Ol lesen insaed long Niu Testeman

Ol Aposol oli Ol witnes blong Jisas Kraes—mo !Yu Save Kam Wan Tu!

I Kam long Heather White Claridge

Ol Magasin blong Jos

Foto pikja i kam long David Stoker

Traem tingbaot se yu mo wan fren i stap kakae lanj long skul. Fren blong yu i rere blong openem wan loli taem wan man i wokbaot i go stret long hem mo talem se hem i stilim loli ia mo askem blong hem i “givimbak.” Yu bin stap wetem fren blong yu taem hem i pem loli ia, be nomata se yu fraet, yu talem long man ia se fren blong yu i no wan stilman.

Spesel Witnes

Blong stanap from trutok olsem, oli save singaotem se “stap wan witnes.” Long eksampol ia, bae yu save stap wan witnes blong gudfala fasin blong fren blong yu. Olsem we yu save stap wan witnes blong fren blong yu, God i bin singaotem ol profet mo aposol blong stap ol spesel witnes blong Pikinini blong Hem Jisas Kraes. Oli “sendemaot ol Aposol wetem sam spesel atoriti mo responsabiliti”¹ blong tij, testifae, mo givim seves olsem “ol spesel witnes blong nem blong Kraes long ful wol” (Doctrine and Covenants 107:23).

I no longtaem afta we Kraes i bin girap bakegen long ded, Hem i bin singaotem ol Aposol blong stap ol witnes blong Hem (luk long Ol Wok 1:8). Taem yu stadi Ol Wok insaed long Niu Testeman, yu save ridim plante stori taem ol Aposol oli bin stap testifae se Jisas Kraes i Pikinini blong God (luk long Ol Wok 2:36; 5:27–32; 10:36–44). Ol Aposol blong tedei oli gohed wetem koling ia olsem ol spesel Witnes—jes lisin long eni jeneral konfrens mo bae yu luk olsem wanem oli testifae long Kraes.

Tabu Spirit i testifae long Kraes

Sam Aposol long Niu Testeman oli bin stap wetem Kraes taem Hem i bin stap long wol mo oli bin luk taem Hem i bin gobak long Heven (luk long Ol Wok 1:9–11), mo ol Aposol tedei oli save luk Kraes,² be i no se luk Jisas long ril laef i mekem wan man i kam witnes blong Hem. Presiden Joseph Fielding Smith (1876–1972) i talem, “[Tabu Spirit] i rod ia nomo we wan man i save kam blong save tru se Jisas i Kraes mo we gospel blong Hem i tru.”³ Hemia i minim se nomata ol Aposol i bin luk Kraes, oli save se Hem i Sevya from !Tabu Spirit i bin talem long olgeta!

Yu Save Stap wan Witnes

Samting we i moa intresting i we yu kasem promes tu se yu save kam blong save se Jisas Kraes i Sevya blong yu hemia tru long Tabu Spirit (luk long Doctrine and Covenants 46:13). !I no wan samting we ol Aposol nomo i save kam blong save! Nomata se oli no singaotem yu blong stap wan spesel witnes blong Kraes, yu save lukaotem wan testemoni abaot Kraes mo stap witnes blong Hem long ol pipol we yu save long laef blong yu. Yu save folem komanmen blong Sevya we i givim long Pita: “Taem yu kam insaed long Jos finis, mekem [ol brata mo sista] blong yu oli kam strosng moa” (Luk 22:32).

Ol Not

1. Gordon B. Hinckley, “Special Witnesses for Christ,” Ensign, May 1984, 50.

2. Luk long Boyd K. Packer, “The Witness,” Liahona, May 2014, 97; luk tu long Lorenzo Snow, “A Visit from the Savior,” Liahona, Sept. 2015, 80.

3. Joseph Fielding Smith, Answers to Gospel Questions, comp. Joseph Fielding Smith Jr., 5 vols. (1957–66), 3:31.

Olsem Wanem blong Kam wan Witnes blong Jisas Kraes

• Gat wan “hat blong wantem tumas blong biliv” (Alma 32:27).4

• Stadi abaot Sevya insaed long ol skripja.

• Prea mo askem blong Tabu Spirit i konfemem se Kraes i Sevya blong yu.

• Stadi Niu Testeman mo makem taem we ol Aposol oli bin stap ol witnes.

Wan Spesel Witnes

Mi mi wan spesel witnes blong Jisas Kraes. Witnes ia i stat taem wan sid i gro tru ol tijing blong ol profet blong bifo mo tedei. I bin gro i kam wan strong testemoni blong Restoresen blong gospel blong Jisas Kraes. … I bin givim mi wan bigfala glad mo pis mo wan tru rilesensip wetem Jisas Kraes. Mi save Hem i laef mo Hem i lavem yumi. Hem i Sevya mo Ridima blong yumi. Mi witnes long samting ia.”

Elda Gary E Stevenson blong Kworom blong Olgeta Twelef Aposol, “Ol Profet oli Soem Yumi Rod blong kasem Hapines mo Laef we I No Save Finis,” Ol Spesel Witnes blong Kraes (video), lds.org/prophets-and-apostles.