Konabwai n te Maiu n Tamnei
Ngkai ti riki bwa ana reirei ae kakaonimaki Iesu Kristo, ko kona n karekea te kairaki ibon iroum ao kaotioti, aika teimatoa ma Ana tua, ake a katauaki ibukim.
Ngke Ia kiitana te kaembwa irouia Kairake n Ataeinnaine n te tiamwa aei, te ataeinnaine temanna e anganai te beeba ae korobokiaki. Inanona, e titiraki, “N na kanga n ataia ngkana te Atua e kataia n tuangai te bwai teuana?” I tangira ana titiraki. Tamneira e rang kakantaninga te reitaki ma mweengara i karawa. Ti tangiria ni kan namakina te kainnanoaki ao te kabonganaaki. Ma n te tai are ti kataia ni kina te kaokoro imarenan oin ara iango ao te namakin ae beebete iroun te Tamnei. Burabeti, ake ngkoa ao ngkai, a tia n reirei bwa ngkana iai te bwai “ae kaoko bwa kona karaoa ae raoiroi, e roko mairoun Kristo.”1
Beretitenti Russell M. Nelson e a tia ni kanakoa ae beebete, te kakao ae mwaaka: “tariu ao mwaneu aika tangira, I bubuti nakoimi bwa kam na karikirakea konabwai n te maiu n tamnei ni karekea te kaotioti. … Rineia ni karaoa te mwakuri ae kainnanoaki ni karekea ana bwaintituaraoi te Tamnei ae Raoiroi ao n ongo nakon bwanaan te Tamnei n tainako ao n ae e itiaki riki.”2
Nanou n te ingabong aei bwa N na taetae mai inanou iaon aua kawai ni karikirakean ana konabwai maiun tamneimi ni karekei kaotioti.
1. Karaoia ma nanomi ni Karekea te Tai ao te Tabo n Ongo bwanaan te Atua
Ngkai ko kabongana inaomatam ni korei ao ni bairea te tai ni katoabong ni kaniiko riki nakon bwanaan te Atua, riki n ana Boki Moomon, inanon taina Bwanaana e na rikirake riki n itiaki ao ko na kona ni kina riki.
Ni kaokorona, te katabetabe ao te beroro are e kaona te aonaaba ao mweengara ao maiura a kona ni karikia bwa e na kangaanga ongom ni Bwanaana. Kairoro aikai e kona ni katabetabei ara iango ao nanora, are ngkai ti aki taratara raoi, ti na aki karekea nnen te wirikiriki ae beebete iroun te Tamnei ae Raoiroi.
Te burabeti Iotebwa Timiti e reireiniira bwa n angiin te tai te Atua e kaoti “nakon temanna ma temanna n te aro ae aki ataaki, n aia ruu, n te rereua ke te marae, ao ane n akean te karongoa ke te kaberoro mairouia te koraki.”3
Tatan e tangiria ni kamaenakoira ma bwanaan te Atua ni kararoaira man taabo akana a rau akanne. Ngkana e taetae te Atua n te bwanaa ae maraara, man beebete, ngkoe ao ngai ti riai ni kaniira riki nakoina bwa tina ongo Irouna. Tii iangoia bwa tera ae e na riki ngkana ti kataia n tiku n reitaki ma karawa n arora ni kataia n reitaki ma te Wi-Fi! Karekea te tai ao te tabo are kona ongora iai ni bwanaan te Atua ni katoabong. Ao kawakina te bontaeka ae tabu aei ma taina raoi, bwa e rang mwaiti bwaai aika a katan iaona!
2. Karaoia n aki Kawaeremwea
Ngkana ko karekea te wirikiriki ao imwiina te nano ni kan karaoia, te Uea e kona ni kabonganako. Te mwakuri are ko karaoia, kona rang taneiai riki n ongeaba ni bwanaan te Tamnei. Kona rikirake ni kina ana kairi te Atua ao E na “tauraoi… ni kaota Ana iango ao nanona.”4 Ngkana ko kawaeremwea, ko kona ni mwaninga te wirikiriki ke n aki karekea te tai ni buoka temanna ibukin te Atua.
