Mifala Ol Witnes Ol Twelef Aposol Tedei
Ol Aposol blong tedei oli serem ol tingting blong olgeta long tabu koling blong olgeta.
Foto pikja i kam long Busath Fotografa
Long 189 yia afta we Jos blong Jisas Kraes blong ol Lata‑dei Sent i oganaes. 102 man oli bin singaotem olgeta i kam blong givim seves olsem ol memba blong Kworom blong Olgeta Twelef Aposol. Olsem we Lod i daerektem i gat fulap jenis i hapen, be stamba wok blong wan Aposol i stap semmak nomo.
Long ofis blong hem kolosap long Tempol Skwea, Presiden M. Russell Ballard, Akting Presiden blong Kworom blong Olgeta Twelef Aposol, i tokbaot ol responsabiliti long saed blong spirit we oli givim long wan Aposol blong oli testifae abaot Sevya raon long wol, mo ol spesel koneksen we oli serem wetem ol misinari, mo sam long ol tingting we yumi gat blong stap olsem “wan aposol,sia, mo reveleta.” Taem oli askem sapos i gat ol nara memba blong Kworom blong olgeta Twelef Aposol we hem i wantem se bae oli tokbaot tabu koling blong olgeta olsem pat blong atikol ia, Presiden Ballard i ansa kwik mo i talem,” Yes. Evriwan long olgeta.”
Lisin mo Andastanem
Bigfala jalenj we ol Aposol oli fesem tedei. Oli givhan long ol kongregesen wol waed we oli stap eksperiensem ol politik problem, famli i brok, problem long sosol media,problem long saed blong mane. Hem i impoten blong ol Aposol i save andastanem ol ol jalenj mo ol samting we ol memba oli fesem.
Olsem ol lida blong Jos, ol Aposol oli mas save ol pipol mo ol samting we oli stap fesem blong oli save givim seves long olgeta moa gud.
Elda Soares i talem, “Yumi nidim blong lanem se ol samting we oli stap spolem laef blong ol nara man.” “Ol Aposol i nidim blong oli stap long semmak proses blong lanem, askem mo kasem insperesen mo revelesen.”
Presiden Ballard i talem, Hem i impoten blong stap wan wetem spirit wetem wanem ol memba oli fesem, hem i moa impoten blong ol Aposol oli lisin long voes blong Lod we i stap lidim olgeta mo blong stap wan wetem tingtingblong Lod. Presiden Ballard i talem, “Hemia i Jos blong Lod, mo stamba jalenj blong yumi i blong stap wetem Hem mo hao nao Hem i wantem yumi blong yumi blong mekem wok blong blong kingdom blong Hem long wol ia.”
Spesel Witnes
Taem wanwan long ol Aposol ia i tokbaot koling blong hem, i kam klia nomo se ol pepawok i no kam faswan blong oli wari long hem. Be stamba responsabiliti blong olgeta i semmak olsem we i stap—olgeta ia i ol “spesel witnes blong nem blong Kraes long ful wol” (luk long D&C 107:23).
Presiden Ballard i talem, Las daereksen blong Sevya i go long ol Aposol blong Hem (luk long Matiu 28:19–20) yufala i mas go “blong tijim, blong testifae, blong baptaesem, mo blong bildim mo mekem Jos blong Hem i kam strong.”
Tedei ol instraksen blong ol Aposol i no jenis. Elda David A. Bednar i talem, “Faswan mo moa impoten wan, evri taem, mifala ol witnes blong Lod Jisas Kraes we i stap laef.” “Mifala i no man blong mekem bisnis;be mifala ol man blong givhan insaed long gospel blong Jisas Kraes.”
Elda Jeffery R. Holland i talem, Ol Aposol oli instraktem olgeta blong “oli ol witnes blong travel” we oli go “raon long wol.” “Mifala i wantem blong go long ol Jos we i stap longwe, blong filim jen we i joen tugeta wetem ol olgeta mo wetem profet blong Lod,” hem i talem. “Samtaem oli stap talem, ‘Jos i mekem wol i smol long hemia.’ From hemia, taem wan Aposol i visit, mifala i hop se hemia nao i stap hapen oltaem.”
