Alofa i Isi e Pei Ona Alofa Iesu ia i Tatou

Saunia e Peresitene Dallin H. Oaks

Fesoasoani Muamua i le Au Peresitene Sili

Mai le “Ola Faatasi ma Alolofa atu i Isi e Eseese o Tatou Talitonuga,” Liahona, Nov. 2014, 25–28.

Na tuuina atu e Iesu i Ona soo se poloaiga taua: “Ia outou fealofani, pei ona ou alofa atu ia te outou” (Ioane 15:12). I le avea ai ma soo o Keriso, e tatau ona tatou ola filemu ma isi. E aofia ai tagata e le talitonu i mea e tutusa ma i tatou.

O nisi nei o auala e mafai ai ona tatou alolofa i isi e pei ona alofa le Faaola ia i tatou:

Ia agalelei i tagata e ese mai ia te oe.
Faaali le faaaloalo mo latou talitonuga.
Aua e te sauaina pe faatiga i se isi.
Ia avea ma se tagata e faalogo lelei.
Ia faaaloalo. Aua le finau ita.
Tu atu mo le mea moni.
Tau atu i isi e uiga i le talalelei i se ala lotomaualalo. “[Tautala] faamaoni i le alofa” (Efeso 4:15).

O le poloaiga a le Faaola ia alofa le tasi i le isi e pei ona Ia alofa mai ia i tatou e masalo o lo tatou luitau silisili lea. Ou te tatalo ina ia tatou taumafai e faʻaali le alofa i mea uma tatou te faia.