Lua Itulau e Tumu i le Lotofaafetai

Elise Dahlen

Iuta, ISA

Sa mafatia loʻu tama i lona olaga atoa mai le maualalo o manatu o le tagata lava ia ma lagona o le le aoga. Sa ola ae o ia i se tama inu ava malosi o le na masani ona taʻu atu ona manatu ia te ia e uiga i lona le aoga. O le mea e faafetai ai, e lei inu ava loʻu tama lava ia, ae na te leʻi taʻuina mai ia te aʻu ma oʻu tei lona fiafia ia i matou pe viia i matou mo mea lelei na matou faia. A o tuputupu ae, sa ou taumafai e faafiafia o ia, ae sa ou lagonaina i taimi uma ou te le mafai ona ausia lea tulaga. O lenei mea na mafua ai ona leaga le ma sootaga.

I le tasi tausaga, sa ou taʻua lenei mea i loʻu epikopo atamai. Sa ia fautuaina au e tusi i loʻu tama se tusi e taʻu atu ai ia te ia mafuaaga uma na ou faafetai ai mo ia. E le o se mea itiiti lenei mo aʻu. O oʻu manua na loloto, ma ou te le manao i lau tusi o le agaga faafetai ina ia avea ma se tusi ita. O lea na ou tatalo ai. Faatasi ai ma le Agaga o taialaina au, o mafuaaga na ou faafetai ai mo loʻu tama na amata ona tafe mai. Na alu ai le taimi, ae ina ua maeʻa, sa ou faatumuina ni itulau se lua.

Na ou tuuina atu laʻu tusi, ma le le iloa pe o le a faapefea ona tali mai lou tama. Ae na ou iloa e le mafai ona ou filifilia lana tali. Na ona ou manaomia o le tilotilo i loʻu lava loto ma manatua pe aisea na ou tusia ai le tusi.

O le taeao na sosoo ai, na ou maua ai se telefoni mai loʻu tina fai [stepmother]. Sa tagi o ia. Sa ia taʻu mai ia te au na faitau pea lava pea loʻu tama i le tusi. Sa fai mai o ia e le mafai ona talanoa mai ia te aʻu ona o lona tagi tele.

“Faafetai lava,” o lana tala lea. “Na manaʻomia e lou tama lenei mea.”

Mulimuli ane i lena aso, na valaau mai loʻu tama e faafetai mai ia te au. Na ia valaau mai ia te au i aso uma mo ni nai aso e faailoa mai le taua o le tusi ia te ia.

Maimau pe ana mafai ona ou fai atu na faamaloloina faavavega le ma mafutaga, ae e tele lava a ma galuega e manaomia ona fai. I le aluga o taimi, na amata ona malolo loʻu loto, ma na faaleleia la maʻua sootaga. Mulimuli ane, sa mafai ona ou faamagalo ia te ia.

I ni nai tausaga mulimuli ane, ina ua mavae se tauiviga matautia ma le kanesa, na maliu lou tama. Ou te mautinoa o loo i ai nei ia te ia le olioli tele ao fesoasoani le Faaola ia te ia e faamalolo mai tausaga o le sauaina. Ou te iloa ua ou lagonaina le faamalologa e ala i le mana o le Togiola a Iesu Keriso. E malamalama le Faaola io tatou manaoga ma e mafai ona fesoasoani ia i tatou e aveesea le ‘ona o le tiga ma le ita mai o tatou agaga. Ou te iloa o le agaga faafetai, faamagaloga, ma le alofa o ni fofo mamana.