Yufala Mas go,mo Tijim Ol Nesen, i kam long Harry Anderson
Kasem Evri Stek
Elda Quentin L. Cook i eksplenem se ova long fo yia taem, evri singgel wod mo stek, distrik mo branj, long Jos i kat wan memba blong olgeta Twelef i stap kam mo gat miting wetem ol lida blong olgeta—mo trenem olgeta long wanem nao profet i putum i kam faswan oltaem.
“Ol lidasip konfrens i letem mifala blong fulfilim ol stamba doktrin blong ‘[bildimap] jos mo [kontrolem] ol samting i semmak olsem ol nara kantri’ [Doktrin mo Ol Kavenan 107:34] anda long daereksen blong Fas presidensi,” hem i talem.
Elda Bedna i talem, olsem wan grup, we i gat rij mo ol gudfala eksperiens we ol memba blong Kworom blong Olgeta Aposol oli bin gat i help blong gaedem ol lokol lida taem oli mekem ol impoten desisen blong leftemap mo sapotem ol memba tru long ol jalenj blong olgeta.
Elda Gong i talem, “Taem mifala i go long ol difren ples, mifala i filim ol gudfala filing blong ol memba.” “Mifala i harem ol eksperiens mo lanem samting we i save helpem mifala blong andastanem mo kaonsel tugeta olsem wan kworom abaot wanem bae i hapen long ol difren pat long wol mo long ol difren grup we i stap insaed long Jos.”
Elda Cook i talem, taem mifala i travel i go long ol lidasip konfrens, “i givim wan janis long mifala blong joen tugeta wetem ol gudfala mo naes pipol.” “Mifala i go long haos blong olgeta, mo gat janis ia blong givhan long olgeta. … Hem i givhan long olgeta Sent we i tajem hat blong mifala moa. Mifala i mekem ol samting ia wetem help blong Tabu Spirit mo Sevya mo wetem save ia we mifala i lanem tru long ol eksperiens, sam we oli tabu tumas blong serem.
I Go long Yu we Yu Stap Rid
Afta 43 yia we hem i stap olsem wan Jeneral Atoriti mo naoia i stap long foti yia long seves blong Kworom blong Olgeta Twelef Aposol, ol wok blong Presiden Ballard i tekem hem i go long fulap kantri raon long wol, i letem hem blong i givhan fes tu fes wetem fulap memba mo misinari. Milian oli lisin long ol toktok blong hem long ol konfrens mo ol divosen. Be taem hem i gat wan responsabiliti raon long wol, Tabu Spirit i letem hem blong i konek wetem mo blesem wanwan man mo woman. Hemia nao wei blong Sevya, hem i talem. “Samtaem bae mi kasem wan leta long wan man bae i talem, ‘Mi bin stap long wan miting, mo yu bin talem wan samting we i jenisim laef blong mi.’ Hemia i paoa blong Tabu Spirit. Lod i luk save Jos blong Hem.”
Elda Bedna i talem, i gat “fulap swit, simpol eksperiens wetem ol memba blong Jos raon long wol” we i soem tru mining blong stap givhan olsem wan aposol. “Lod i sendem wan memba blong Kworom blong olgeta Twelef long wan ples we oli nid blong go long hem, long wan stret taem we ol fetful Lata-dei Sent mo ol nara man i stap traehad o oli nidim kamfot mo blong oli leftemap olgeta. Elda Bedna i talem, God i oganaesem ol kam tugeta ia.”
Elda Ronald A. Rasband i talem se afta we oli singaotem hem blong kam wan aposol, hem i lanem se hem i nidim blong ademap ekstra taem long evri aktiviti long laef blong hem mekem se hem i save welkamem ol memba blong Jos mo ol nara wan. Hem i talem, “Hem i no abaot mi.” “Hem i abaot ol gudfala risal mo ona we ol memba blong Jos ia i holem long ofis blong aposol sip.”
Elda Rasban i talem se long taem we oli odenem hem i kam aposol, oli instraktem hem blong, “‘Mifala i putum yu long posisen ia blong yu kam wan spesel witnes long nem ia blong Kraes long ful wol … evri taem mo long evri samting.’ Ol toktok ia oli putum long odinesen blong mi: ‘evri taem mo long evri samting.”
Presiden Ballard long Spen
Elda Holan long Inglan
Elda Uchtdorf long Rusia
Elda Bednar long Peru
Foto i kam long Juan Antonio Rodriguez (Spen), Simon Jones (England), Luis Antonio Arroyo Abando (Peru), Christen Albo (Argentina), Dalene Griffin (Mexico), Alwxandre Borges (Brasil)
Wan Impoten Rilesensip
Ol Aposol mo Jos i gat 70,000 plas ful-taem misinari i serem wan tabu wok, iven oli dipen, rilesensip.
