Imwiin Kataakin Ara Onimaki
Ngkana ti iriira bwanaan te Atua ao kawain Ana berita, E na kakorakoraiira inanon kataakira.
Ngke I uarereke, Frank Talley, te membwa n te Ekaretia e angananona ni kakibaia au utu n ana wanikiba mai Puerto Rico nako Salt Lake City bwa ti aonga ni kona ni kabaeaki n te tembora, ma waekoan angabuaka a moanna n roko. Temanna mwaneu, Marivid, e bwaka n aoraki. Nimatoaua, au karo a tataro n taekana bwa tera ae a na karaoia ao n teimatoa namakinan te kairi bwa a mwananga. A kakoaua bwa n aron aia onimaki n iriira ana kairi te Uea, ara utu a na bon tararuaaki ao kakabwaiaaki—ao ti bon tararuaaki.
N aki tabe ma angabuaka ake ti kaaitarai n te maiu, ti kona ni kakoua bwa Iesu Kristo e na katauraoa kawaira ngkana ti nakonako ma te onimaki. Te Atua e berita bwa ni kabane ake a maiu ni kaeineti nakon te berita ake a tia ni karaoia ma Ana kantaninga, n Ana tai, a na karekea ni kabane kakabwaia are E beritani. Unimwaane Holland e taku, “Tabeua kakabwaia a waekoa n roko, tabeua a oimwi n roko, ao tabeua a bon aki roko; ma ibukiia naake a kukurei n ana euangkerio Iesu Kristo, a roko1
Moronaai e kabwarabwara bwa “te onimaki bon bwaai aika a kantaaningaki ma aki nooraki; ngaia are, tai kauntaeka ibukina bwa kam aki noori, bwa kam bon aki kona ni karekea te bwai ni kakoaua ni karokoa ae e kataki moa ami onimaki.”2
Ara titiraki bon, Tera ae ti riai ni karaoia nakon te tamaroa ni kaaitarai kataaki ake ana roko ni kawaira?
Inanon ana moan taetae te Beretitenti n te Ekaretia, Beretitenti Russel M. Nelson e reirei: “Ngkai te Beretitenti ae boou, ti tangiria ni waaki ma tokin ara iango. Ibukin aei, ti taetae nakoimi n te bong aei man te tembora. Te kouru ae ti bane ni uaiakinna bon te kakorakoraki n te mwaaka n ana auti te Uea, ni kabaeaki bwa utu, kakaonimaki nakon berita aika a karaoaki n te tembora are e katauiira ibukin ana bwaintituaraoi te Atua ae te kabanea n tamaroa—anne are bon te maiu are akea tokina. Otenanti n te tembora ao berita aika tabu ake ko karaoi ikekei bon kiingin kakorakorakin maium, am mare ao am utu, ao am konabwai ni kaitarai ana mwakuri te tia kakaitara. Am nebonebo n te tembora ao am mwakuri n ibuobuoki ikekei ibukiia am bakatibu e na kakabwaiako ma rikiraken am kaotioti ao te rau ao e na karikirakea am motinnano n teimatoa iaon te kawai ae e a tia ni Beritanaki.”3
Ngkana ti iriira bwanaan te Atua ao kawain Ana berita, E na kakorakoraiira inanon kataakira.
Mwanangaia au utu nakon te tembora n ririki aika nako e bon kaangaanga, ma ngke ti a roko n te Tembora i Salt Lake, Utah, tinau, e on n te kimwareirei ao te onimaki, e taku, “Ti na bon OK; te Uea e na tararuaiira.” Ti kabaeaki n aron te utu, ao mwaneu e a marurung. E riki aio mai imwiin kataakin aia onimaki au karo ao inanon iriiran ana kairi te Uea.
Aia katooto au karo e teimatoa ni kakaiirii inanon maiura n te bong aei. Te banna anne e reireiniira bukin tera reirein te euangkerio ao ngke e buokiira n oota n nanona, buk ina, ao kakabwaia are e uotia te euangkerio. N oota bwa bukin tera ana euangkerio Iesu Kristo e kona ni buokiira naba ni kaaitara kataakira ma te onimaki.
