta Twelef Aposol, oli plan blong muvumaot olgeta Sent moa long wan taosen mael i go Wes, i go bitim ol Roki Maonten, jes aotsaed long boda blong Yunaeted Stet. Olsem prisaeding kworom blong Jos, Olgeta Twelef oli bin anaonsem desisen ia i go long ol Sent long fas dei blong konfrens long Oktoba.
“Ol plan blong Lod oli stap lidim yumi i go long wan ples we i moa bigwan blong tekem aksen,” aposol Parli Prat i bin talem; “yumi go long wan ples we bae yumi save glad blong laef ol klin prinsipol blong fridom mo ikwol raet.”5
Lusi i bin save se Ol Sent bae oli helpem hem blong go long wokbaot ia, sapos hem i jusum blong mekem olsem. Ol revelesen i bin givim komanmen long Ol Sent blong oli kam tugeta long wan ples, mo Olgeta Twelef oli bin gat strong tingting blong kareaot tingting blong Lod. Be Lusi i bin olfala, mo i biliv se bae hem i no laef longtaem tumas. Taem hem i ded, hem i bin wantem se bae oli berem hem kolosap long Josef mo Haeram, long Nauvu, mo tu, wetem ol nara memba blong famli we oli bin ded finis, mo tu wetem hasban blong hem, Josef Smit Senia.
Antap long hemia, plante long ol memba blong famli blong hem we oli bin laef i stap, bae oli stap long Nauvu. Wan boe blong hem nomo we i laef i stap, Wiliam, i bin wan memba blong Kworom blong Olgeta Twelef, be hem i bin sakemaot olgeta olsem ol lida, mo i no bin wantem go long Wes. Ol trifala gel blong hem—Sofronia, Katarin, mo Lusi—olgeta tu, oli stap nomo. Mekem se waef blong boe blong hem tu, Ema, wido blong profet i stap.
Taem we Lusi i stap toktok i go long kongregesen, hem i askem strong olgeta we oli stap lisin blong oli no tingting tumas long wanem i stap long fored. “Yufala i no slakem tingting mo talem se yufala i no save kasem ol wagun mo ol samting,” hem i talem. Nomata se ol pipol oli bin pua mo oli bin fesem hadtaem, famli blong hem i bin mekem komanmen blong Lod blong pablisim Buk blong Momon. Hem i leftemap tingting blong olgeta blong oli lisin long ol lida blong olgeta mo oli tritim gud olgeta wanwan.
“Olsem we Brigham i stap talem, yufala evriwan i mas ones, o bae yu no kasem ples ia,” hem i talem. “Sapos yu harem se yu kros, bae yu gat trabol.”
Lusi i toktok moa abaot famli blong hem, bigfala agens we oli bin fesem long Misuri mo Ilinoa, mo ol tes we oli stap long fored blong Ol Sent oli fesem. “Mi prea se bae Lod i save blesem ol hed blong Jos, Brata Brigham mo evriwan,” hem i talem. “Taem mi go long nara wol, mi wantem mitim yufala evriwan.”6
Long Jenuware 1846, Brigham i bin mit plante taem wetem Kworom blong Olgeta Twelef Aposol mo Kaonsel blong Olgeta Fifti, wan oganaesesen we i stap lukluk ova long ol mata blong kingdom blong God long wol ia, blong oli mekem plan mo faenem kwik rod blong aot long Nauvu mo stanemap wan niu ples blong kam Ol Sent oli kam tugeta long hem. Hiba Kimbol, fren aposol blong hem, i bin talem se bae oli lidim wan smol kampani blong Ol Sent i go Wes, kwiktaem.
Hem i talem: “Putum tugeta wan kampani we i save lukaot long olgetawan, blong oli rere long eni taem blong go mo rere wan ples blong ol famli blong olgeta mo olgeta we oli pua.”
Aposol ia, Orson Prat i poenemaot: “Sapos i mas gat wan kampani i go mo planem ol krip long springtaem ia, nao bae i mas nid blong oli stat bifo long nambawan Febwari.” Hem i stap askem hemwan sapos bae i no waes moa blong go stap long wan ples we i moa kolosap, we bae i letem olgeta oli planem ol kaekae eli.
Brigham i no laekem tingting ia nating. Lod i bin talem finis long Ol Sent blong go kolosap long Bigfala Sol Lek. Lek ia, i pat blong Bigfala Ples blong Wota, wan bigfala raon ples blong wota, we ol maonten oli raonem. Plante ples long ples ia, oli drae graon nomo, mo bae i wan jalenj blong planem kaekae long hem. Hemia nao i mekem se plante Man Amerika oli no laekem blong muv i go long Wes.
“Sapos yumi go bitwin ol maonten i go kasem ples ia,” Brigham i tingting, “bae i no save gat jalus fasin i kam long eni nesen.” Brigham i bin andastanem se ples ia, i gat ol Manples blong hem oli stap long hem. Be yet, hem i bin hop se Ol Sent bae oli save laef long pis long saed blong olgeta.7