Mai Tagata Saua i Tagata Papatisoina

Saunia e Elder Hugo Montoya

O le Fitugafulu

O au faauoga ma faataitaiga amiotonu o le a faamanuiaina ai au uo ma tupulaga a sau.

Ina ua 17 o’u tausaga, sa ou feagai ma uunaiga mamafa a tupulaga i laʻu aoga maualuga. O uo na ou mauaina e leʻi tutusa ma ou tulaga faatauaina. Sa matou auai ma a’u uo i le tele o gaoioiga talafeagai e pei o le taaalo pasiketipolo po o le soka. Ae na latou inuina foi ava malosi ma ulaula—gaoioiga e lua ou te le faia faatasi ma i latou.

I se tasi aso, o se vaega o i matou sa le aooga aua le suesuega mo se suega e faia mulimuli ane i lena aso. Na faatasi ma aʻu aʻu uo sili e toalua, o Juan ma Francisco (ua suia igoa). I se tasi taimi, na aumai ai e se tasi i fafo afi ma sikaleti. Sa ou manatu na le maua e aʻu uo se fiafia i le suesue ma ua galo ai sa ou i ai iina. Na ou iloa sa ou sese ina ua la liliu mai ia te au ma fai mai, “O le taimi lenei mo Hugo e aoao ai le ulaula.”

Ae ou te lei maua le avanoa e tali atu ai, na oso mai ia Juan ma Francisco ia te au ma taofi oʻu lima, taitoatasi i le itu. Sa la uu oʻu lima i lalo ao tuu e se tasi se sikaleti i le va o o’u laugutu. Na vave ona teena e loʻu tino lenei mea, ma na ou feanuina le sikaleti i luga o le eleele, mamao mai ia te au. E leʻi leva, ae ou lagona le pao o se moto a o pa tonu lava i loʻu alafau. Na la faamataʻu mai ia te aʻu, ma fai mai, “O le a ma toe tutuina le sikaleti, ma o le a e aʻoaʻo e ulaula. Aua e te togia i luga o le eleele. A e faia, o le a le sologa lelei mea uma.”

I lena taimi, sa ou iloa sa ou i ai i se faafitauli. Na moeiini oʻu mata ma fai se tatalo vave ma ole atu mo soo se ituaiga fesoasoani. O le taimi lava na uma ai laʻu tatalo, na sau ai le taavale a lo matou faiaoga ma tu latalata mai ia i matou. Na oso mai i fafo o le taavale lo matou faiaoga ma fesili po o a matou mea o fai. Sa faamamulu a’u e a’u uo. “O loo matou sauni mo le suega,” o le la faamautinoa atu lea i le faiaoga. Na matou o i le aʻoga ma suʻe le suʻega, ma uma ai ma lea tulaga.

E ui i le faigata o lena aafiaga, ae na ou faamagalo atu i a’u uo mo le mea na la faia. Na ou iloaina la te leʻi malamalama i oʻu tulaga faatonuina ma laʻu faaiuga e ola i le Upu o le Poto, o lea na ou faamagalo ai i laua ma filifili e aua nei i ai ni ou lagona leaga ia i laua. Ina ua uma a matou aoga, sa ou alu i laʻu misiona ae sa faaauau pea ona fesootai ma Juan ma Francisco. Sa ou tusia soo ni tusi ia i laua e masani ona faasoa atu i ai le talalelei ma laʻu molimau ia Iesu Keriso. Sa ou valaauliaina i laua ia salamo ma auai i le lotu. I loʻu teʻi tele, na alu moni lava se tasi o i laua.

Sa masani ona ou valaauliaina aʻu uo i sauniga lotu i Aso Sa i le taimi muamua, ae leai se tasi na taliaina seia oo i le taimi nei. E ui lava e le mafai ona ou auai ma Juan, ae o oʻu uso ma loʻu tama sa i ai iina e fesoasoani ia te ia ma faaaumeaina o ia. Sa taliaina o ia e loʻu aiga, ma na lagona e Juan le mafanafana i le lotu. Sa amata ona ia faia ni suiga laiti seia oo ina ia faia le faaiuga e papatiso. Sa ou fiafia mo ia ma sili atu le fiafia ina ua ia taʻu mai ia te aʻu ua ia aoao e alofa ia Iesu Keriso ona o aʻu tusi. Ina ua ou foi mai i le fale mai laʻu misiona, sa ou latalata foi ia Francisco, ma ina ua mavae sina taimi, na papatisoina foi o ia ma lona faletua. I le aso, o Juan ma Francisco o loo avea pea ma aʻu uo sili e toalua.

O nei mea na tutupu na faailogaina ai loʻu olaga. Sa ou aoaoina o le auala sili e uunaia ai olaga o le ola amiotonu, alofa i isi, ma aapa atu. O loo fai mai le tamaitusi o le Mo le Malosi o le Autalavou, “Ina ia maua ni uo lelei, ia avea ma se uo lelei. Faaali atu le fiafia moni i isi; ataata ma faailoa atu ia i latou e te popole mo i latou.”¹ O le mea lenei na fesoasoani mai le Alii ia te aʻu e fai ma Juan ma Francisco. Ona o lena mea, ua ia te aʻu uo sili e lua ua ou iloaina, ma o lea ua matou galulue faatasi e lagolagoina le malo o le Atua o ni tagata o le Ekalesia.

Ia tausisia pea tulaga faatonuina o le Ekalesia, tusa lava pe o e i ai i se tulaga faigata tele e pei o au. Ua faatonu mai e leMo le Malosi o le Autalavou , “A o e saili e avea ma se uo lelei i isi, aua nei fetuunaia ou tulaga faatonuina. “Afai e uunai oe e au uo e faia mea e sese, ia avea oe ma tagata e tu atu mo le mea sao.”² E tusa lava pe foliga mai o loʻo faia e isi tagata mea e feteenai ma poloaiga, ia tumau malosi aua o lau faʻataʻitaʻiga e mamana. Ia avea ma se faataitaiga e mafai ona mafaufau i ai au uo i taimi o o latou manaoga. I nisi tulaga e pei o aʻu, o lau faauoga atonu o le mea lea e fesoasoani latou te aoao ai, salamo, ma liua ai.