Elda Dale G. Renlund i eksplenem, toktok ia aposol i kam long Grik toktok ia we i minim “blong oli sendem.” Long semfala wei we Lod i givim oda long ol disaepol blong Hem bifo, yumi tu, yumi kasem wok ia long ol las dei blong “mas go long evri ples long wol, [yumi] talemaot gud nius blong [Hem] long olgeta man. Hem we i bilivim mo i kasem baptaes, bae i sef.” (Mak 16:15–16).
Presiden Ballard i talem, long komanmen ia, ol Twelef oli “putum ful laef blong olgeta” long misinari wok mo givimaot ol mesej blong gospel.
Olsem Pol, ol Aposol blong tedei oli mekem wetem ful hat blong olgeta mekem diuti blong olgeta blong serem gospel wetem wan narafala. Mo, long wei blong wan aposol, ol misinari oli sendem olgeta raon long wol blong tijim gospel blong Kraes Elda Bedna i talem, “Hem i olgeta Twelef ia we oli eksasaesem ol ki blong olgeta we oli gat, we oli asaenem olgeta i go long misin blong olgeta. “Mekem se mifala i sendem olgeta.”
Lod i stap nomo olsem wan daerekta gaed blong misinari wok. Hem i letem ol Aposol blong Hem we i stap laef, blong asaenem long difren taem blong givim seves long Misinari Eksekutiv Kaonsel, blong oli save toktok long wanem Hem i wantem long ol fultaem misinari we oli stap wok long fil. Elda Bedna i talem, wok ia i go bitim blong “ranem wan oganaesesen.” Ol Aposol oli holem oli prishud ki blong kam tugeta blong Isrel. “Yumi stap givim ae long saed blong spirit mo daereksen blong mekem se wok i go olsem we Lod i wantem” hem i talem.
Elda Dieter F. Uchtdorf nao i lukaotem Misinari Eksecutive Kaonsel. I stap antap long tebol blong hem i gat wan smol brons pikja ston blong tu misinari kompanion we oli stap hariap blong go long wan apoenmen long baeskel blong tufala. Eni taem hem i lukluk pikja ia , i rimaenem hem long koneksen ia we i no save brok bitwin ol Aposol mo ol misinari. Evriwan long ol 70,000 misinari oli stap mekem tabu seves ia mo Lod nao i singaotem olgeta tru long wan leta we i kam long profet blong God blong oli ripresentem Sevya. Olgeta oli ol nara han blong olgeta Twelef.”
Presiden Ballard i talem. “Taem mifala i gat taem, mifala i mitim olgeta.” “Mifala i letem olgeta i askem ol kwestin. Mifala i traem blong helpem olgeta blong faenem,tijim, baptaesem, mo mekem ol pikinini blong Papa long Heven i kam strong.”
Oli wok tugeta, tufala grup oli sendem olgeta blong serem gospel mo gudfala nius raon long wol. Elda D. Todd Christofferson i talem, “Mifala i luk ol ful‑taem misinari olsem ol kompanion blong mifala.”
Ol tingting we i no stret
Elda Gary E. Steveson i talem, bae i gat sam man aotsaed bae ol ting se Jos i wan koperesen, aposol sip, “I no olsem wan bisnis,eksekutiv, be hem i difren.” “Rol blong wan Aposol blong Lod Jisas Kraes i wan wok blong givhan, rol blong wan pasta.” Rol blong stap olsem wan witnes blong Jisas Kraes long wol i “talem long mifala mo i talemaot huia mifala.”
Elda Neil L. Andersen i talem se long Kworom blong Olgeta Twelef Aposol, i nogat ol grup, blong fosem man, o ol paoa senta. I gat “ol difren tingting,” be “i nogat blong ting tingbaot yuwan.”
Elda Andersen i talem, Lod i putum fulap man tugeta, oli kam long ol difren wok mo difren bakgraon. Be “ol testemoni blong olgeta abaot Sevya i semmak mo tingting we i stap daon. Oli no traem blong kam antap, oli no traem blong luk se hu nao i moa waes long rum. Lod i save wok wetem hemia. Mi neva luk eniwan [long olgeta Twelef] i kros, mo i putum wan daon.
