O le Luʻi o le Malumalu

Saunia e Sister Joy D. Jones

Peresitene Aoao o le Peraimeri

“O le a liliu atu loto o fanau i o latou tamā” (Mataupu Faavae ma Feagaiga 2:2).

I se tasi Aso Sa na matou asiasi ai ma ou fesoasoani i se sauniga a le Ekalesia. Na matou tuuina atu lauga e uiga i le malumalu ma mea taua e tutupu iina. Ina ua maea le sauniga, sa sau se tamaitiiti e 12-tausaga le matua e igoa ia Colby ia te au ma lulu loʻu lima. Na ma talanoa e uiga i le malumalu. Ona ou luiina lea o ia e sue se igoa o le aiga e ave i le malumalu.

I se taimi puupuu mulimuli ane, sa ou maua ai se tusi mai ia Colby. O le mea lenei na taʻu mai e Colby ia te aʻu:

“Sa ou alu i le fale ma maua ai se igoa fou. E foliga mai na ou mauaina loʻu tama o tama matua [great-grandfather] lona tolu!

“O se taimi mulimuli ane na ou alu ai i le malumalu ma sa ou papatiso ai mo ia. Sa matuai faapitoa aua na papatiso e loʻu uso au ma na faamauina e loʻu tama aʻu mo ia.

“Sa ou lagonaina se lagona mafanafana i totonu na aumaia ai le filemu. Ou te lagona le fiafia i mea sa ou faia mo loʻu tamamatua aua o le taimi nei e mafai ona alu o ia i le malo selesitila e nonofo ai ma lona aiga. Mo le aso atoa lava, sa ou lagonaina lagona lelei i totonu.

“Na ou iloaina foi e leai se tasi e iloa po o ai matua o le tama o lou tama matua lona tolu, o lea e mafai ona ou sailia o latou igoa ma ave foi i latou i le malumalu!”

Maʻeu le mataʻina o le faataitaiga a Colby! Po o le a lava lou matua, e mafai ona avea oe ma faʻataʻitaʻiga i lou aiga ma uo. E mafai ona e faasoa atu le talalelei i tagata uma e te iloa-e oo lava i ou tuaa!