3. Karekea Am Mwakuri mairoun te Uea
Te tataro are e rang tangiria ni kaeka Tamara are i Karawa bon kaekaan ara bubuti bwa tina kairaki nakon temanna are e kainnanoa ara ibuobuoki. Beretitenti Henry B. Eyring e a tia n reireiniira bwa tina ukoukora te kaotioti ni bubutia te Atua bwa antai are ti na kona ni buokia. “Ngkana ko anga titiraki n aron aikai, te Tamnei ae Raoiroi e na roko ao kona namakinii bwaai ake ko kona ni karaoi ibukiia aomata tabeman. Ngkana kam nako ni karaoi bwaai aikai, ao kam karaoa ana mwakuri te Uea; ao bwaai ake kam karaoia ni kaineti ma ana kantaninga te Uea bon ana mwakuri te Uea, kam tau ibukin ana bwaintangira te Tamnei ae Raoiroi.”5
Ko kona n tataro ni butiia te Uea ibukin ana mwakuri. Ngkai ko karaoia, E kona ni kabonganai am konabwai ni katiai Ana mwakuri aika kamimi.
Tibu te unimwane, Fritz Hjalmar Lundgren, e mwananga mai Sweden ngke 19 ana ririki. E roko i Amerika, n ti ngaia, ma ana tutikeeti ao ai tibwa onoua ana ririki n te reirei. E kabi n taetae n Imatang, e reke rokona i Oregan ao e mwakuri ikekei bwa te tia korokai ao imwiina, ma tibu te unnaine ao tinau, a kaina te Ekaretia. E tuai man tararua te uoote, ma ngkai temanna te tia reirei ae kakaonimaki n te kakaawari, e uotiia e raka iaon 50 utu aika a kakaokoro nakon waaki ni kakukurei n te Ekaretia. E kanga ni karaoa anne?
Imwiin maten tibu te unimwane, I noori ana bwaoki ni beeba ao I a noora te reta ae koreaki iroun te mwane ae e okira te ekaretia ibukin ana tangira tibu. E kanga te reta, “Ana waaki ae aki kakaotia Fritz, ae kakoaua, bwa n tainako e karaoa ana mwakuri Tamara are Karawa.”
Te reta anne bon mairoun Tari Wayne Simonis. Tibu e kawaria ao e kinaiia kain te utu n tatabemaniia. Inanon taina, tibu e tuangiia bwa a kainnanoaki ao e kaoiia bwa a na ira te taromauri. Ma n te Tabati anne, Tari Simonis e uti ma te tabeaianga—e tuai ni bane ni katia taubukin ana auti, ao e kantaningaaki bwa e na iai te karau n te wiiki anne. E baireia bwa e na nako n taromauri, n ti iobai ma Tibu, ao imwiina e na oki nakon mweengana ni katia taubukin ana auti. Ana utu a kona n ira te bootaki n toa n akea ngaia.
Ana babaire a bon mwakuri, ni karokoa, iaon taubukin te auti, e ongo tamwarakean te kaintamwarake. N ana taeka: “Ngke I tararake … n tei i tabon te kaintamwarake bon te Tari Fritz. E anganai moangarena ae bubura. N te moan tai, I mama ao kaanga titebo ma te teei ae uarereke ngai are e kuneaki n aki reirei. Imwiina … I un. [Ma te Tari Fritz e tii] buuta ana kooti ao e katinea n te kaintamwarake. E rukumi bain ana kabaraaki ae mainaina, e taraai man taku, ‘Tari Simonis, iai riki am ama teuana? Te mwakuri aei e bae n rang kakaawaki ke kona bon aki kona ni kitaniia am utu, ma ngkana kakaawakina anne, I tangiria ni buokiko.’ Ngke I tarai matana, I ti noora te akoi ao ana tangira Kristo. E toki uniu. … I katikui au bwai ni mwakuri n te Tabati anne ao I ira raraou n ruo n te kaintamwarake n okira te umwantabu.”
Tibu e a tia ni karekea te mwakuri mairoun te Uea, ao e ataia bwa e na ukoukora te tibu ae bua. Kaanga aroia mwane ake aman ake a uota raraoia ae tenakibaina nako te taubuki ni karuoa ngkane rikaaki bwa e na kamaiu Iesu Kristo,6 aron naba ana mwakuri tibu are e karuoa mai taubukin te auti. Te Uea e kanakoa te kaotioti nakoia naake a ukoukoria ni kamaiuia tabeman.