Elda Uchtdorf i talem, putum tingting i stap daon i soem aposol sip. Koling blong olgeta i mekem oli luk save olgeta evri ples we oli go long hem, “be yumi save se i no abaot mifala—hem i abaot Hem. Mifala i ripresentem Hem. … Hem i abaot bigfala lav blong Hem.”
Elda Cook long Ajentina
Elda Kristofeson long Meksiko
Elda Andersen long Brasil
Elda Rasband long India
Oli Singaotem Mifala blong Givim Seves
Afta long ded mo girap bakegen long ded blong Sevya, Hem i instraktem ol disaepol blong Hem blong 40 dei mo afta Hem i go long heven. I gat wan spes i stap long Kworom blong Olgeta Twelef Aposol—we i kam tru long giaman toktok mo ded blong Judas Iskariot—ol memba blong kworom oli kam tugeta mo askem Lod.
Tu man, Matias mo Basabas, nao oli jusum olgeta, mo ol Aposol oli prea se Lod bae i soem “weswan long tufala ya we yu jusumaot finis, … oli sakem ol spesel ston blong faenemaot se hu long tufala bambae i holem wok ya, nao nem blong Matias i kamaot, oli kaontem hem wetem olgeta leven aposol” (luk long Ol Wok 1:23–26)
Elda Renlund i eksplenem, Bifo mo naoia, “blong kam olsem wan aposol i no wan samting we yu winim o blong kasem.” “Hem i no wan koling we yu kasem. Matias, long Ol Wok japta 1 God nao i jusum hem be i no Basaba. God i no talem long yu from wanem. Be wan samting yumi sud save se testemoni blong Basaba we i givim ona i go long Sevya mo long Girap bakegen blong Hem long ded i semmak nomo olsem hemia blong Matias.
God nao i jusum, hem i eksplenem. “Sapos Basabas i fulfilim wanem koling hem i gat, riwod blong hem bae i no difren long hemia we bae Mathias i kasem,spos hem i mekem koling blong hem.
Presiden Ballard i talem, Olsem Basaba testemoni blong hem i semmak nomo long hemia blong Matias, evri memba blong Jos oli gat raet blong save “mekem wan rilesensip olsem wan aposol wetem Lod.”
Elda Uchtdorf i talem, Seves i go long Lod mo Jos i “wan spesel samting mo wan blesing.” Elda Uchtdorf i talem, Hem i wan ona.” “Lod i soem lav blong Hem long yumi, mo yumi soem lav blong yumi long Lod blong mekem eni samting Hem i askem yumi blong mekem.”
Wan Tabu Eksperiens
Elda Andersen i talem, Blong pat blong stap travel olsem wan hae wok i wan tabu eksperiens. “Taem yumi serem testemoni, testemoni ia i go long hat blong ol pipol, insaed, from se oli odenem mifala.”
Elda Christofferson i talem se long stat long ministri blong hem olsem wan aposol hem i fraet long wanem bae i kam mo wanem bae hem i mas mekem. Be hem i kasem wan simpol mesej we i kam long Lod: “Fogetem yuwan mo wanem nao bae ol pipol oli save tingting long yu, i no mata oli glad long hem o oli no glad o eni samting. Jes tingting strong long wanem Mi wantem givim long olgeta tru long yu. Jes tingting strong long wanem Mi wantem bae oli harem tru long yu.”
Sam yia i pas, Elda Christofferson i visitim Mérida, Venezuela, i gat wan smol boe, we ating bae i gat 7 yia olsem, i luk hem tru long windo mo i stat blong singaot, “El Apostol, el Apostol!” (“!Aposol, Aposol!”).
“Smol samting ia nomo we i hapen, i soem long mi se i luk hamas ol pikinini tu oli glad long koling ia,” hem i talem. “Hem i no abaot man we i holem koling. Be pikinini ia i lanem blong talem tangkyu long kol ia mo wanem kol ia i ripresentem.”
Elda Rasband long India; Elda Stevenson long Hong Kong; Elda Renlund long Brasil, Elda Gong long Shangae, Jaena; Elda Soares long Brigham Yang Yunivesiti
Foto i kam long Wendy Gibbs Keeler (India), Clebhea Tex (Brasil), Monics Georgina Alvarado Zarate (Shangai), Janae Bingham (BYY)