Taan Kairiiri a Kabwarabwara te Mwakuri ae Boou ibukiia Ataei ao te Roronrikirake
Te boki ibukiia Ataei ao te Roronrikirake e na karinaki n Tianuare 2020 ibukin buokaia kairake n aomata bwa a na iriira te Tia Kamaiu ngkai a rikirake n te tamnei, n te aro n reitaki, n te rabwata, ao te wanawana. Ibukin taian marooro n te maekatiin aei are e maroroakina taekaia Ataei ao te Roronrikirake, taraa iteraniba 40 ao 53.
“E a roko te tai ibukin te waaki ae boou, ae baireaki ibukin buokaia ataei ao te roronrikirake n te bong aei ni kabuta te aonaaba,” e taku Beretitenti Russell M. Nelson n te kanakobwana ae onoti n Tebetembwa 29, 2019.
“N oneamwiin are ko na anganaki mwaitin mwioko aika onoti,” e taku nakoia ataei ao te roronrikirae, “ti kaoko bwa ko na taetae ma te Uea ibukin bwa ko na kanga ni karikirakeko n te kawai ae baeranti. E na iai te kakabwaia iai ao ae kakukurei, ma e tangira tabeua te mwakuri man ami itera. Ko riai ni karekea oin am kaotioti. Ko riai n rinerine i bon ibukim ao ni mwakuriia. N tabetai e wirikiriki nakoim te Tamnei bwa kona karaoi bwaai aika a kaangaanga. I taku bwa ko tauraoi nakon te kaangaanga. Ko kona ni karaoi bwaai aika a kaangaanga.”
E taku naba Beretitenti Nelson bwa iai tabeia kaaro ae kakawaki ae a karaoia. “Taiaoka katea te reitaki ae matoa ma am ataei ao te roronrikirake,” e taku. “A kona n ibuobuoki taan kairiiri ake n te taromauri, ma aikai bon am ataei. Akea temanna ae na kona ni karekea te tokanikai ma te anainano ae korakora nakoia ma bon ngkoe. Anga am tangira, kaunganano, ao te reirei, ma totokoa te kariiri ae ko na tautaekaniia. A na karaoa ae tamaroa ngkana a kamwakura oin inaomataia.
“Te reirei aei e kaineti nakoia ara taan kairiiri aika a kakateke ao aia tia reirei ataei ao te roronrikirake,” e reitia Beretitenti Nelson. “Ti kainnanoia kairake n aomata bwa a na kairiiri, riki naake a tia ni weteaki ao ni kamatoaki bwa a mwakuri n taian beretitentii n te kiraati ao te kooram. Te kariaia ibukin te nakoanibonga a anganaki te mwiokoaki iai. A na reiakinaki bwa a na kanga ni karekea ana kairi te tamnei ni kairan aia kiraati ke aia kooram.”
N te aeka ni marooro naba anne, Beretitenti M. Russell Ballard, te Bonimwi ni Beretitenti n te Kooram n Abotoro n te Tengaun ma Uoman, e kabwarabwara aia nonori Ataei ao te Roronrikirake: ni “kakorakora te roro ae rikirake n aia onimaki iroun Iesu Kristo, ao ni buokiia ataei, te roronrikirake, ao aia utu n rikirake iaon kawain te berita ngkai a kaitara ma kaangaangan te maiu.”1 E taku bwa buokakiia ataei ao te roronrikirake ni karekea aia koaua iroun Iesu Kristo e na kakabwaiaiia ao ngaira ni kabane inanon maiura ni kabane.“
Imwiin irakin te kanakobwana irouia te roronrikirake n te waaki ni kakukurei ni kaota aron kabonganaan Kabwarabwaraan Aron te Kairi ibukiia Ataei ao te Roronrikirake, e taku Beretitenti Ballard: “Aei ai bon tibwa te moan. N te bong aei, ti a tibwa waai iaon te waaki ni kakukurei aei. Aei te bwai ae na waaki nako inanon n am utu ao ngkai kam uaia ni mwakuri. Ti kaoko bwa ko na reiti nako n ira te waaki ni kakukurei. … Kaaro, taiaoka reita nako aei n te mweenga.” E katuruturua bwa “te burokuraem aei e boboto n te mweenga, ae boutokaaki n te Ekaretia” ao bwa “utu a na iai rekerekeia ni kabane n te burokuraem aei. Anne e na karekea te bwai ae nakoraoi.”
N aono aika mwaiti n te aonaaba, kaaro, ao taan kairiiri a reke naba oin aia boki ni Kabwarabwaraan aron te kairi. Tabeua aono a na reke aia boki ibukiia Ataei ao te Roronrikirake ae na rairaki n oin aia taetae rimwi riki n 2020.
Reiakinan te euangkerio, mwakuri n ibuobuoki ao waaki ni kakukurei, ao rikirakem i bon iroum (n raonaki ma katean ao kakoroan nanon taian kouru) a riki bwa mwakoro aika kakawaki ibukiia Ataei ao te Roronrikirake, ao e na kairiiri inanon te tai ni babaire. Ataei ao te roronrikirake a na ukora oin aia kaotioti ngkai a waaki nako iaon kawain te berita, ma aia boutoka aia utu, taan kairiiri, ao tabeman riki. E taekinna Beretitenti Ballard bwa Ataei ao te Roronrikirake bon te mwakuri ae tabangaki ao ngaia are e angaraoi karaona nakon “te tabo are ko maeka iai ao are a meina inanona am utu.”
Rakan rongorongo ao bwaai n ibuobuoki a na katauraoaki n te kanakobwana ni Marooro n Itaramata ibukiia Ataei ao te roronrikirake n Nobembwa 17, 2019, ae karaoaki iroun Unimwaane Gerrit W. Gong man te Kooram n Abotoro n te Tengaun ma Uoman. Ataei ao te roronrikiraek ake a koro 8 nakon 18 te ririki n 2020, aia karo, taan kairiiri ibukin te Bootaki n Ataeinnaine, aetuwaitia ibukin te Nakoanibonga ae te Aaron, ao taan kairiiri n te Moanrinan a kaokai bwa a na iria. Kanakoi am titiraki ibukin aia burokuraem Ataei ao te Roronrikirake nakon Unimwaane Gong n facetoface.ChurchofJesusChrist.org. Imwiin te bwai ae maiu aei, are e na karaoaki n te kanakobwana inanon 18 taetae, e na kawakinaki te tamnei n te aro bwa e aonga ni kaboouaki ke ni karuoaki man te intanete n te tai ae angaraoi.