4. Kakoaua ao Onimaki
Ai tibwa ngkai, I wareka taekan te mitinare ae tikiraoi are e karekea ana mwakuri mairoun te Uea. Aaron e reireina aia uea Reimwanaite, are e titiraki bwa bukin tera tarin Ammon e aki naba roko nakoina n reireinna. “Ao Aaron e taku nakon te uea: Nooria, e weteia Tamnein te Uea nakon te kawai teuana.7
Ngke I wareki taeka akanne, te Tamnei e taetae inanou: ngaira n tatabemaniira iai ara mwakuri aika a kakaokoro ake tina karaoi, ao inanon taai te Tamnei e kona ni weteira n “te kawai teuana.” A mwaiti kawai aika ti katea iai abanuean te Atua ngkai ti karaoi berita, kawakin berita n riki bwa ana reirei Iesu Kristo. Ngkai ana reirei ae kakaonimaki, ko kona n karekea te kairaki ibon iroum ao kaotioti aika teimatoa ma Ana tua ake a katauaki ibukim. Iai tibwangam ae onoti ao mwakuri ake kona karaoi inanon maium ao kona anganaki te kairi ae onoti aika kona kakoroi bukiia.
Nibwaai, tarin Iareta, ao bon Mote ni kabane iai te ran ae bubura are a na rinuukana—ao n tatabemaniia a karaoa n ae kaokoro. Nibwaai e karaoi bwaai “man kaai n te aro ae a kamimi tamaroaia.”8 Tarin Iareta e karaoi bwaake ake a “bono aia kaibuke n aron te raurau,”9 Ao Mote ma ana aomata “a nakonako i aontano ae mau i nukan te nama.”10
Ngaiia n tatabemaniia a karekei kairi ibon ibukiia, kairiia, ao n onimakiniia n tatabemaiia ao ni karaoi. Te Uea e tabe irouia naake a ongotaeka ao, n ana taeka Nibwaai, “ma ti ngkana e a tia ni katauraoa te kawai [bukira] are a na kona iai i kakoroa bukin te bwai are e tua nakoia.”11 Tara are taekinna Nibwaai, “taian kawai”— tiaki “te kawai.”
Ti katibanakoi ke ti kanakoi ara mwakuri mairoun te Uea ibukina bwa e a tia ni katauraoa “te kawai” ae kaokoro nakon are ti kaintaningaia?
Tibu te unimwaane e kairaki nakon te tabo ae aki kantaningaia—n ana tiute, i taubukin te auti, n te Tabati. Onimakina te Atua bwa e na kairiko, riki ngkana te aro anne e tara ni kaokoro man are ko kantaningaia ke e kakoro ma tabeman.
Aika Itiaki ni Boong aika Kaitira a roko n teia aika kakaokoro ao tiaitiia, ma “ni kabane a bane n titebo iroun te Atua”—“bwatabwata ke mainaina, te kaunga ke te inaomata, mwaane ke te aine,” e tuai iein ke e a tia ni mare, te toro ke ae inaomata, kairake ke e a kara, kain te aro n te tai ae maan ke e a tibwa rairaki.12 N aki taraia bwa antai ngkoe ke tera ae ko karaoia, ko kaoaki nakon ana taibora te Uea.13
Ngkai ko ukoukoria ao ni karaoi ana kantaninga te Tama ni karikia bwa anuan maium ni katoabong, ko na kona, ni koaua, ni kairaki nakon te bitaki ao te rairannano.
Ana burokuraem te Ekaretia ae boou ibukiia ataei ao te roronrikirake e kateitei iaon aan kamatebwai ni karekean te kaotioti, karekean te bwai are e kantanigaia bwa tina karaoia ibukin te Uea, ao imwiina ni karaoia nakon te kairi anne. Ngaira n tatabemaniira, n aki tabe bwa rorora ke aro raa aika ti konabwai iai n kakae, karekei, ao ni karaoi. Ngkai ko ira ana baeten ae akea tokina are e a tia ni kateaki ibukin boong aikai, kona kaan riki nakon Iesu Kristo—Ana tangira, Otana, Ana kairi, Ana rau, ao mwaakana ni kamaiu ao ni kamarurung. Ao kona karikirakea am konabwai n te Maiu n Tamnei n riki bwa te bwai ni mwakuri ni Baina ni katiaan Ana mwakri ae korakora. N aran Iesu Kristo, amen.