Sa Latou Totoina se Fatu i Loʻu Loto

Marta Algarve

Santa Catarina, Pasila

heart-shaped wreath of leaves with seed in middle

O fea na ou sau ai? O le a la’u mea o fai iinei? O fea ou te alu i ai pe a uma lenei olaga?

Ina ua 29 oʻu tausaga, o nei fesili na toe foi mai ia te au. Sa maliliu o’u matua. Na ou faanoanoa ona o le maliu o lo’u atalii pepe ulumatua. Sa i ai isi aʻu fanau e toatolu e tausi ma se olaga e tumu i luitau.

Na amata ona tali mai le Alii i aʻu fesili ina ua Ia taitaia ni faifeautalai talavou se toalua i loʻu fale. Ina ua ou faafeiloaia i laua i totonu, sa la fesili mai pe i ai se mea sa ou lagona o misi i loʻu olaga. Sa ou taʻu atu ia i laua e uiga i o’u matua ma loʻu atalii. Sa ou fai atu ia i la’ua ou te manatu o le a le fetaui le maua o fanau ma faia ni aiga pe afai o mea uma lava e faamutaina i le oti. Sa ou fesili pe mafai ona ou toe vaai i o’u matua ma loʻu atalii.

“Marta,” na la fai mai ai, “e mafai ona e maua lou aiga e faavavau.”

Sa faatumulia lo’u loto i le olioli tele. Sa ou fia iloa atili. I le la asiasiga na sosoo ai, na la aoao atili ai au e uiga i le talalelei a Iesu Keriso. Sa la tuuina mai ia te au se Tusi a Mamona ma lu’iina au e faitau ma fesili atu i le Atua pe o Lana upu lea. Sa ou taliaina le la lu’i. Ina ua ou tatalo, na oo mai le tali a le Atua e manino e pei o le la. Na ou iloaina i lo’u loto e moni.

Ae paga lea, ina ua ou amata i se galuega fou, na ou le toe fesootai ma faifeautalai. I masina na sosoo ai, na i’u ai laʻu faaipoipoga ma sa ou taumafai e amata se olaga fou faatasi ma laʻu fanau.

Mulimuli ane, na ou toe faaipoipo. I se tasi aso sa fai mai loʻu toalua na misia le i ai o le Atua i lona olaga. Na tonu ia i matou e auai i le lotu sa ia auai muamua i ai. Ina ua matou ulu atu i le fale, sa ou vaaia se Tusi a Mamona i luga o se laulau i le falelotu. O le ekalesia lava lea e tasi na ou faalogo ai muamua! Sa ou fiafia i le Agaga na ou faalogoina iina. Ina ua matou tuua le falelotu, sa ou fesili i loʻu toalua pe mafai faapefea ona ou papatiso.

“E manaomia ona aoaoina oe e faifeautalai,” sa ia fai mai ai.

“Sa aoaoina a’u i le lima tausaga talu ai!” Sa ou tali atu ai.

Sa aoaoina a’u ma la’u fanau i lesona. O le aso o lo matou papatisoga o le aso aupito sili ona fiafia lea o o matou olaga.

I nai tausaga mulimuli ane, na ou lagona ai e tatau ona ou faailoa atu i uso na aoaoina muamua aʻu, o lea ua ou auai i le Ekalesia. I luga o le Facebook, na ou maua ai se vaega o faifeautalai ua maea misiona mai le Misiona a Santa Maria Pasila. Na aofia ai se tasi o uso sa aoaoina aʻu. Sa ou auina atu i ai se talosaga ma te uo ma faamatala atu ai po o ai au, le auala na avea ai au ma se tagata o le Ekalesia, le faamauga a le matou aiga i le malumalu, ma loʻu atalii o loo auauna atu faamisiona talai. Sa ou fai atu ia te ia o nei mea uma na mafai ona sa la totoina ma lana soa le fatu o le talalelei toefuataiina i loʻu loto.