?From Wanem God I No Givim Woning long Mi?

Lark Montgomery

Teksas, YSA

Hasban blong mi mo mi i bin stap laef long yunivesiti graon long Teksas Stet Teknikol Institiut taem tufala fas pikinini blong mitufala i fo mo tu yia. !I bin fas eksperiens blong mitufala long Teksas hil, mo mi lavem! Evri springtaem, flaoa i flatem ples long Sentrol Teksas. Insaed long ol garen, ol bus, ol emti graon, long saed blong rod, evri ples mi luk, i gat flaoa we i tekem flaoa.

Mi tekem ol pikinini blong mi i go ronron kolosap evri dei. Bae mifala i faenem ol niu ples blong go lukluk, mo mi letem ol pikinini oli pikimap plante wael flaoa olsem we oli wantem. Bae mifala i finisim wokbaot long wan ples kolosap, we plante long ol haos oli gat ol gudfala flaoa garen we oli lukaot gud long ol.

Wan dei, mifala i kam long wan kona blong faenem wan bigfala hip blong pepa we oli saksakem krosem wan garen blong flaoa. Kwiktaem win i pulpulum ol pepa i go long ful yad. Mi disaed blong klinim ol doti ia bifo i go olbaot. Mi holem wan hip blong ol pej mo pusum i go long basket.

Taem mi luk i go, mi luksave se mi stap holem ponografi. Mi harem nogud, mi askem ol pikinini blong mi blong stap long pram mo mi pikimap ol nara pej. Mi kam blong harem nogud tumas taem mi luk sam long ol samting ia we mi neva wantem blong luk. Insaed long hat blong mi, mi stat blong komplen: “?From wanem God i no givim woning long mi blong pas long nara rod blong gohom?”

Nao, mi harem saon ia we mi save gud blong ol brek blong bas blong skul. Kolosap 12 pikinini oli kamaot long bas ia. Evriwan oli muv oli pasem yad ia we i bin fulap wetem ponografi smol taem nomo bifo.

Long tetaem ia, mi jenisim wei we mi luk ol samting we i stap. Naoia mi bin save from wanem mi no bin kasem wan woning blong pas long nara rod. Mi talem tangkyu tumas se mi bin stap ia blong pikimap ol pej ia blong mekem se ol pikinini ia oli no luk ol doti pikja ia. Taem mi stap wokbaot i gobak hom, mi tingting: “?Weswe sapos skul bas ia i bin kam afta? ?Bae i olsem wanem sapos mi neva faenemaot from wanem mi bin gat eksperiens ia? ?Bae mi no glad long God blong hamas taem?”

Stat long dei ia, janis ia we Lod i bin givim long mi blong luk “from wanem” saed blong eksperiens ia, i bin helpem mi blong trastem se waes blong Hem mo stamba tingting blong Hem oli bigwan moa bitim miwan.

Samtaem, bae mi save from wanem wan samting i bin hapen; sam nara taem bae mi no save. Be i nomata wanem, mi save se mi mas gat fet se Lod i gat wan bigfala moa stamba tingting we mi no stap luk oltaem.