N tokina, bwaai ni kabane are te Atua e kaoiira ao tuangiira ni karaoia bon kabwarabwaraan Ana tangira ibukira ao Nanona n anganiira kakabwaia are katauraoia ibukiia aika a kakaonimaki. Ti aki kona ni kantaningaia bwa ara ataei a na reiakinna n tangira te euangkerio i bon irouiia; bon tabera n reireiniia. Nkgai ti reireiniia natira n reiakinna bwa a na kanga ni kabongana inaomataia n rinerine n ae riai, ara katooto e kona ni kaungaiia ni karaoa oin aia rinerine ae etri. Aia kakaonimaki ni maiuakinna e na rairaki ni buokiia aia ataei n ataa koauan te euangkerio ibukiia.
Kairake n ataeinimwane ao n ataeinnaine, ongora n ana taeka te burabeti nakoimi. N reiakin koaua ae mai karawa ao ni ukoria n oota n te euangkerio i bon ibukiia. Beretitenti Nelson e reirei n tai ae aki maan: “Tera te wanawana ae akea iroum? … Iriira ana katooto te Burabeti Iotebwa. Kakaea te tabo ae rau. … Kananorinanoko imatan te Atua. Tataro i nanom nakon Tamam are i Karawa. Rairaki Nakoina ibukin te kaeka.”4 Ngkana ko ukora te kairi mairoun Tamara are i Karawa ae tatangira, ongora nakon ana reirei te burabeti ae maiu ao taratarai banna ni katooto irouia kaaro aika etieti, ko kona n riki bwa te toma ae matoatoa n te onimaki n am utu.
Nakoia kaaro ma ataei ake a tia ni kitana kawain te berita, karaurau oki rikaaki. Buokiia n ota ni wareki koauan te euangkerio. Waaki ngkai; e bon tuai n oimwi.
Ara katooton maiuakinan te etieti e kona ni karaoa te bitaki ae korakora. Beretitenti Nelson e taku: “Ngkai ngaira Aika Itiaki, ti a tataneiai n iangoa te ‘ekaretia’ bwa te bwai ae riki n ara tabo n taromauri, ni boutokaki ni baike a kakaraoaki n te mweenga. Ti kainanoa te bitakii nakon te katei aio. Ai bon taina ngkai te Ekaretia ae boboto n te mweenga, ni boutokaaki ni baike a karaoaki n ara mwaanga, ara uoote, ao n autin te titeiki.”5
Koroboki aika tabu e reirei, “Reireia te tei aroarona ae riai, ao ngkana e a unimane ao e bon aki kitanna.”6
A taku naba, “Ao ngkai, ibukina bwa te taeka ae kabwarabwaraki iai ana konabwai ni kairia aomata bwa a na karaoa ae e eti—eng, bon iai korakoran riki korakorana iaon aia iango aomata nakon te kabaang, ke te bwai riki teuana, are e a tia n riki nakoia—ngaia are Aramwa e iangoia bwa e riai bwa a na kata tamaroan ana taeka te Atua.”7
Te karaki e karakinaki te aine are e bon nanokawaki bwa natina te mwaane e kakana te tioka ae mwaiti. E ngae ngke e bati tuangakina n toki, e reitinako ni katoka nanona ni kang tioka. E rang un, e iangoia ni kaira natina temwaane n noora temwaane ae wanawana are e karineaki.
E roko nakoina ao e taku, “Tiee, natiu temwaane e kakana te kanree ae mwaiti. Taiaoka ko kona n tuangnga bwa e na katoka kanakina?”
E kakauongo raoi ao e taku nakon natina temwaane, “Oki nakon mweengam ao oki inanon uoua te wiiki.”
Te aine e kaira natina temwaane ao oki nakon mwengaia, n nanououa man ingainga bwa bukin terea e aki tuanga te teinimwaane bwa e na toki ni kanakin te tioka.
Uoua te wiiki imwiina a oki. Temwaane ae wanawana e taraa teinimwaane ao e taku, “Te teinimwaane, ko riai n toki ni kakana te kanree ae mwaiti. E aki raoiroi ibukin marurungim.”
Te teinimwaane e katoutoua atuna ao e berita e na karaoia.
Tinan teinimwaane e titiraki, “Bukin tera ko aki tuangnga anne uoua te wiiki n nako?”
E moangare temwaane ae wanawana. “Uoua te wiiki n nako I bon teimatoa ni kakana te kanree boni ngai.”
