Stadi, Rid, Luklukbak, Prea. Ripit.
Man we i raet i stap laef long Cautín Province, Chile.
Sapos i no gat wan skolasip, mi no gat inaf mane blong go long kolej.
Ol pikja oli kam long Adam Howling
Long Chile, blong save go long kolej, yu mas tekem wan tes blong gat ples long yunivesiti. Mi bin wantem stadi enjinia long wan yunivesiti we i no stap klosap long ples we mi stap long hem. Bae i sas tumas, mekem se gol blong mi i blong kasem wan hae sko long tes ia blong gat spes long yunivesiti olsem bae mi save winim wan skolasip from top hae sko long eksam.
Mi bin save wea mo wanem mi wantem stadi, mo mi bin save wanem bae mi save mekem blong mekem i hapen Mi bin stat blong rere from tes ia. Mi bin stadi, ridim mo luklukbak ol lesen, be long ol tes we mi bin gat fastaem, yet mi no bin kasem sko we mi nidim. Mi lukluk i go long Papa blong mi long Heven long prea mo askem Hem blong givim mi bigfala waes ia mo givim mi wan klia andastanding blong mi save kasem gol blong mi. Mi bin from hemia evri dei blong wan ful yia. Mi bin go long ol spesel klas blong mekem mi rere long skul, mo mi tekem ol klas long wan skul we i spesel nomo blong rere from eksam.
Mi no stop blong stadi skripja blong mi evri dei, mo mi neva mestem wan dei blong go long seminari. Mi fulfilim evri Aronik Prishud diuti blong mi mo mi neva stadi long ol Sandei, nomata se mi wantem tumas blong mekem. Mi bin save se Sandei hem i dei blong Lod, mo mi bin wantem blong respektem dei ia olsem we papa mo mama i bin tijim mi blong mekem. Mi save se bae i had tumas long mi blong stopem miwan long ol blesing we Papa long Heven i bin gat blong mi, speseli taem ia we mi nidim moa. Nomata evri samting ia, mi no bin kasem sko we mi nidim long ol tes blong mi.
Mi mo famli i bin prea mo livim kakae, mo papa blong mi i bin givim mi wan blesing. Wetem ol fasin ia blong rere long saed blong spirit mo ol narawan, mi bin tekem tes. Mi no bin kasem sko ia we mi nidim nomo, be mi mekem moa bitim gol blong mi, mi bin kasem hae sko long seksen blong matematik. Mi bin kasem skolasip mo ol nara samting we mi nidim, mo mi bin save go blong stadi long yunivesiti ia we mi bin jusum.
Long taem we mi bin yang, mi bin lanem se sapos mi mekem evri samting we mi save mekem mo mekem fastaem ol ting long saed blong spirit, afta bae Papa long Heven i blesem mi. Ol samting bae i no hapen olsem we yumi wantem, be God bae i lukaot long yumi. Mi save se wetem help blong Hem nomo we ol samting bae i save hapen.