Tai Mwamwanaai
Ngkana ti ongeaaba n te tua, ti na aki toki ni kairaki inanon te kawai ae eti ao ti aki kona ni mwamwanaaki.
N te bong aei, N na anga te reirei ibukiia aomata ni kabane, ao riki ibukimi ngkami te roroo ae rikirake—Ataein te moanrinan, kairake n ataeinimwane, ao kairake n ataeinaine. Kam rang n tangiraki iroun ana burabeti te Uea ibukin ara bong, Beretitenti Russell M. Nelson—nanona ae bati n te aro are e taetae nakoimi ni kabane inanon te kanakobwana ae onoti n ana bootaki n taromauri te roronrikirake n te aonaaba e a atunaki “Kantaninga ibukin Iteraera.”1 Ti aki toki n ongo banaan Beretitenti Nelson ni wetei ngkami n aron anne—te “Kantaninga ibukin Iteraera,” te roro ae rikirake ao aron ana Ekaretia ae kaokaki Iesu Kristo n taai aika a na roko.
Raoraou aika kairake, N na tangiria ni moanna man tibwaan karaki aika uoua aika karakin te utu.
Te 102 Kamea ake a kiriwantanta n Roro
Ririki n nako, I roko ni mweengau man te mwakuri ao n tounako n noori timtimin been aika mainaina ni kabutaa—iaontano, mataroan te karaati, ao ara auti ae uraura-burikina. I tuoa te tabo n taraia raoi ao ni kunea bwa te been e bon mwaimwai. Kawain te been e mwananga nakon te baakiiaati, ao ngaia are akea bwa I rimwiina. Ikanne, I a kunea natiu temwaane nimaua-ana-ririki ma te beenburati i baina, ni kakiokioa ara kamea. Ara kamea ae tikiraoi n rooro e a kuri n on iteran rabwatana n te mainaina!
“Tera ae ko karaoia?” I titiraki ma angin nanou.
Natiu e toki, e taraai, e taraa te kamea, e taraa te beenburati n timtim ma te been, ao e taku, “I tii tangiria bwa e na taraa n aroia kamea ake n te tamnei are kiri-wantanta n roro—ko ataia, ake 101 Kamea ake a kiriwantanta n roro.”
I tangira ara Kamea. I taku ngai bwa e nakoraoi, ma n te bong anne natiu temwaane e a kaokoro ana iango.
Te Katamwa ae Kiriwantanta
Au kauoua ni karaki e boboto n taekan Ai-Tamau ae Grover, are a maeka n te auti n te tabo akea kaina, n raroa ma te kaawa ae bubura. Ai tamau Grover e rang ni kara. Ara iango bwa natira mwaane a riai nooria imwain buana. Ngaia are teuana te bwakantaai, ti buti ni kawaira ae abwabwaki nakon ana auti ae mangori. Ti a tekateka n ikotaki n rokora ao ni kabwarabwa nakoia natira mwaane. N aki maan inanon te marooro, natira mnwaane ake uoman, ae tao nimaua ao onoua aia ririki, a tangiria n nako n takakaro itinaniku.
Ai tamau Grover, e ongo aia bubuti, e baraaki ma matana ni kaan nakon moamoaia. Moamoana ae e rangi n taraa ni kara ao a tuai man nonoria ataeinimwaane e karika maakuia teutana. E taku nakoia, ni bwaanana ae karakara, “Taratara raoi—a mwaiti taian man aika roro ao mainaina itinaniku ikekei.” Ongoraean aei, Lesa ao Ngai ti tounako; ti raraomwa bwa a na miiraki irouia maan aika roro ao mainaina! Ataenimwaane a nako tinaniku n takakaro ngke ti reitinako ni kakawari.
Imwina , ngke ti toka n te kaa n okira mweengara, I ukeriia ataeinimwaane, “Kam noori taian man aika roro man mainaina?” Temanna e kaeka, “Akea, ti aki noori aekaki ni man aikane, ma ti noora te katamwa ae roro man mainaina ae kiriwantanta aon akuna!”
Te Tia Mwamwanai ae Korakora
Karaki aikai bon taekaia ataei aika aki bure ni kunean tabeua bwaai ao waaki n aron te maiu aei ao ni koauana bon ataei aika baina te moangare, ma a kaotia ni kamataata te reireii ae e kakawaki.
