Le Fefe e Faasoa Atu le Upumoni
Faaa’upegaina i se molimau o le talalelei ma ona faamanuiaga, e le’i faatagaina e Fabian lona talavou e taofi ai ia mai le avea ma se faifeautalai mamana, ma le le fefe.
O loʻo goto le lā i Las Tomas, o se pitonuu na fausia i luga o ni aega oneone e tilotilo atu agai i Antofagasta. I lalo ifo, ua amata ona susulu mai moli a o faaiu le aso i lenei taulaga e tu ai le uafu i le itu i matu o Chile.
O le po o le Aso Toonai, ma o Fabian H. e 13 ona tausaga atonu e mafai ona tafafao faatasi ma ana uo. Ae o Fabian, o se tagata fou o le Ekalesia, ua filifili e faaalu le afiafi faatasi ma faifeautalai faamisiona nai lo lena. O le taimi lenei “e fesoasoani ai e faapotopoto Isaraelu.”1
Mai faifeautalai uma na tuuto atu ma galulue faatasi ma Kellen VanNatter ma Jordan Shelton i le la misiona faamisiona i Chile, o Fabian e tulagaese ai lava.
“Afai e le pisi o ia, e alu faatasi ma i maua e fai galuega faafaifeautalai,” o le tala lea a Kellen. “Ina ua uma le malologa o le tau mafanafana, sa faanoanoa o ia ona e le na o le tatau ona toe foi i le aoga ae ona o le a le tele se taimi e alu ai ma i maua.”
Fai mai Jordana, o le na soa ma Kellen mo le tele o masina, “atonu e fa pe faalima i le vaiaso ona matou o faatasi ma Fabian—i vaiaso uma—ao ma galulue faatasi i Antofagasta. O ia o le faifeautalai sili ona lelei na matou galulue faatasi.”
O le a le mea e matua naunau ai se alii talavou e faia galuega faafaifeautalai e ui lava i le inoino mai tagata o le vasega ma agaleaga mai tagata ese? Mo Fabian, o le tali o loo i ai i faamanuiaga ua latou mauaina ma lona aiga talu mai le taliaina o le talalelei—o faamanuiaga e manao e faasoa atu i isi.
“O se fiafia le mafaatalaina”
E le’i umi ona mavae le tuitui a faifeautalai faamisiona ae amata lesona a Fabian e faifeautalai. O loo ia manatua pea lana uluai sauniga faamanatuga.
“Ou te leʻi iloaina se tasi ina ua ou ulu atu i le falesa, lea sa ou fefe laitiiti ai,” sa ia fai mai ai. “Ae sa ou lagonaina se mea ofoofogia. Sa ou lagona pei ua ou i ai i le Ekalesia mo ni masina po o ni tausaga.”
I le taimi o lona papatisoga i ni nai vaiaso mulimuli ane, “Sa ou lagonaina se olioli le mafaamatalaina ina ua uma ona faatofuina a’u i le vai ma ou toe sau i fafo. Sa ou lagona le pei o se tagata fou, ma le iloaina o le a ou mulimuli ia Iesu Keriso ma faia le mea sili ou te mafaia e tausi ai Ana poloaiga.”
Na i ai faatasi matua e le’i faaipoipo o Fabian, o Leonardo ma Angela, ma la la tama i le taimi o lesona a faifeautalai, na la aoao e uiga i le faaipoipoga faalemalumalu ma aiga e faavavau. “I le vaiaso mulimuli ane, na seti ai e loʻu tama se aso o le la faaipoipoga,” o le tala lea a Fabian. “Sa fiafia tele lo’u tina.”
E fa masina talu ona auai Fabian i le Ekalesia, ae mulimuli atu Angela ia te ia i totonu o le vai o le papatisoga. “O se faamanuiaga maoae,” na fai mai ai o ia.
Na vave lava ona oo mai isi faamanuiaga. O Leonardo, o le sa papatiso a o laitiiti, na toe toaga i le Lotu. Sa avea suesuega o le talalelei ma se tulaga taua i lo latou fale. Na latalata atili tagata o le aiga. Na maua se galuega mautu a Leonardo. Ma na maua e Fabian le Perisitua Arona.
“Ou te fiafia e umia le perisitua ua mafai ai ona ou tufaina le faamanatuga i tagata o le uarota ma fesoasoani ia i latou e faafou a latou feagaiga,” o le tala lea a Fabian. “E sili loʻu fiafia pe a ou tufa atu i loʻu aiga ma faifeautalai na aoaoina aʻu. O foliga mitamita o loʻu tama ia te au ao ia vaai mai ia te aʻu o tufaina le faamanatuga e matua faafiafiaina ai lava au.”
