Uo Na Faasoaina lo Latou Malamalama ma A’u
E alala le tusitala i Baja Kalefonia, Mekisiko.
Sa ou lagonaina le fefe ma le tuuatoatasi. Ona ou siitia atu lea i se isi atunuu ma ou alu i le lotu mo le taimi muamua mo se taimi umi lava.
Sa ma nonofo faatasi ma loʻu tina i se tamai aai i Mekisiko lea e iloa ai e tagata uma le tasi ma le isi. Sa ou iloa le saʻo mai le sese, ae sa ou le mautonu ma na o au le tamaitai talavou malosi i le aai atoa.
Sa ou manao ia ou pei o isi tagata, o lea na ou faia ai le mea e tasi na foliga mai e fetaui i lena taimi: fai se uo tama. Na o le tasi lenei o uluai mea sese na amata ona ou faia. Na amata ona ou gauai atu i faatosinaga a tupulaga ma ou talitonu ua lava loʻu matua e mafaufau ai mo au lava ia, o lona uiga ua avea ma se tamaitai talavou le toaga sa nofo i le pogisa.
Sa ou nofo i le pogisa mo le tausaga, ma o aso uma na amata ona pogisa atili. O au filifiliga le lelei na mafua ai finauga ma loʻu aiga, ma na ou iloaina ai e le mafai ona ou nofo faatasi pea ma i latou. Ae a na le i ai le maliu a se uo mamae o le Au Paia o Aso e Gata Ai na ou iloa ai e i ai se mea o misi. Ae paga lea, na ou tuuaia le Atua ma le talalelei. Na ou le toe talitonu o faamanuiaga na maua mai le usiusitai. Sa ou iloaina afai ou te le filifili e amata ola i le talalelei, o le a faaauau pea ona ou le amanaiaina laʻu sootaga ma le Ekalesia ma tumau ai pea i se olaga faalelalolagi.
Sa ou nofonofo i luga o loʻu moega i totonu o se potu pogisa, tagi ma lagona le faanoanoa mo aʻu lava ina ua ou iloaina ua ou fefe—fefe i le i ai na o au e leai se tasi e talanoa i ai, fefe i le le mafai ona toe faaleleia uma sese na ou faia, fefe neʻi leai se tasi e faamagaloina aʻu, ae maise lava le Atua.
Mulimuli ane, sa ou siitia atu i Minnesota, ISA, ma ou matua matutua, o e le auai i le Ekalesia. Sa lele faatasi loʻu tāmā-fai ma au, ma o loʻu Aso Sa muamua iina, na ma o ai i le lotu, ae na o le sauniga faamanatuga. E oo atu i le faaiuga o le sauniga, ua uma ona ou filifili e tuua le Ekalesia, ae i lou teʻi, i le taimi lava na ma o ai i le taavale, na ma vaaia le epikopo o tamoe mai e pue i maua. Sa ia fesili mai ia i maua ni nai fesili ma valaaulia i maua e toe foi mai i le Aso Sa na sosoo ai—na ma faia.
O le Aso Sa na sosoo ai, o le taimi lava na tuua ai le sauniga faamanatuga, ae ou te leʻi tu i luga, sa siomia aʻu e tamaitai talavou mai le uarota—o tamaitai talavou o le a fesoasoani ia te au e suia loʻu olaga.
Ata na tusia e Alberto Ruggieri
Na faafuasei lava ona ou ulu atu i se lalolagi e matuai ese lava: o se lalolagi e i ai se epikopo ma se peresitene o Tamaitai Talavou e popole ia te au ma, o le mea sili, o tamaitai talavou o e na taumafai e ola i le talalelei i aso uma, o e taumafai e ola i tulaga maualuluga ma tutu mo le mea sao. Sa latou susulu tele lea na mafai ai ona latou faamalamalamaina le ala i oʻu luma.
O le taimi lena na ou iloa ai le mea e tatau ona ou faia: “Ia faapea na pupula atu [lo’u] malamalama i luma o tagata, ina ia latou iloa [a’u] amio lelei, latou te vivii atu ai i [lo’u] Tama o i le lagi.” (tagai Mataio 5:16). Ma o lea sa amata ai ona ou alu i le lotu ma le Mutuale i vaiaso uma, faitauina o le Tusi a Mamona ma tatalo i aso uma, ofu i ofu talafeagai, faaaoga gagana e sili atu ona lelei, alu i le malumalu, ma saunia au lava e maua loʻu faamanuiaga faapeteriaka.
Sa suia au ma le atoatoa, ae ou te leʻi iloaina seia oo i le Tolauapiga a Tamaitai Talavou, ina ua ou lagonaina le Agaga Paia ma iloa ai e i ai saʻu molimau—o se molimau e faamanatu mai ai ia te au e alofa le Atua ia te aʻu, e i ai Lana fuafuaga mo aʻu, ma e le finagalo o Ia ia ou nofo toatasi. O se molimau e matua malamalama ma malosi na suia ai au. O se molimau e faasoa ma malamalama e le gata i loʻu ala ae faapena foi mo isi’. O se molimau e le fefe e susulu i le pogisa.