Inanon te moan karaki, natira temwaane iai ana man te kamea; e ngae n anne, e anaa te kaaran ni been ao, ma te burati ni been i baina, e a kamatoaa ni karika oin ana iango bwa e nang bwai.
Inanon te kauoua ni karaki, ataeinimwaane a rang kukurei n aki ata kakamakun te bwai are a kaitaraa mai irouia maan aika roro ao mainana. N aki kinaa raoi bwa tera te bwai are a kaaitara, a konaa ni karekea te rawawata mai imwiin te bwai ae aki mataata iai. Aikai karaki man kairuan kinakiia—kinaakin raoi te bwai teuana ae bon tiaki ngaia. N aron karaki aikai, mwiin te bwai ae riki e bon uarereke.
E ngae n anne, a mwaiti n te bong aei ake a karekei namakin n aron waaki aikai iaon buburan aroia. A bon aki kona n noori bwaai ni koauan aroia ke n aki rauaki ma te koaua. Irarikina, iai kakairi aika takakaronaki n te bong aei a karaoaki n taraaki raoi ni kairiira nako man te koaua raoi. Te mwakuri ni mwamwanai aikai ao keewe a riaon riki kaairua ni kinakiia aika aki bure ao ni mwaitin te tai e karekea te rang buakaka, e aki uarereke, mwiina.
Tatan, taman taian keewe nako ao te tia mwamwanai ae korakora, e na karekerekeira n titiraki ni bwaai aika koaua ke n aki mutiakini koaua ake akea tokiia ke n oneamwiia ma te bwai teuana are e taraa riki ni kakukurei. “E karaoa te buaka ma natin te Atua”2 ao e a tia ni kabanea tenga ni baireia ao kamwakura ana atatai ni imanonoia ni kabane natin te Atua ni kakoaua bwa te raoiroi e buakaka ao te buakaka e raoiroi.
E a tia n iangoia ibon irouna man kairoroia rabwata ae mamate bwa maan aika tikangkii ake bon ti katamwa ke anne, ma mwakurin te been, ko kona n bita te Kamea ae roro nakon te kamea ae kiriwantanta!
Ngkai ti na rairaki nakon te katooto n aron te reirei ae e kuneaki ni koroboki aika tabu, ngke ana burabeti te Uea ae Mote e a tia-itara-mata ma ai aron aei. “Mote e uotaki nako nakon te maunga ae moan te rietaata[;] … e noora te Atua ni kaaitara ma ngaia, ao e taetae ma ngaia.”3 Te Atua e reireina Mote taekan kinakina ae akea tokina. E ngae Mote e bon mamate ao e aki kororaoi, bon ngaia “ti te arona ngkoe ma au Rikitemanna; ao au Rikitemanna … ae na riki bwa te Tia Kamaiu.”4
Ni katereterea, inanon te mii ae tamaroa aei, Mote e noora te Atua, ao e reiakinna naba te bwai teuana ae kakawaki n taekan ae bon ngaia: ae bon ngaia ni koaua natin te Atua.
Ongora raoi nakon te bwai ae na riki ngke kamiimin kubana e a toki. “Ao e koro bukina bwa … e roko Tatan ni kariria, ni kangai,” “Mote, ae natin te aomata, taromauria!”5 Mote e kaninikoria ni kaeka: “Antai ngkoe? Bwa nooria, ngai natin te Atua, ae ti te arona ma ana Rikitemanna, ao e nga mimito ngim bwa N na taromauri ko?”6
N taekana teuana, Mote e taku: “Ko aki kona ni mwamwanai, ibukina I ataia bwa antai ngai. I karikaki ni katotongan te Atua. Akea iroum Otana ao mimitongina. Ngaia bukin tera N na riai ntaromauriko ke ni bwaka nakon am kamwamwane?”
Ngkai ongora raoi nakon bwa e kanga ana kaeka Mote riki. E taku, “Kararoako, Tatan; tai mwamwanaai.”7
E mwaiti ae ti kona n reiakinna man korakoran ana kaeka Mote nakon ana mwakuri ni kariiri teuare e buakaka. I kaoingkami ni kaeka n aron te kawai aei ngkana kam namakina te kakairi man te kaririaki. Tuunga ana kairiribai tamneim man atonga: “Naako kararoako! Ngkoe akea mimitongim. Tai kaririai ke ni keweai! Ibukina I ataia Ngai—bon natin te Atua. Ao N na aki toki ni wetea Atuau ibukin Ana buoka.”