“O Le A Sili Lena”
Sa amata ona fai e Fabian le galuega faafaifeautalai a le uarota ao le i papatisoina o ia.
“Sa ou faailoa atu i a’u uo e toatolu o le a ou papatiso. E toalua na o mai,” na ia fai mai ai. “Ou te fiafia e faasoa atu le talalelei ina ia malamalama a’u uo i mea tatou te talitonu i ai ma mea tatou te faia i le lotu ma ia mafai ai ona latou aoaoina le talalelei, ia papatisoina, ma maua ai ni olaga fiafia. O le a ou matua fiafia lava pe a papatisoina se tasi oi latou ma avea ma se tasi o au uso o le korama. “O le a sili lena.”
E teu e Fabian se Tusi a Mamona i le aoga, ma na ia aveina tamai tusi faafaifeautalai e tuu atu i uo. E fiafia o ia e tali fesili e uiga i le Ekalesia ma valaaulia uo i sauniga Aso Sa ma po o gaoioiga a le autalavou. Ma e le fefe o ia e alu atu i tagata i luga o le auala ma, ao aoaoina o ia e faifeautalai, valaaulia i latou e aoao e uiga i le Ekalesia ma saunia mo le papatisoga.
“E le popole Fabian pe a manatu se tasi e ese o ia mo le faasoaina atu o lana molimau,” o le tala lea a Kellen. “Na te iloa o loʻo ia faia le mea saʻo. Na te iloa o mea faaleagaga e sili atu ona taua nai lo se isi mea.”
Pe a faasoa e Fabian lana molimau, o le tala lea a Jordan, na te aumaia le mana mai lona liuaina, o lona alofa i le talalelei, ma ana faamanuiaga.
“Na ia vaaia faamanuiaga na oo mai i lona aiga, o le mea lea na musuia ai o ia ia lototoa ma tuusao i le faasoaina atu o le talalelei i ana uo,” o le tala lea a Jordan. “O le taimi lava na ia molimau atu ai i se tagata sailiili e uiga i se faamanuiaga tele mo ona matua le faaipoipo ae o le faigata ia te ia ona faatali mo le fa masina talu ona uma lona papatisoga mo le papatisoga o lona tina. Na malosi ona lagona, ma sa maligi ona loimata. Ona ia molimau mai lea afai tatou te tausia poloaiga, o le a tausia i tatou e le Atua.”
O le molimau a Fabian e avea ai o ia ma se faifeautalai malosi o le uarota, o le faaopoopo atu lea a Kellen.
“Na te le faapea mai, ‘Oi, na ou faalogo o fai mai se tasi i le lotu.’ Nai lo lena, e masani lava ona ia faasoa mai ona lava aafiaga faaletagata lava ia—e pei o le lagona sa ia lagonaina ina ua alu i le lotu mo le taimi muamua ma ona lagona pe a ia faitauina le Tusi a Mamona. E matuai moni lava ma moi.”
“Ou Te Lagonaina Lava Lelei”
Mo Fabian, o le faasoaina atu o le talalelei e aumaia ai se isi faamanuiaga.
“O nisi taimi e tupu ai ni mea leaga ia te au i le aoga, ona o mai ai lea o faifeautalai i loʻu faitotoa ma fesili mai pe ou te naunau e fesoasoani ia i la’ua e aoao atu,” o lana tala lea. “A uma ona ou alu ma i laua, ou te lagona e peiseai e leai ni ou faafitauli. E masani lava ona lelei oʻu lagona pe a ou o ma i laua, faitau faatasi ma i laua tusitusiga paia, ma fesoasoani ia i laua e faasoa atu le talalelei. O le faasoa atu o le talalelei ma laʻu tala o le liua e faamalosia ai laʻu molimau. Ma o le aoaoina o le talalelei ua ou maua ai se avanoa e avea ai ma se faataitaiga i isi, e aofia ai ma loʻu tuafafine laitiiti.”
E le o se mea e ofo ai, o se tasi o sini sili a Fabian o le avea ma se faifeautalai faamisiona pe a uma ona faauu mai le aoga maualuga.
“Ou te fia faasoa atu le upu moni ia i latou e le iloa,” o lana tala lea. “Ou te manao e valaaulia i latou e tafi ese a latou agasala. Ou te manao e aoao i latou pe mafai faapefea ona avea i latou ma se aiga e faavavau. Ou te manao e valaaulia i latou ia fiafia i le taimi nei ma ia ola i se tulaga o le fiafia e le gata pe a mavae lenei olaga.”