?Wanem Nao Bae Yu Faenem Insaed long Buk blong Momon?

I Kam long Elda Gary E. Stevenson

Blong Kworom blong Olgeta Twelef Aposol

I kam long wan toktok blong jeneral konfrens blong Oktoba 2016.

Taem yu faenem taem mo wan kwaet ples blong ridim Buk blong Momon, mi luk yu stap faenem ol ansa, filim han blong givhan, mo kasem testemoni blong yuwan long Buk blong Momon mo wan testemoni blong Jisas Kraes.

Taem yu rid, bae yu openem ol pej blong spesel buk ia mo luk Sevya blong yu we yu lavem, Lod Jisas Kraes, kolosap long evri pej. I soem se sam wei blong talem nem blong Hem oli yusum olsem wan taem long evri 7 ves.¹ Kraes Hemwan tu i bin testifae abaot trutok long ol las dei ia, taem Hem i talem, “Olsem we Lod mo God blong yu i laef, hemia i tru” (Doctrine and Covenants 17:6).

Mi mi talem tangkyu from invitesen mo promes blong Lod we i bin givim tru long profet Moronae i go long wanwan long yumi—mo long evriwan we i ridim Buk blong Momon. “Mo taem we bae yufala I kasem ol samting ia [Buk blong Momon], mi wantem askem strong long yufala se bae yufala i askem God, Papa we i no Save Finis, long nem blong Jisas Kraes, sapos ol samting ia i no tru; mo sapos bae yufala i askem wetem wan tru hat, wetem tingting we i tru blong wantem save, wetem fet long Kraes, bae hem i soemaot trutok blong ol samting ia long yufala, tru long paoa blong Tabu Spirit” (Moronae 10:4; luk tu long ol ves 3, 5).

Ol trutok we bae yu faenem long Buk blong Momon bae i leftemap mo givim yu insperesen. Bae oli mekem fet blong yu i kam strong moa, fulumap sol blong yu wetem laet, mo rere long yu blong wan fiuja we yu no save andastanem gud.

Wetem ol pej blong buk ia, bae yu faenem lav ia we i nogat en mo wan gladhat blong God we i no isi blong andastanem. Taem yu traehad blong folem ol tijing we yu faenem long ples ia, bae yu glad bigwan, save blong yu bae i kam antap, mo ol ansa we yu lukaotem from ol plante jalenj we yu gat long laef ia bae i open long yu. Taem yu luk long buk ia, yu luk long Lod.