Taian kakatai, e ngae anne, e bon aki kona ni kitana aron ana urubai ni mwamwanai ao ni kakeaa onimakinara. Ni koauana e aki karaoa nanona ma Mote, n tangiria ni karika Mote ni mwaninga bwa antai ngaia ae akea tokina.
Kanga ai aron ngkana reken unia ataei ae kai toki, “Tatan e takarua n te bwana ae korakora, ao e tatakarua n te aro ni iowawa i aon te aonaba, ao e tua, ni kangai: Ngai te Rikitemanna, taromauriai.”8
Ti a rinanona. Kam ongo bwa tera ae taekinna? “Ngai te Rikitemanna. Taromauri ai!”
Te tia kamwane ae korakora e taku, n rootaki, “Tai raraomwa: N na aki kaikoakiko—Tiaki ngai te tikangkii; Ngai tii te katamwa ae roro-ao-mainaina n akea au bure.”
Mote e wewete nakon te Atua ao ni karekea korakorana ae mairoun te Atua. E ngae ngke te tia kakaitara e ruru ao e mwaeiei te aonaaba, Mote e aki mwaing. Bwanaana e matoa ao itiaki. “Nako mai irou, Tatan,” e taku, “bwa ti aio te Atua ae N na taromauri, are bon Atuan te mimitong.”9
Tokina, “e nako … mai matan Mote.”10
Imwiina te Uea e kaoti ao ni kakabwaia Mote ibukin ongotaekana, te Uea e taku:
“Ko a kakabwaiaki Mote, ibukina … ko na kakorakoraaki nakon raan aika mwaiti. …
“Ao nooria, I memena iroum, ni karokoa tokin am bong.”11
Mote tiaki aron te tia kakaitara e bon bebete aron taraana ao e karekea te kairi ibukira n tatabemaniira, n aki taraaki arora ni kekeiaki ni maiura. Bon te rongorongo ae moan te korakora i bon ibukimi—n ataia bwa tera ko na karaoia ngkana e kataia ni mwamwanaiko. Ibukina ngkami, ai aron Mote, kama tia ni kakabwaiaaki ma te bwaintangira n ibuobuoki mai karawa.
Tuua ao Kakabwaia
Ko na kanga ni kunea te buoka mai karawa aei, n ti te arona n are e karaoia Mote, ao e aki mwamwanaaki ke anga ngaia nakon te kaririaki? Te kawai ae itiaki ibukin te ibuobuoki ae mai karawa e bon tia ni manga katuruturuaki iroun te Uea boni Ngaia ngke E katanoata: “Mangaia ae, Ngai te Uea, atakin te kaangaanga are e na roko i aoia kaain te aonaaba, I wetea au tia mwakuri Iotebwa Timiti te Ataei, ao n taetae nakoina mai karawa, ao n anganna tua.”12 Kabonganaan taeka aika bebete, ti na kona n taekinna bwa te Uea, e ataia “tokina man te moan tai,”13 atai kaangaanga akea n ai arona n ara bong. Ngaia are, E a tia ni katauraoa te kawai ibukira n totokoi kakaewenako ao kariiri, mwaitina ake a roko ni bakarere mwiina man te kakairi ni mwamwanaaki man ana mwakuri teuare e buakaka ao ana buaka.
Te kawai e bebete. Rinanon Ana toro, te Atua e taetae nakoira, Natina, ao anganiira taian tua. Ti kona ni manga taekinna ni kabebetea te kibu are I a tiba taekin n taku “Ngai te Uea … wetea au toro [Beretitenti Russell M. Nelson], ao e taetae nakoina mai karawa, ao n anganna tuua.” Tiaki akanne koaua aika mimitong?
I kaota koauan kakoauana bwa te Uea e bon karaoa ni kabane te taetae ni koaua nakon Iotebwa Timiti mai karawa, moanaki ma tamaroan te Moan Mii ni Buarabeti. E taetae naba nakon Beretitenti Nelson inanon ara tai. I kakoaua bwa te Atua e rereitaki ma burabeti n taai ngkoa ao n anganiia taian tua ni karaoaki ni kairiia Natina nakon te kukurei inanon te maiu aei ao te mimitong n are imwina.
