Tofi Paia

Saunia e Emma C.

E alala le tusitala i Farani.

O laʻu uo e masani ona fiafia i taimi uma. O le a se mea o ono mafai ona faalavelave ia te ia?

Ou te sau mai Farani, ae sa ma faaaluina ma loʻu uso se tausaga i le itu i sasae o le Iunaite Setete e fai ma tamaiti aoga fesuiai. I lena taimi, matou te feiloai ai i le toatele o tagata, ae o le tasi na sili ona tele lana uunaiga ia te aʻu, o se teine e igoa ia Destiny. Sa avea o ia ma se tasi o a’u uo mamae. Sa ma faia faatasi ituaiga gaoioiga eseese uma, i le aʻoga ma le tuua o le aʻoga ma faatasi ma loʻu uso. Sa fiafia Destiny i taimi uma. O le tulaga sili lena ou te fiafia ai ia te ia.

Ona oo lea i se tasi aso sa ou vaai ia te ia i se lagona atuatuvale ou te le’i vaai muamua ai ia te ia. Sa ou fesili ia te ia po o le a le mea ua tupu. Fai mai o ia e le manao e talanoa i ai. Ona ou matauina lea o se pepa i lona lima. Sa ou aveina ma faitauina.

Sa tusia e se tasi ni mea mataga ia te ia. O le faamatalaga e le mailoa na fai mai o ia e auleaga, e leai se tasi e fiafia ia te ia, o ia e le i ai sona faamoemoe mo le ola ai, ma e tatau ona alu e fasioti ia lava. Ou te le mafai ona talitonu i se tasi e pei o ia e mafai ona osofaia faapena. Na matua aafia ai aʻu i le iloa o le tiga o loo feagai ma ia.

Mai lava i lena taimi, sa ou faia ai se taumafaiga sili atu e avea ma uo a Destiny—e le na o le faaaluina o taimi faatasi ma ia, ae ia i ai pea iina mo ia, aemaise lava ia faamaoni. Sa ou faamatala atu ia te ia o ia o se afafine o le Atua, ua faamanuiaina i se natura paia, agavaa mo le faamemelo ma le mafai ona faia mea silisili.

E faigata le taumafai e alofa ia te oe lava ia pe a leaga le faiga o oe e isi ma faitioina oe. A o ou faauo ia Destiny, sa ou aoaoina o nisi taimi o le auala sili e fesoasoani ai i isi o le alofa ia i latou ma fesoasoani ia latou iloa po o ai moni i latou.

I le faaiuga o le tausaga, ina ua ou toe foi atu i Farani, na taʻu mai e Destiny ia te au se mea o le a ou teuina i taimi uma. “Emma,” na fai mai ai o ia, “na e sefeina a’u. Ae e te leʻi sau, sa ou manaʻo e fasioti aʻu lava. Ae o oe ma lou uso na fesoasoani tele ia te aʻu, e ala i le alofa. O le aso ua ou alofa ia te aʻu lava, ma ou te alofa ia te oe.”

E tele tamaiti i le aʻoga latou te onosaia le sauaga, o ē agaleagaina pe vavae ese. Saili se auala e aapa atu ai ia i latou. Talanoa atu ia i latou, mafaufau e uiga ia i latou, ia agalelei ia i latou. O le mea lea o le a faia e le Faaola, ma o nisi taimi o se faamalo faigofie po o se ataata e mafai ona suia mea uma.