Ol Yang Adalt
Bambae Hem I No Save Fogetem Wok blong Yu
Ol foto oli kam long Getty Images
Sam manis i pas, mi gat wan drim we, mi sidaon long jos long las ro olsem oltaem, mo mi no gat tingting blong tekpat, be nao visen blong mi i jenis. Mi luk se, long medel blong kongregesen ia, i bin gat sam nara misinari we oli kambak hom eli. Tingting insaed long hat blong mi i gro blong mi helpem olgeta, taem mi stap luk raon. Mi save se sapos mi serem ol eksperiens blong mi, bae i wan wei blong givhan long olgeta, mo stap helpem olgeta blong gohed folem kavenan rod ia nomata i gat samting i blokem rod folem rod ia.
Tru long drim ia, Papa long Heven i stap talem long mi se Hem i stap kea. Hem i laekem stret mo gud seves mifala i bin givim olsem ol misinari, i nomata se fultaem seves blong mitufala i stap kasem wetaem. “Oltaem God i stap mekem i stret nomo. Mo hem i no save fogetem ol wok ya” we yufala i mekem from nem blong Hem (luk long Hibrus 6:10) Long atikol blong mi (luk long pej 47), mi serem wan skripja stori mo ol eksperiens blong ol nara riten misinari we oli kambak eli, we oli save helpem yu taem yu stap wokbaot i go long had rod ia. Mi lavem olsem wanem Alex i yusum wan stori long Buk blong Momon blong helpem yumi luk se iven long olgeta we oli gohom eli from sam poen blong fasin blong stap klin inaf, i gat hop yet i stap (luk long pej 44).
Long ol atikol we oli dijitol nomo, bambae yufala i ridim olsem wanem Emily i bin tanem ol filing blong hem blong wari, fraet mo lusum hop i kam wan glad we i blong hemwan mo i tabu. Mo Kevin, we i wan profesonol kaonsela, i givim sam tingting long wei we olgeta we yumi lavem oli save sapotem olgeta we oli stap traehad taem oli kambak eli.
Risen from wanem wanwan i kambak, i no impoten tumas komperem long wanem yumi stap mekem taem yumi gobak hom. Wetem help blong Sevya, yumi save kam oraet, progres mo gohed blong faenem moa glad long wokbaot blong yumi ia we i no save finis.
Wetem tru hat,
Liahona Ficquet