Leta we i kam long wan Brata we i gat Lav
Hem we i raet i stap long Yuta, YSA.
Bigfala brata blong mi i no bin stap long 16 betdei blong mi from hem i bin go long wan misin. Be advaes we hem i bin givim long mi i bin wan presen we i spesel mo bae mi tingbaot oltaem.
!Sikistin! !Wan taem blong laef ia we! “I nogat wan man we i save mekem hemia hemwan,” mi ting.
Waes mama mo papa blong mi oli bin kaen mo oltaem givim mi gudfala kaonsel. Bigfala sista blong mi i jes mared mo i bin muvaot long Amerika. Smol brata blong mi tu i bisi wetem hemia blong hem, ol wari blong leven yia. Mi bin gat ol gudfala fren, mo mi save se ol Jos lida blong mi oli bin lukaot gud long mi.
Be bigfala brata blong mi, Gary, hem i brata we mi trastem. Mi lukluk long hem long evri samting olsem wan yangfala. “Enitaem we mi toktok long hem, ol samting i kam moa klia,” mi talem long miwan. “Mi hop se hem i save stap ia naoia.”
Be hem i no stap. Hem i stap longwe long Japan, stap fultaem mekem misinari wok.
Nomata se mi misim Gary, be mi bin gat wan gudfala betdei. Mama blong mi i bin mekem brekfas betdei pati olsem we mifala stap gat oltaem, mo mi bin kasem sam presen bifo mi go long skul. Long naet ia, mi mo famli blong mi, i bin go kakae pitsa mo enap wetem wan betdei kek. Mi stap drim long miwan tu abaot deiting, draeving mo sam nara gud samting we mi save mekem olsem wan sikistin yia boe.
Be, top presen we mi bin kasem long dei ia, i bin wan leta long posofis. !Gary i no bin fogetem supa spesel dei ia! Hemia i bin bifo long ol dei blong imel, from i tekem longtaem blong wan leta blong aot long Japan go kasem Kase Vale, Yuta, YSA. !Mi bin sapraes tumas long leta ia we i kasem stret taem long betdei blong mi! Leta ia oli raetem long han, we i olsem se brata blong mi i stap ia wetem mi taem mi stap ridim.
Dia Merilee:
“Oke, be i luk olsem yu gat wan bigfala betdei we i stap kam ia, ?i tru? Mi ting se taem yu kasem leta ia bae betdei ia i pas finis. Mi no save bilivim—yu kasem sikistin yia. I luk olsem se i no longtaem nating taem we yu bin stap [werem smol red kaoboe hat blong yu].
“Gohed blong stap swit mo klin gud, mo oltaem lego evriwan i save se Jos i minim wan big samting long yu. Sapos yu mekem samting ia, bae yu no save go tru ol situesen we yu mas mekem wan desisen wetem evri agens we ol fren blong yu i stap givim long yu. Eksampol: long hae skul, evriwan i bin se mi no bin wantem blong dring o smok, nogat nao, so oli neva invaetem mi long wan pati we i gat ol samting long hem. Ol fren blong mi oli save se mi no mekem ol samting ia. …
“Sapos yu letem ol pipol i save ol standet blong yu, afta ol pipol wetem ol standet blong yu oli intres long yu. Mi no minim se yu mas talem evriwan, be ol aksen oli toktok moa strong. Spirit blong yu i rili swit, mo nem blong yu i stret long yu. Mo yu gat wan gud filing blong stap glad. !Hapi ‘Swit 16’ Betdei!” Las laen blong toktok hem i bin makem wetem laen long red. !I nogat wan nara betdei presen we i moa gud! Mi bin ridim bakegen mo bakegen, kasem we hem i kambak long Japan mo mitufala i save toktok long mitufala bakegen wan fesem narawan.
Hem i bin sam yia i pas nao, we mi bin kasem leta ia, be mi kipim i stap yet. Plante samting i bin jenis long taem ia, be i no lav blong brata blong mi. Tedei mi sastenem hem i no olsem brata mo fren blong mi nomo, be olsem Elda Gary E. Stevenson blong Kworom blong Olgeta Twelef Aposol. Kaonsel ia we hem i bin givim long mi, olsem wan spesel witnes blong Kraes long ful wol i givim moa paoa long laef blong mi, olsem we leta ia we hem i sendem long mi long taem we mi bin gat Sikistin yia betdei blong mi.