“Yu Nid blong Aot long Ples Ia”
Hem we i raetem hemia i stap long Antofagasta, Jile.
Nomata se mi fraet blong muv i go long Not blong Jile wetem famli blong mi, drae ples i bin kam afta graon blong promes blong mifala.
Ol foto blong Concepción, Chile, i kam long Getty Image
Taem mi bin ridim Buk blong Momon abaot Nifae olsem wanem hem i oltaem sapotem papa blong hem we i man blong luk visen, mi endap blong talem se plante yut long Jos ating oli olsem Nifae. Be taem famli blong mi i disaed se mifala i nidim blong muv i go long drae ples, mi bin filim moa olsem Leman mo Lemyul. Mi no wantem aot long hom blong mi.
Olsem Nifae mo ol brata blong hem, mi bin “bon long wan gudfala mama mo papa” (1 Nifaei 1:1). Tugeta tufala i joenem Jos taem tufala i yangfala, mo mama blong mi i bin wet long papa blong mi taem hem i bin go long wan misin. Tufala i bin aktiv, mo hadwok memba blong Jos.
Taem we mi bin stap long hae skul, ekonomi (mane) i bin go daon plante long eria blong mifala long Konsepsion, Jile. I nomo gat wok, mo i stat blong kam wan problem blong papa blong mi i faenem wok. Long en hem i stat blong go aot long taon mo lukaotem wok.
Hem i lukaotem wok go kasem not siti blong Kalama, eria blong maen long Jile. Hem i wan enjinia blong bilding, mo hem i faenem wan wok longwe. Be hem i bin stap hemwan mo moa longwe. Mifala i save luk hem nomo taem we hem i save mekem blong kam hom long bas blong 32 aoa.
Afta sam yia we mi save luk papa blong mi blong tu o tri taem long wan yia, mama blong mi i bin filim se i bin taem blong mekem wan jenis. Papa mo mama blong mi i endap blong talem se haf long ol famli blong mifala i nid blong muv i kam long not.
Yumi Nidim blong Stap wetem Papa blong Yumi
Yang brata blong mi i no gat problem blong muvaot. Mo bigfala sista blong mi, we i stap kolej, i bin wan gud eksampol long mi.
“Bae mi sakrifaesem ol stadi blong mi,” hem i talem. “Yumi nidim blong stap wetem papa blong yumi.”
Evriwan i sapotem tingting ia blong muvaot be mi nomo. Mi wantem blong stap wetem papa blong mi tu, be mi no wantem blong mekem ol jenis mo mekem ol sakrifaes miwan. Mi bin gat ol fren, mi save gud eria we mi stap long hem, mi laekem wanem we mi stap mekem finis, mo mi wantem blong go long kolej long Konsepsion. Mi bin mekem evri samting blong stopem mama blong mi blong mifala i no go.
Hem i talem long en se, “Boe, papa blong yu i stap hemwan. Hem i wantem yumi blong go stap wetem hem. Mi hop yu andastanem, be yu stap lukluk long yuwan nomo.” Afta hem i talem long mi, “Bae yumi gat ol janis longwe.”
Long hat blong mi, mi bin save se hem i tru—nomata se hed blong mi i strong yet. Mi no bin gat wan strong testemoni long taem ia, be mi bin disaed blong prea blong save sapos mifala i mas go wetem famli blong mi. Wan klia ansa i kam long mi: “Yu Nid blong Aot long Ples Ia.” Mi bin harem nogud, be mi talem long papa mo mama se bae mi go.
?Wehem Ol Tri?
Konsepsion hem i ples we i gat plante tri. I stap gat 127 sentimita blong ren long evri yia. Antofagasta, siti we mifala i muv i go long hem i stap kolosap Kalama, oli kasem nomo 25 sentimita ren evri yia.
Samting we i tajem mi moa abaot muv ia, hem i trip ia. Taem mifala stap go long not wetem bas, mifala i luk jenis ia stat long grin i go long braon, we i nogud nating. Mi tingting nao, “?Whem ol tri? ?Whem ol buluk long saed blong ol rod?” Wanem we mi luk nomo, hem i ol doti, ol ston, mo ol hil.
I klia se not blong Jile i wan drae ples, ?bae mi wantem wanem moa? Mi tingbaot bakegen olsem wane Leman mo Lemyuel i bin filim taem famli blong Lihae i bin aot long graon blong ol bubu blong olgeta mo long drae ples.
Mi bin fraet plante taem mifala i kasem Antofagasta. ?Wanem bae i hapen sapos yumi no gat fren? ?Wanem bae i hapen sapos yumi no laekem eria ia? ?Wanem bae i hapen sapos hop blong mi blong fiuja i no kam tru?
Long en, mi no sud wari. Mama blong mi i talem tru abaot ol janis we i stap blong mifala—speseli nao ol janis long saed blong spirit.
Bifo mifala i muvaot, gospel i no bin impoten long mi. Lod i stap biaen long evri samting. Be long Antofagasta, ol pipol we mi kam blong save, oli bin helpem mi blong luk hamas gospel i naes tumas. Mi kasem help long ol prishud lida. Mi gat ol fren we oli spesel long mi tedei. Laef blong mi long saed blong spirit i jenis fulwan.
Serjio i visitim ol fren long institiut.
Mi glad, mi lisin long mama blong mi. Mi glad, Lod i bin ansa long prea blong mi. Mi glad, mi bin tingting strong blong muvaot i go long not wetem famli blong mi.
Long ples ia long drae ples ia nao we mi mekem ol jenis we mekem huia mi tedei. Ples ia nao we mi mekem komitmen blong aplaem gospel, mekem wan misin, mared long tempol, mo dediketem laef blong mi i go long Lod. Ples ia nao mi kam blong save se mi nomo wantem blong kam olsem Leman mo Lemyul.
Blong mi mo famli blong mi, drae ples i kam promes graon.