O Le Maa Tulimanu Autu o Lo Tatou Faatuatuaga

Saunia e Peresitene Gordon B. Hinckley (1910–2008)

Peresitene lona 15 o le Ekalesia

Mai se lauga o le konafesi aoao ia Oketopa 1984.

I totonu o malumalu fou taitasi e i ai se tatou sauniga o le maa tulimanu e ō gatasi ma se aga masani i aso anamua. A o le i faaaogaina le sima, o puipui o le fale na faataatitia i maa tetele. O le a eliina se lua, ma o le a tuu i ai maa e fai ma faavae. Na amata mai i se tulaga o le amataga, o le a alu le puipui faavae i le itu e tasi i se maa tulimanu; ona liliu ai lea o le tulimanu ma o le puipui e tau atu i le isi tulimanu, i le mea na tuu i ai le isi maa, lea o le a alu ai le puipui i le isi tulimanu, ma mai iina seia oo i le amataga. … O le maa mulimuli na tautalagia o le maa tulimanu autu, ma o lona faatulagaina na avea ma mafuaʻaga o le tele o faafiafiaga. Faatasi ai ma le faatulagaina o lenei maa tulimanu, ua saunia le faavae mo le maota. O le mea lea o le faatusatusaga na faaaoga e Paulo i le faamatalaina o le Ekalesia moni:

“O lenei e le toe tagata ese outou, po o e ua aumau, a ua nuu faatasi ma le au paia, o le aiga foi o le Atua;

“O loo ua atiina ae i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea;

“Ua faatatauina ia te ia le fale atoa, o loo alu ae ina ia fai ma malumalu paia i le Alii” (Efeso 2:19–21).

E i ai o tatou maa tulimanu autu lea na faavaeina ai lenei Ekalesia maoae i aso e gata ai e le Alii ma fausia, “e fetaui lelei ona fausia faatasi.” E taua tele i latou i lenei galuega, o le faavae tonu lava lenei, e taula agai i ai. … [Ae] ou te taʻua le maa tulimanu autu, lea tatou te iloa ma faamamaluina o le Alii o Iesu Keriso. …

O Ia o le maa tulimanu autu o le Ekalesia o loo tauaveina Lona suafa, o le Ekalesia a Iesu Keriso o le Au Paia o Aso e Gata Ai. E leai lava se isi igoa ua tuuina mai i le lalolagi e mafai ona faaolaina ai tagata (tagai Galuega 4:12). O ia o le tusitala o lo tatou faaolataga, o le foaʻiina mai le ola e faavavau (tagai Eperu 5:9). E leai se isi e tutusa ma Ia. E lei i ai lava. O le a leai lava. Faafetai i le Atua mo le meaalofa o Lona Alo Pele, o lē na foaiina mai Lona soifua ina ia tatou ola, ma o Ia foi o le maa tulimanu autu le mafaagaeetia o lo tatou faatuatuaga ma Lana Ekalesia.