Ua Na’o Tusiga Faatekinolosi: Talavou Matutua
O le Auala na Ou Aoao ai e Tali Atu Pe a Fai Mai se Tasi o loo Latou Tauivi ma Ponokalafi
E alala le tusitala i Iuta, ISA.
Na ou iloaina mo ni masina sa i ai se mea o loo tupu, a e pe ana le oo mai i le taimi lenei e le tauina leotele mai ia te a’u le mea moni: sa ia tauivi ma ponokalafi mo le tele o tausaga, i le taimi atoa lava na ou masani ai ia te ia.
A o nofo ai i totonu o le taavale ma faalogologo atu i lana faamatalaga, sa ou loto faafetai. Aua nei ave seseina a’u—sa loloto le tiga i le iloa sa ia tauivi mo se taimi umi e aunoa ma lo’u iloaina—ae sa ou fiafia sa ou i ai i se tulaga e mafai ona ou tali atu ai ma le alofa nai lo le faamasino.
O Le Le Agalelei E Le Faamaonia Lava
O ni isi o taimi, o le malamalamaaga faapea e leaga ponokalafi, e mafai ona aafia ai a tatou vaaiga i isi. Ou te iloa na aafia ai la’u vaaiga i se tasi taimi. A o o’u laitiiti, ou te faalogo e uiga i tagata o loo tauivi ma ponokalafi ma o o’u lagona i totonu o le ita ma oo lava i le inoino. Ae ina ua ta’u mai e la’u uo ia te a’u e uiga i ona tauiviga, sa ou i ai i se tulaga sili atu e faamafanafana ia te ia ona sa ou tuputupu a’e ma iloa a’u agasala ma vaivaiga i le aluga o tausaga.
Ua ou iloa nei o le le agalelei e le faamaonia lava. O Iesu Keriso, o lo tatou faataitaiga atoatoa, sa saili atu i tagata o e sa itagia e isi. Na Ia talanoa faatasi ma tagata Samaria ma tagata agasala. O Keriso, o Lē e le mafai ona “vaai i luga o le agasala ma sina tikeri itiiti o le faatagaina” (Mataupu Faavae ma Feagaiga 1:31), e silasila mai “ia i tatou, i lo tatou le atoatoa, e aunoa ma le aluese atu i le inoino ma le ita.”1 O le faia o lena talanoaga loloto ma la’u uo, sa ou taumafaufau pe faape’i ona tali atu Iesu. O le tala i le fafine na maua o mulilua na fesoasoani ia te a’u ia ou iloa le ala e tali atu ai.
Tali atu ma le Agaalofa
O le au tusiupu ma le au Faresaio o e sa ola i le tulafono a Mose i le taimi o le galuega a Iesu e lei tele so latou agaalofa. Sa i ai ni faasalaga patino lava, e tele ina matua saua sa atofaina mo agasala, ma o le mulilua e tatau i ai le fetogi i ma’a. Ae ina ua aumai le fafine talitane ia Iesu, e le’i inoino o Ia—sa Ia faaali ia te ia le agaalofa. Nai lo o le faamalo atu i e na molia mai o ia i le mauaina o se tasi o faia le faatinoga, na Ia faamanatu i ē na molia maia o ia, a latou lava agasala (tagai Ioane 8:3-7). O le mea moni lava, tatou te “agasala uma lava, ma ua le oo i le viiga mai le Atua” (Roma 3:23}. E le’i ta’usalaina e Keriso le tagata agasala, ma e le tatau foi ona tatou faia (tagai Ioane 13:34-35).
Ina ua o ese ē na molia maia, ua lofituina e latou lagona tausalaina, ona fetalai atu lea o Keriso i le fafine. E itiiti ana upu, ae na loloto. Na Ia mua’i fesili atu, “Funa e, o ifea ea i latou e na molia oe? ua le faasala mai ea se tasi ia te oe?” Ma ina ua ia tali mai ua latou o ese atu, ona Ia fetalai atu lea, “Ou te le faasala foi ia te oe; alu ia oe, aua e te toe agasala” (Ioane 8:10–11).
O le faasalaina semanu e le fesoasoani i lenei fafine ina ia suia, ae sa silafia e le Faaola e mafai e le alofa ona suia.
Alu, Aua E Te Toe Agasala
O le alofa o le laasaga muamua lea e fesoasoani ai i se tasi e faatoilaloina ponokalafi. O le faagasologa o le faamaloloina e tulaga ese e pei foi o le tagata, ae o loo i ai ni laasaga patino e manaomia ona tauaveina e i latou o loo tauivi. Uunaia i latou ina ia feiloai ma a latou epikopo, o le a i ai ia te ia punaoa ma mea faigaluega e fesoasoani ai. Pe a talafeagai ai, fesoasoani ia i latou e faailoa mea e mafua ai ma fausia se fuafuaga ia fesoasoani ia i latou ia alo ese mai ia mea. Uunaia i latou e vaai se tagata tomai faapitoa pe auai atu i se vaega lagolago. Ma ia faaauau pea ona alofa atu ma lagolagoina i latou i laasaga uma o le ala.
Na faailoa atu e Keriso le alofa i le fafine ma faamautinoa atu ia malamalama o ia e Na te le mana’o ia te ia ia faaauau i ana agasala. O le alofa mama moni e le faapea tatou te le amanaia mea sese a isi; ae, e afua ai ona tatou vaaia o latou gafatia ma uunaia i tatou e fesoasoani atu ia i latou e agai i luma.
O se Faigamalaga o le Faatuatua
Sa i ai lava lo’u alofa i la’u uo, ae sa sili atu lo’u alofa ia te ia i le mavae ai ona ia faamatalaina lana mea lilo. Pe o le a lava le mea ua e faia po ua faia e se pele ia te oe, “E le mafai ona e magoto maualalo ifo nai lo le susulu malamalama le gata o le Togiola a Keriso.”2
Afai e te iloa se tasi o loo tauivi ma ponokalafi, aua e te tuulafoaia i latou! Aapa atu ma le alofa ma le agaalofa faapei ona faia e le Faaola. O le a le faigofie lava; e le o ese faafuasei atu nei tauiviga. Ia onosai i e pele ia te oe, ma onosai foi ia te oe lava ia. O le aoaoina ia alofa atu ma malamalama ai i se tasi o loo savalia se mea ua sili ona faigata e le o taimi uma e manaia pe faigofie ai. Ae ou te talitonu o le alofa uma tatou te tuuina atu e le faapea o le a le aoga, tusa lava po o le a le umi po o le a foi le taunuuga o le faigamalaga a se pele ia i tatou.