Temwaane aei e maiu ma te etieti are e bon ataia bwa ana reirei e na uota korakorana ti ngkana e bon iriira oin ana reirei.
Te kakairii are ti karekea iaoia ara ataei e bon rang korakora ngkana a nooriira n nakonako ni kakaonimaki iaon te kawain te berita. Te burabeti n Ana Boki Moomon ae Iakobwa bon te katooto n aron te etieti. Natina temwaane ae Enoti e korea te kakairii inanon maiuna mairoun Iakobwa:
Ngai, Enoti, I ataia bwa tamau bon te aomata ae motiraoi—bwa e a tia n reireinai n aron ana taeka, ao n aron naba kawain te Uea—ao e na kakabwaiaki aran te Atua ibukin aio. …
“… Ao e a rin inanou taian taeka ake I aki toki n ongo mai iroun tamau ake e taetaekina iai te maiu ae akea tokina, ma te kimwareirei are e reke irouia aomata aika itiaki.”8
Tinaia kairake n ataeinimwaane ake taan buaka a maiuakina te euangkerio, ao natiia a na kaonaki ma te nanomatoa. Aia kaaben e ribooti:
“A bon tia n reireinaki irouia tinaia, bwa ngkana aki nanououa, ao e na kamaiuia te Atua.
“Ao a taekin nakoiu aia taeka tinaia, ni kangai:Ti bon aki nanououa bwa a ataa aio tinara.”9
Enoti ao kairake n ataenimwaane ake taan buaka a kakorakoraaki man aia onimaki aia karao, are e buokiia ni kaaitara oin kataakiia n te onimaki.
Ti kakabwaiaaki ma ana euangkerio Iesu Kristo ae kaokaki inanon ara bong, are e tabekirakeiira ngkana ti namakina te bwarannano ke te kaangaanga. Ti na bon taekinna bwa ara mwakuri korakora e na iai mwiina inanon oin ana tai te Uea ngkana waakirake rinaon kataakin ara onimaki.
Kainnabau ao Ngai, ma te Beretitentii n te Aono ti raona Unimwaane David A. Bednar nakon katabuan te Port-au-Prince Haiti Tembora. Natira temwaane Jorge are e iriira, e taku n taekan ana tai are e rinanona: “E Kamiimi, Pa! Ngke Unimwaane Bednar e moana te tataro ni katabu, I berita bwa I namakina rokon te oota ae korakora inanon te ruu ao n rikirake n oota man ootanako. Te tataro e reita ae mwaiti nakon ootau bwa tera oin bukin te tembora. Bon ana auti te Uea ni koaua.”
N Ana Boki Moomon, Nibwaai e reirei bwa ngakan ti tangiria n ataa ana kantaninga te Atua, E na kakorakoraiira. Ao e koro bukina bwa ngai, Nibwaai, e ngae ngke I bon rangi n ataei, ma e bon rangi ni korakora rabwatau, ao ni korakora naba nanou ni kan atai ana bwai te Atua aika raba, mangaia are, I a tang nakon te Uea; ao noria e a kaoti nakoiu, ao e a kamaraua nanou n te aro are I a kakoauai taeka ni kabane ake e a tia n taekin tamau; mangaia are, I aki kaaitara ni katootongiia tariu.”10
Tariu ao mwaaneu, ti a buokiia ara ataei ao ni kabane ake irarikira n iriira ana kawai ni berita te Atua n te aro are te Tamnei e na reireiniia ao kamarau nanoia n tangiria n Iriiria rinanon oin maiuiia.
Ngke I iangoa taekan te katooto mairouia au karo, I a ataia bwa ara onimaki iroun Iesu Kristo e na kaota nakoira te kawai n oki nakon mweengara i karawa. I ataia bwa taian kakai a roko imwin kataakin ara onimaki.
I kaota koauan Iesu Kristo ao Ana mwakuri ni kamaiu na anga karea. I ataia bwa bon ara Tia Kamaiu ao te Tia Kamanoira. Boni Ngaia ao Tamara are i Karawa a roko ni moaningabongin te tiburing n 1820 nakon Iotebwa Timiti te teei, te burabeti ni Kaokan Bwaai. Beretitenti Russell M. Nelson bon Ara burabeti n ara bong aei. N aran Iesu Kristo, amen.