Te Atua e reitinako n anga taian tua nakon ara burabeti ae maiu n te bong aei. Katooto a roko ni mwaiti—riki ni boboto-n te mweenga, te Ekaretia-boutakaan kabaerantan kaetieti n te euangkerio, onean mwiin te kakawari n reirei n te mweenga ma te mwakuri n ibuobuoki, bitakin waaki n te tembora ao otenanti, ao te buroukuraam ae boou ibukiia Ataei ao te Roronrikirake. I rang miimi n tamaroan ao ana nanoanga Tamara are i Karawa ae tatangira ao Natina, Iesu Kristo, are e kaoka Ana Ekaretia te Tia Kamaiu nako aon te aba ibukin teuana riki te tai ao n tia ni wetea te burabeti inanon ara bong. Kaokan ana euangkerio Iesu Kristo ni kaaitara kakamakun taai ma te koron bukin te tai.
Te Buakaka e Aki Karekea te Kakukurei
Te ongotaeka nakon tuua e anganaki ara burabeti e bon riai bwa tiaki ti totokoan te kakairi mairoun te tia mwamwanai n ana mwakuri ma n rinanon naba te kimwareirei ae akea tokina ao te kukurei. Te waaki ae mairoun te Atua aei e bon bebete: te etieti, ke ongotaeka nakon tuua, uotii kakabwaia, ao kakabwaia e uotii kakukurei, ke kimwareirei, inanon maiura.
E ngae n anne, n te kawai ae ti te arona are te tia kaitara e kataia ni mwamwana Mote, e ukoukoria ni kamwaneko. E a tia n taainako n riki bwa te bwai teuana are aongkoa tiaki ngaia. E aki toki ni kataia ni karabaa bwa antai raoi ngaia. E tua bwa te ongeaaba e na angan maium te aki kukurei ao bwa e na tuukiko man te kukurei.
Ko kona n iangoi tabeua ana mwakuri ni karekeia aomata nakon te mwamwanaaki? N aron taekana, e onea taraan te bwai teuana n akean kakawakina bwa ana urubwai te moi manging bon akea mwiina n oneamwiina bwa e na uota te kakukurei. E tauniira nako inanon bwaai aika aki eti are e kona n roko inanon bwaai n tamnei, n reita kamamaran kakabotau ao iangoakina bwa e na koaua. N reitana, e karabai tabeua roo, buakakan kanoana ake a kuneaki iaonrain, n aron tamnei aika buakaka, karaoan bwaai aika buakaka n ekinakoia tabeman rinanon bwaai n reitaki ni kakamakaia aomata, mwamwanaki n rongorongo aika kaairua ni karika te nanououa ao te maaku nakon nanora ao ara iango. E kamwamwane ni wirikiriki, “Ti iriirai, ao ko na bon kukurei.”
Taian taeka ake a koreaki ni mwaitin tienture n nako irouia burabeti n Ana Boki Moomon a bon irekereke ibukira n ara bong “Buakaka aki karekea te kukurei.”14 Ti bia kona ni kinaa ana kamwamwane Tatan bwa baikara. Ti na riai n totokoi ao ni kinai rinanon taian kewe ao kakairi iroun temanna are e ukoukora uruanakin tamneira ao n anaia mai iroura kukureira ae ngkai ao mimitongira aika a na roko.
Tariu ao mwaneu, ti riai n reitinako n riki ni kakaonimaki ao kinai raoi kanikinaean te kaangaanga, ibukina bon ti te kawai ni ataa raoi te koaua ao n ongo bwanaan te Uea rinanon Ana toro. “Bwa e taekina te koaua te Tamnei ao e aki kewe. … Bwaai aikai e kaotaki ni mataata nakoira, ibukin kamaiuan tamneira. … Bwa te Atua e a tia n taetae nakoia burabeti ni kawai.”15 Ngaira natin te Atua ae moan te Mwaaka, te kantaninga ibukin Iteraera! Ti na mamaara? “Ti na kataia n totokoia ke katoka te buaka? Tiaki! … Ana taeka te Atua, tamneira, nanora, ao baira, kakaonimak ao kokoaua ti na tei ni matoa.”16
I kaota au koaua iroun Atuaia Iteraera ae Tabu—are arana Iesu Kristo. I kakoaua Ana tangira ae aki bibitaki, koaua, ao kimwareirei are a karaoaki n nakoraoi man Ana anganano ae korakora ao akea tokina. Ngkana ti ongeaaba n Ana tua, ti na aki toki ni kairaki inanon te kawai ae eti ao e na aki mwamwanaaki. N aran te Uea ae Iesu Kristo ae tabu, amen.